Read Batak Karo 2 KRONIKA 29 Bible Online

2 KRONIKA 29 - Batak Karo bible

2 KRONIKA 29

¹Hiskia jadi raja tupung umur dua puluh lima tahun, jenari merentah ia i Jerusalem lit dekahna dua puluh siwah tahun. Gelar nandena Abija, anak si Sakaria.

²Iusihna perbahanen nini-ninina Raja Daud. Ilakokenna kai si ngena ate TUHAN.

³I bas bulan si pemena i bas tahun si pemena kenca Hiskia jadi raja, italangina mulihi pintu-pintu gerbang Rumah Pertoton dingen ipekenana.

⁴Ipepulungna sada terpuk imam-imam ras kalak Lewi i bas kesain arah Timur Rumah Pertoton

⁵jenari nina, “Kam kalak Lewi, arus ipebadiakenndu dirindu dingen pebadiaken Rumah Pertoton TUHAN, Dibata nini-ninindu. Agui i bas Rumah Pertoton e nari kerina si erbahanca Rumah Pertoton e lanai bersih rikutken aturen agama.

⁶Nini-nininta la patuh man TUHAN Dibatanta, dingen ilakokenna kai si la ngena ateNa. Itadingken nini-nininta TUHAN Dibata jenari itundalkenna inganNa tading e.

⁷Itutupna pintun-pintun Rumah Pertoton, dingen ipelepasna lampu-lampu si lit i je nimpet, janah lanai itutungna si merim-merim ntah pe lanai ipersembahkenna persembahen tutungen i bas Rumah Pertoton Dibata Israel.

⁸Erkiteken si e TUHAN enggo nembeh man Juda ras man Jerusalem. Janah kai si ibahan Dibata e erbahanca kerina kalak sengget dingen mbiar. Si enda ietehndu kal alu payo.

⁹Bapa-bapanta enggo ibunuh i bas perang. Bage pe ndeharanta dingen anak-anakta enggo ibaba jadi tabanen.

¹⁰Genduari enggo kutetapken erbahan perpadanen ras TUHAN, Dibata Israel, gelah olanai Ia nembeh kempak kita.

¹¹O anak-anakku, genduari olanai pedekah-dekah. Kam me si enggo ipilih TUHAN nutung si merim-merim man baNa dingen mabai bangsa enda nembah man baNa.”

¹² [12-14] Enda me kalak Lewi si pulung tupung si e: I bas terpuk Kohat nari e me Mahat anak Amasia ras Joel anak Asaria. I bas terpuk Merari nari e me Kis anak Abdi ras Asaria anak Jehalelel. I bas terpuk Gerson nari e me Joah anak Simna ras Eden anak Joah. I bas terpuk Elisapan nari e me Simri ras Jewel. I bas terpuk Asap nari e me Sakaria ras Matania. I bas terpuk Heman nari e me Jehuel ras Simei. I bas terpuk Jedutun nari e me Semaya ras Ussiel.

¹⁵Kalak si pepulung enda senina suku Lewi dingen kerina ia mbersihken dirina rikutken aturen agama. Kenca bage sue ras si enggo iperentahken raja, ibenaken kalak ndai mbersihken Rumah Pertoton e rikutken aturen agama sue ras Undang-undang TUHAN.

¹⁶Imam e bengket ku bas Rumah Pertoton guna mbersihkenca jenari ibabana ndarat ku bas kesain Rumah Pertoton kerina si la bersih rikutken aturen agama. Kerina barang-barang si la bersih e ibaba suku Lewi e ku darat kuta ku Baluren Kidron.

¹⁷Dahin e ibenaken i bas wari si pemena i bas bulan si pemena, dingen i bas wari si pewaluhken kerina dahin e enggo dung, subuk dalan bengket ku bas Rumah Pertoton e. Kenca bage kalak enda terus erdahin waluh wari nari, seh ngayak wari pesepuluh enemken i bas bulan e, lako nikapken Rumah Pertoton e guna ingan ersembah.

¹⁸Kalak Lewi erbahan laporen kempak Raja Hiskia, “Kami enggo dung mbersihken kerina Rumah Pertoton e. Batar-batar persembahen tutungen, meja ingan roti ipersembahken man TUHAN ras kerina perkakasna ikut ibersiheken kami.

