Read Batak Karo 2 KRONIKA 22 Bible Online

2 KRONIKA 22 - Batak Karo bible

2 KRONIKA 22

¹Piga-piga kalak Arab minpin sada serangen jenari ibunuhna kerina anak Jehoram, si dilaki seakatan Ahasia anakna si nguda. E maka itangkuhken kalak Jerusalem Ahasia jadi raja nggantiken bapana.

²[2-3] Ahasia jadi raja sanga umurna dua puluh dua tahun, dingen merentah i Jerusalem sada tahun dekahna. Ahasia pe iikutkenna ka perbahanen keluarga Raja Ahap, sabap nandena si Atalia anak Raja Ahap kempu Raja Omri i Israel nari. Nandena ngajarken ia erbahan jahat.

⁴Ibahanna dosa man TUHAN, sabap kenca mate bapana anggota keluarga Raja Ahap si debanna jadi penasehatna, janah e me si ncilakaken ia.

⁵Erkiteken ajar kalak enda ndai, itemanina Joram raja Israel i bas sada perang ngelawan Hasael, raja Siria. Tentera e erperang i kuta Ramot daerah Gileat janah luka Joram i bas perang e.

⁶Mulih ia ku kuta Jesreel nimai luka-lukana malem janah Ahasia raja Juda reh ku jah ndahi ia.

⁷Ibahan Dibata maka i bas ndahi Joram e me mabasa Ahasia ndabuh. Sanga Ahasia i jah, ia ras Joram ijumpai sekalak dilaki gelarna Jehu anak Nimsi. Jehu ipilih TUHAN guna kesusuren Ahap.

⁸Sanga Jehu maba ukumen man kesusuren Ahap e, rembang ia jumpa ras sada peminpin kalak Juda, dingen anak senina Ahasia si nemani Ahasia sanga ia ndahi Joram e. Ibunuh Jehu kerina.

⁹Kenca bage Ahasia pe idarami, janah idat cebuni i Samaria. Ibaba kalak ia man Jehu e maka ibunuh Jehu. Tapi ikuburken bangkena lako mereken kehamaten man ninina Raja Josapat, si enggo erdahin guna TUHAN asa gegehna lit. Lanai lit tading i bas keluarga Ahasia si ngasup jadi raja i bas kerajan e.

¹⁰Kenca ieteh nande Raja Ahasia maka anakna enggo mate ibunuh, minter iperentahkenna kerina anggota keluarga raja Juda ibunuh.

¹¹Lit turang Ahasia pedauh nande, e me Jehoseba. Jehoseba erjabu ras sekalak imam gelarna Joyada. Alu erbuni-buni iselamatken Jehoseba sekalak anak Ahasia, e me Joas. Ibuatna Joas i tengah-tengah anak raja si deban nari si nandangi ibunuh, jenari ibunikenna Joas ras sekalak diberu si ngepkepsa i bas sada kamar i bas Rumah Pertoton. Alu muniken ia, ipulahina Joas i bas kematen i bas tan Atalia nari.

¹²Lit enem tahun ia cebuni i je, janah kidekah si e Atalia merentah jadi ratu.