Read Batak Karo 2 KRONIKA 20 Bible Online

2 KRONIKA 20 - Batak Karo bible

2 KRONIKA 20

¹La ndekahsa kenca si e reh tentera Moap ras Amon radu ras temanna bangsa Meun, merang Juda.

²Piga-piga kalak persuruhen reh ndahi Josapat nina, “Nterem tentera Edom enggo reh i lepar Lawit Mate nari, atena merang kam. Hasason Tamar enggo italukenna.” (Gelar si debanna e me Engedi.)

³Mbiar Josapat, e maka ertoto ia man TUHAN mindo gelah ituduhkenNa dalan man bana. Kenca bage iperentahkenna maka kerina kalak i belang-belang negeri e erpuasa.

⁴Kerina kalak si ringan i kuta-kuta Juda, pedas-pedas lawes ku Jerusalem mindo ajar i bas TUHAN nari,

⁵e maka kerina ia ras kalak si tading i Jerusalem pulung i bas kesain si mbaru Rumah Pertoton. Reh Raja Josapat jenari tedis ia i lebe-lebe kalak ndai

⁶jenari ertoto ia nina, “O TUHAN, Dibata nu nini-nini kami. Kam kap si ngerajai kerina bangsa-bangsa i babo doni i Surga nari. Kam kap si megegehna ras si meganjangna. Ise pe la ngasup ngelawan Kam.

⁷Kam kap Dibata kami. Sanga bangsaNdu miser ku negeri enda, ipelawesNdu bangsa si ringan i jenda, jenari iberekenNdu negeri enda man kesusuren Abraham temanNdu e, gelah jadi sikerajangna seh rasa lalap. [39†]

⁸Enggo ia tading i jenda dingen enggo ipajekkenna sada Rumah Pertoton guna mereken kemulian man baNdu, sabap iteh bangsaNdu e

⁹maka kune ia ndatken ukumen erkiteken dosa-dosana, umpamana perang, penakit si mehantu, ntah pe kelihen si mesangat, banci ia reh dingen tedis i lebe-lebe Rumah Pertoton ras i lebe-lebeNdu enda. Banci ia ertoto man baNdu i bas paksa kesusahenna, janah nggit Kam ndengkehken ras nampati ia.

¹⁰Genduari enggo reh bangsa Amon, bangsa Moap ras bangsa Edom merang kami. Sanga nini-nini kami luar i Mesir nari, la ibereNdu nini-nini kami e mengketi negeri-negeri kalak ah ndai, e maka isilahi nini-nini kami e negeri-negeri e janah la ikernepkenna bangsa-bangsa e. [40†]

¹¹Genduari bagenda me ia erbalas reh lako pelawes kami i bas negeri si enggo iberekenNdu man kami enda.

¹²Kam kap Dibata kami! Ukumlah ia, sabap la kami ngasup ngelawan tentera musuh si nterem si merang kami enda. Lanai ieteh kami si man bahanen tapi man baNdu kami mindo penampat.”

¹³Kerina kalak Juda ras ndeharana bage pe anak-anakna tedis i lebe-lebe Rumah Pertoton e.

¹⁴Kesah TUHAN nusur ku sekalak kalak Lewi si lit i tengah-tengah jelma si nterem e. Gelarna Jahasiel anak si Sakaria; ia anggota terpuk Asap dingen kesusuren Asap erkiteken Matania, Jeiel ras Benaya.

¹⁵Nina Jahasiel, “O Raja, bage pe kerina kalak Juda ras Jerusalem; bagenda nina TUHAN, ‘Tetap lah ukurndu, ola mbiar ngalaken tentera si nterem e. Sabap sebo kam si erperang tapi Aku. [41†]

¹⁶Seranglah pagi ia sanga ia nangkeng-nangkeng ku Sis. Ijumpaindu ia pagi i ujung baluren si nuju ku taneh mesawang deher Jeruel.