¹⁹Kerina perkakas si enggo ibuat Raja Ahas i bas paksa-paksa ia lanai erkemalangen man Dibata i bas jaman pemerentahenna, e pe enggo iulihken kami. Dingen kerina e enggo ipebadiaken kami mulihken. Perkakas-perkakas e kerina genduari lit i lebe batar-batar TUHAN.”

²⁰Alu lanai nimai terdekahen minter ipepulung Raja Hiskia kalak si terkemuka i bas kuta e jenari ras-ras ia bengket ku bas Rumah Pertoton e.

²¹Guna persembahen penangtangen dosa-dosa keluarga raja dingen dosa kalak Juda bage pe guna pebadiaken Rumah Pertoton e ibuat kalak ndai pitu jenggi lembu, pitu biri-biri, pitu anak biri-biri, bage pe pitu kambing. Isuruh raja imam-imam kesusuren Harun mpersembahken asuh-asuhen e i babo batar-batar.

²²Si pemenana igeleh imam-imam e, e me jenggi-jenggi lembu, kenca bage maka biri-biri, jenari anak biri-biri. Dareh tiap persembahen ipirpirken ku babo batar-batar e.

²³Kedungenna ibabana kambing e ku adep-adepen raja dingen kempak perpulungen. Itamaken kalak e tanna i babo kambing e.

²⁴Kenca bage igeleh imam-imam kambing e jenari iamburkenna darehna ku babo batar-batar jadi sada persembahen guna nangtangi dosa kerina bangsa e, erkiteken enggo iperentahken raja erbahan persembahen tutungen dingen persembahen penangtangi dosa guna kerina kalak Israel.

²⁵Iikutken raja perentah si enggo ibereken TUHAN man Raja Daud nai arah Gat, nabi raja e, bage pe arah Nabi Natan; itamakenna kalak Lewi i bas Rumah Pertoton guna ngkuit kulcapi ras ceracak,

²⁶e me alat-alat musik bagi si ipake Raja Daud nai. Imam-imam pe tedis i je guna ngembus terompet.

²⁷Iperentahken Raja Hiskia gelah persembahen tutungen e ipersembahken; jenari kenca persembahen enggo ibenaken, perpulungen rende ngendeken ende-enden pujin man TUHAN. Sanga bage terompet iembus, dingen alat-alat musik si debanna pe imainken.

²⁸Kerina kalak si i je ikut ersembah, si rende terus ngendeken ende-enden dingen pemain musik pe terus main musik seh ngayak kerina persembahen e enggo keri meseng.

²⁹Kenca bage raja ras kerina jelma si nterem erjimpuh nembah Dibata.

³⁰Raja ras peminpin-peminpin bangsa e mindo gelah iendeken kalak Lewi man TUHAN ende-enden pujin si ikarang Daud ras Nabi Asap. E maka kerina kalak e rende alu keriahen si mbelin janahna erjimpuh nembah Dibata.

³¹Nina Hiskia kempak perpulungen e, “Genduari erkiteken enggo kam bersih rikutken aturen agama, babalah persembahen pengataken bujur man TUHAN.” Iikutkenna kai si ikataken raja. E maka piga-piga i bas perpulungen e nari arah ukurna ersuruh maba asuh-asuhen lako ipersembahken jadi persembahen tutungen.

³²Ibaba kalak e pitu puluh jenggi lembu, seratus biri-biri dingen dua ratus anak biri-biri jadi persembahen tutungen man TUHAN.

³³Ibabana ka pe 600 jenggi lembu dingen 3.000 biri-biri jadi persembahen guna ipan perpulungen e.

³⁴Erkiteken langa cukup imam-imam si enggo bersih lako nggeleh kerina asuh-asuhen e, e maka isampati kalak Lewi ia sabap patuhen kalak Lewi ngikuti peraturen kebersihen rikutken aturen agama asangken imam-imam. Kalak Lewi tetap nampati seh maka enggo cukup imam-imam si bersih.

³⁵Tambah persembahen-persembahen tutungen e, imam-imam e pe mpersembahken tabeh-tabeh persembahen pengataken bujur si ipan jelma si nterem. Anggur si ipersembahken radu ras persembahen tutungen e pe imam-imam e ka nge ngamburkenca. Bage me kebaktin i bas Rumah Pertoton e ibenaken ka mulihi.

³⁶Raja Hiskia ras rayatna ermeriah ukur sabap enggo isampati Dibata ia ngelakoken kerina dahin e bage pedasna.