Read Batak Karo 2 KRONIKA 3 Bible Online

2 KRONIKA 3 - Batak Karo bible

2 KRONIKA 3

¹Raja Daud bapa Salomo, enggo nikapken ingan guna Rumah Pertoton e. Ingan e i Jerusalem i das Deleng Moria, ingan si ipergunaken Arauna kalak Jebusi e jadi ingan pengeriken. Ibenaken Raja Salomo pembangunen e, [8†]

²i bas bulan si peduaken i bas tahun peempatken ia jadi raja.

³Rumah Pertoton si ibangun Raja Salomo e ukurenna e me: gedangna dua puluh pitu meter, belangna siwah meter.

⁴Ruangen Muka Rumah Pertoton seri belangna ras Rumah Pertoton e, e me siwah meter, dingen ganjangna 54 meter. Dingding ruangen si arah bas ilapisi alu emas murni.

⁵Ruang pematang papanna kayu cemara, ilapisi alu emas tua. I bas lapisen emas e iukir batang kurma ras rante.

⁶Rumah Pertoton e ihiasi raja alu batu si mejile ras alu emas si rehna i negeri Parwaim nari.

⁷Dingding Rumah Pertoton e, balok-balokna, binangun pintun, pintu-pintu kerina ilapisi alu emas. I bas dingdingna iukir mahluk si erkabeng.

⁸Ruangen si arah bas igelari Ruangen si Badiana kal, ukurenna e me: gedangna siwah meter dingen belangna pe siwah meter bali ras belang Rumah Pertoton e. Guna ngelapisi dingding ras Ingan si Badiana kal ipake 20 ton emas; [9†]

⁹lima ratus pitu puluh gram emas ipake guna erbahan paku. Janah dingding ruangen si arah datas pe ilapisi alu emas.

¹⁰Isuruh raja pe tukang erbahan dua gana-gana mahluk erkabeng i bas logam nari, ilapisi alu emas, jenari itamaken i bas Ingan si Badiana kal, [10†]

¹¹[11-13] i je ipetedisna duana erdampingen, ngala ku pintun. Tiap mahluk lit dua kabengna, tiap kabeng gedangna 2,2 meter, si ikirbangken, seh maka ujungna sidegesen i tengah-tengah ruangen e, janah ujung si sembelah nari ngkenai dingding si arah kawes ras kemuhen. Kimbang i bas ruangen e, kira-kira siwah meter gedangna.

¹⁴Kire-kire Ingan si Badiana kal ibahan i bas lenen ras i bas uis si deban nari si icelup jadi belau, ungu, megara. I bas kire-kire ibahan gambar mahluk si erkabeng. [11†]

¹⁵Ibahan raja dua tiang; tiap tiang ganjangna 15,5 meter jenari itamakenna i lebe-lebe Rumah Pertoton. Tiap tiang lit takalna 2,2 meter ganjangna.

¹⁶I ancuk-ancuk tiang e ihiasina alu rante si ibayu dingen 100 buah delima tembaga.

¹⁷Tiang-tiang ipajekkenna sada arah kemuhen sada arah kawes i lebe-lebe Rumah Pertoton. Tiang si arah Selatan gelarna Jahin. Tiang si sada nari arah Utara gelarna Boas.