¹⁷Labo perlu kam ikut erperang. Buat inganndu janah timai saja, idahndu me Aku TUHAN, mereken kemenangen man bandu. O kalak Juda ras Jerusalem, tetaplah ukurndu, ola mbiar. Laweslah erperang janah Aku TUHAN, si ngarak-ngarak kam!’ ”

¹⁸Erjimpuh Raja Josapat ayona terus ku taneh janah kerina jelma si nterem erjimpuh ras ia jenari isembahna TUHAN.

¹⁹Anggota-anggota suku Lewi i bas terpuk Kohat ras Korah nari tedis jenari alu sora megang ipujina TUHAN, Dibata Israel.

²⁰Pepagina erpagi-pagi lawes kalak e ku tanah mesawang deher Tekoa. Nandangi ia berkat ngerana Josapat man kalak enda nina, “O Kalak Juda ras Jerusalem! Ernalemlah man TUHAN Dibatandu, maka tetap pertedisndu. Teklah man kai si ikataken nabi-nabiNa, maka seh sura-surandu.”

²¹Kenca arih-arih ras bangsa e, iperentahken raja piga-piga pemain musik make paken si biasa ipake i bas paksa-paksa perayan si badia jenari erdalan i lebe tentera e, janahna rende nina, “Pujilah TUHAN! Keleng ateNa tetap rasa lalap!”

²²Kenca kalak enda mulai rende, igawer TUHAN barisen tentera musuh e.

²³Iserang kalak Amon ras kalak Moap tentera kalak Edom, janah keri kal ikernepkenna. Kenca bage ia ka sibunuhen sapih-sapih ia.

²⁴Kenca tentera Juda seh i bas sada menara si lit i bas taneh si mesawang e, itatapna ku musuh e dingen idahna maka kerina musuh-musuh e enggo amparen i babo taneh, mate. La lit sekalak pe si pulah.

²⁵Josapat ras tenterana ngincuah muat barang tabanen perang e. I je idatca melala asuh-asuhen, persedian pangan, uis, ras barang-barang si meherga si deban. Lit telu wari dekahna ia pepulungi barang tabanen perang e, tapi perban bage kal lalana, seh maka la terbabasa kerina.

²⁶I bas wari si peempatken pulung ia kerina i Baluren Berakah jenari ipujina TUHAN kerna si enggo ibahanNa. E me sabapna maka baluren e igelari “Berakah.”

²⁷Ipinpin Josapat tenterana mulih ku Jerusalem alu dem keriahen sabap TUHAN enggo naluken musuh-musuhna.

²⁸Kenca ia seh i bas kuta e, erbaris ia ku Rumah Pertoton iikuti sora kulcapi ras terompet.

²⁹Kerina bangsa-bangsa mbiar kenca ibegina maka TUHAN enggo naluken musuh-musuh Israel.

³⁰E maka Josapat merentah alu dame, janah TUHAN mereken man bana keamanen i belang-belang negeri.

³¹Josapat enggo jadi raja i Juda i bas umur telu puluh lima tahun. Ia merentah i Jerusalem dua puluh lima tahun dekahna. Nandena e me Asuba anak Silhi.

³²Bali ras bapana Asa, si merentah ope denga ia, ibahan Josapat si payo iakap TUHAN;

³³tapi ingan nembah berhala la isontarkenna. Bangsa e langa mulihken ersembah alu bulat ukurna man Dibata nini-ninina.

³⁴Kerina si debanna si ilakoken Josapat mula-mulana nari seh ku bas ujung pemerentahenna isuratken i bas Sejarah Jehu anak Hanani e me sada bagin Sejarah Raja-raja Israel.

³⁵I bas sada paksa erteman Josapat raja Juda ras Ahasia, raja Israel si melala ngelakoken perbahanen si jahat.

³⁶Erkongsi ia ras Esion-geber ibahanna kapal-kapal si erlayar ku Tarsis.

³⁷Tapi Elieser anak Dodawahu, anak kuta Maresa ipandangna Josapat nina, “Sabap enggo erteman kam ras Ahasia ikernepken TUHAN me kai si enggo ibahanndu.” E maka gedap kapal e kerina dingen la pernah erlayar.