Read Batak Karo 2 KRONIKA 21 Bible Online

2 KRONIKA 21 - Batak Karo bible

2 KRONIKA 21

¹Josapat mate dingen ikuburken i bas kuburen raja-raja i Kuta Daud e maka anakna Jehoram nggantiken ia jadi raja.

²Jehoram anak Raja Josapat i Juda nari lit enem seninana: Asaria, Jehiel, Sakaria, Asariahu, Mikael ras Sepatia.

³Ibereken bapana man anak-anakna enda ndai melala emas, pirak, ras erta-erta si deban si meherga, janah itamakenna ia sekalak-sekalak jadi kepala i bas sada kuta Juda si lit bentengna. Tapi erkiteken Jehoram anak sintua, e maka ia ibahanna gantina jadi raja.

⁴Kenca kuasa Jehoram enggo nteguh i bas kerajan e, ibunuhna kerina seninana, bage pe piga-piga peminpin-peminpin Israel.

⁵Jehoram jadi raja i bas umur telu puluh dua tahun janah ia jadi raja i Jerusalem lit waluh tahun dekahna.

⁶Ia pe jahat perbahanenna bali ras perbahanen Raja Ahap ras raja-raja Israel si deban, sabap enggo iempoina sekalak anak Ahap. Erdosa ia man TUHAN,

⁷tapi la ate TUHAN ngkernepken kerajan Daud, sabap TUHAN enggo erbahan sada perpadanen ras Daud janah ipadankenNa maka kesusuren Daud tetap ncikep pemerentahen. [42†]

⁸Sanga pemerentahen Jehoram, bangsa Edom berontak man Juda jenari Edom enggo jadi kerajan merdeka. [43†]

⁹E maka ndarat Jehoram ras puanglimana ergereta kuda jenari iserbuna Edom. Ikepung tentera bangsa Edom Jehoram ras tenterana tapi kenca berngi ngasup ia merang tentera Edom e maka pulah ia i bas kepungen e nari.

¹⁰Kenca si e, Edom enggo merdeka i bas Juda nari. I bas paksa si e ka kuta Lipna pe berontak man Juda, sabap Jehoram enggo nundalken TUHAN Dibata nini-ninina.

¹¹Tambah si e ipajekkenna ka pe ingan-ingan ersembah berhala i deleng-deleng Juda jenari ibabaina bangsa Juda ras Jerusalem erdosa man TUHAN.

¹²Ikirem Nabi Elia sada surat man Jehoram, isina bagenda, “TUHAN Dibata nini-ninindu Daud ngukum kam sabap la iikutkenndu kai si ibahan bapandu Raja Josapat ntah pe si ibahan ninindu Raja Asa.

¹³Tapi iikutkenndu kai si ibahan raja-raja Israel janah ibabaindu kalak Juda ras Jerusalem lanai setia man Dibata, bali ras Ahap ras raja-raja si nggantiken ia mabai Israel lanai setia man Dibata. Senina-seninandu jine pe ibunuhndu, si ndauh ulin asangken kam.

¹⁴Erkiteken si e mesangat pagi iukum TUHAN rayatndu, anak-anakndu, ras kemberahen-kemberahenndu, janah erta-ertandu ikernepkenNa me.

¹⁵Kam jine pe nandangi mesui me iakapndu sabap turah me penakit si mekelek i bas beltekndu janah tambah wari tambah kelekna.”

¹⁶Sanga si e lit kalak Pilisti ras Arab ringan deherken bangsa Sudan si erkuta i tepi lawit. Iajuk TUHAN bangsa-bangsa e gelah iperangna Jehoram.

¹⁷E maka iserbuna Juda, ibuatna kerina erta-erta si lit i bas istana, jenari ibabana jadi tabanen kerina kemberahen-kemberahen raja ras anak-anakna si dilaki, seakatan anakna si nguda e me Ahasia.

¹⁸Kenca si enda ndai kerina enggo jadi, ipeturah TUHAN i bas beltek raja sada penakit si mesui mekelek.

¹⁹Menam dua tahun dekahna penakit e tetap erkelekna seh maka dungna mate raja e i bas kiniseran si mesangat. Tupung ia mate la ipegara rayatna api pinugun lako nghamatisa; adi man nini-ninina nai semal ipegara kalak api pinugun e.

²⁰Sanga Jehoram jadi raja umurna telu puluh dua tahun, janah enggo ia merentah i Jerusalem lit waluh tahun dekahna. Tupung ia mate ise pe la lit rate ceda. Ikuburken kalak ia i bas Kuta Daud tapi la i bas kuburen raja-raja.