Read Batak Karo 2 KRONIKA 27 Bible Online

2 KRONIKA 27 - Batak Karo bible

2 KRONIKA 27

¹Jotam jadi raja i bas umur dua puluh lima tahun, jenari merentah ia i Jerusalem lit sepuluh enem tahun dekahna. Gelar nandena e me Jerusa anak Sadok.

²Ilakokenna kai si ngena ate TUHAN sue ras si ibahan bapana; tapi ia la seri ras bapana, la ibahanna dosa alu nutung si merim-merim i bas Rumah Pertoton. Amin bage pe bangsa e lalap nge erbahan dosa.

³Ipajekken Jotam Pintu Gerbang Utara Rumah Pertoton dingen ipekenana tembok kuta Jerusalem si igelari Opel.

⁴I deleng-deleng Juda, ipantekina kuta-kuta jenari ipajekkenna benteng-benteng ras menara-menara i bas kerangen-kerangen.

⁵Iperang Jotam raja Amon ras tenterana. Talu ibahanna kalak e. Ipaksana bangsa Amon nggalar upeti tiap tahun lit dekahna telu tahun. Upeti si man galaren bangsa Amon tiap tahun e, e me: 3.400 kilo pirak, 1.000 ton gandum, 1.000 ton jaba.

⁶Jotam jadi tuhu-tuhu megegeh, erkiteken patuh ia ngikutken TUHAN Dibatana.

⁷Kejadin-kejadin si deban si jadi kidekah Jotam merentah, peperangen-peperangenna kerina, e isuratken i bas Sejarah Raja-raja Israel ras Raja-raja Juda.

⁸Sanga Jotam jadi raja umurna duapulu lima tahun jenari merentah ia i Jerusalem lit dekahna sepuluh enem tahun.

⁹Mate ia jenari ikuburken i Kuta Daud. E maka anakna Ahas nggantiken ia jadi raja.