Read Batak Karo 2 KRONIKA 30 Bible Online

2 KRONIKA 30 - Batak Karo bible

2 KRONIKA 30

¹ [1-3] Bangsa e la ngasup ngerayaken wari raya Paskah i bas paksana i bas bulan si pemena e, erkiteken la cukup imam-imam si enggo bersih rikutken aturen agama. Rayat pe langa nterem si pulung i Jerusalem. E maka Hiskia, pegawai-pegawaina, bage pe rayat Jerusalem setuju ngerayakenca i bas bulan si peduaken. E maka ipeseh raja kata ku kerina kalak Israel ras Juda. Suku Eperaim ras Manase pe la lupa iundang. Kerina kalak Israel iundang, gelah reh ku Rumah Pertoton lako ngerayaken Paskah pemuliaken TUHAN, Dibata Israel. [52†]

⁴Raja ras rayat e, meriah ukurna kerna rencana e,

⁵e maka iundangna kerina kalak Israel mulai i Dan nari arah Utara seh ku Berseba arah Selatan, gelah pulung i Jerusalem lako ngerayaken Paskah rikutken Undang-undang; kalak si pulung e teremen asangken si nggona.

⁶Pertenahen-pertenahen lawes ku kerina Juda bage pe Israel i bas perentah raja ras pegawai-pegawaina maba undangen enda, “O kalak Israel, kam iba-iba si enggo pulah i bas kekuasan Assur nari. Genduari mulihkenlah kempak TUHAN, Dibata Abraham, Isak, ras Jakup gelah Ia pe mulihken man bandu.

⁷Ola kam bagi nini-ninindu dingen bagi seninandu kalak Israel si la erkemalangen man TUHAN Dibatana. Bagi idahndu ia enggo mesangat iukum TUHAN Dibata.

⁸Ola kam mekeng bagi kalak e, tapi ikutkenlah TUHAN. Rehlah kam ku Rumah Pertoton i Jerusalem, Rumah si ipebadiaken TUHAN Dibatandu rasa lalap, janah sembahlah Ia gelah olanai Ia merawa man bandu.

⁹Adi mulihken kam kempak TUHAN, e maka kalak si enggo maba keluargandu jadi tabanen, turah atena mekuah man keluargandu e, janah ipelepasna mulih. TUHAN Dibatandu mehuli, dingen perkuah kap. E maka adi mulihken kam man baNa iperdiatekenNa me kam.”

¹⁰Pertenahen-pertenahen e lawes ku kerina kuta i bas daerah suku Eperaim ras Manase, dingen seh i Utara ku suku Sebulon. Tapi persuruhen e itawai dingen iuru-uru kalak.

¹¹Amin bage pe lit nge i bas suku Aser, Manase ras Sebulon nari si nggit reh ku Jerusalem.

¹²Dibata pe erdahin i Juda dingen persadaken ukur rayat. Alu ukur si tetap patuh ia ngikutken si ngena ate Dibata arah ngikutken perentah-perentah raja dingen pegawai-pegawaina.

¹³I bas bulan si peduaken nterem kal rayat pulung i Jerusalem guna ngerayaken Wari Raya Roti si La Itama Ragi.

¹⁴Ibuat kalak enda kerina batar-batar si enggo ipergunaken i Jerusalem guna persembahen gelehen, dingen nutung si merim-merim, jenari iambekkenna ku Baluren Kidron.

¹⁵Jenari i bas wari pesepuluh empatken i bas bulan e, igeleh kalak enda anak biri-biri guna persembahen Paskah. Imam-imam ras kalak Lewi si la bersih rikutken aturen agama mela kal iakapna. E maka iendeskenna dirina man TUHAN, janah genduari enggo banci kalak enda mpersembahken persembahen tutungen i bas Rumah Pertoton.

¹⁶Ibuatna inganna i bas Rumah Pertoton rikutken si iperentahken i bas Undang-undang Musa, suruh-suruhen Dibata e. Kalak Lewi mereken dareh persembahen e man imam-imam e, janah ipirpirken imam-imam dareh ku babo batar-batar.

¹⁷Erkiteken nterem rayat e la bersih rikutken aturen agama, la banci ia nggeleh anak biri-biri Paskah. E maka kalak Lewi si nggelehsa guna kalak si la bersih e, jenari ipersembahkenna anak biri-biri e man TUHAN.

¹⁸Tambah si e nterem kalak si reh i bas suku Eperaim, Manase, Isakar dingen Sebulon nari la ngelakoken pembersihen rikutken aturen agama. E maka irayakenna Paskah e la bagi arusna. Erkiteken si e ertoto Raja Hiskia guna kalak enda nina,

¹⁹“O TUHAN, Dibata nini-nini kami. Erkiteken kiniulinNdu, alemilah dosa kalak si nembah Kam alu bulat ukurna, aminna pe ia la bersih rikutken aturen agama.”

²⁰Ibegiken TUHAN pertoton Hiskia; ialemiNa dosa perpulungen e dingen la kena cilaka ibahanNa kalak e.

²¹Lit pitu wari dekahna rayat si pulung i Jerusalem e ngerayaken Wari Raya Roti si La Itama Ragi alu keriahen si mbelin. Janah tep-tep wari kalak Lewi ras imam-imam muji TUHAN alu kerina gegeh si lit i bas ia.

²²Ipujiken Hiskia kalak Lewi erkiteken kebeluhenna mabai kebaktin man TUHAN. Kenca pitu wari dekahna kalak enda mpersembahken persembahen pengataken bujur man TUHAN, Dibata nini-ninina.

²³Kerina ia setuju nerusken pesta e pitu wari nari. E maka erpesta kalak enda alu dem keriahen.

²⁴Isumbangken Raja Hiskia 1.000 jenggi lembu dingen 7.000 biri-biri man perpulungen e gelah igeleh man pangan. Pegawai-pegawai pe mereken 1.000 jenggi lembu dingen 10.000 biri-biri. Nterem kal imam-imam ikut mbersihken dirina rikutken aturen agama.

²⁵Kalak Juda, imam-imam, kalak Lewi, kalak Israel si reh i Utara nari, dingen bangsa si deban si tading i Israel dingen Juda, kerinana ermeriah ukur.

²⁶Kuta Jerusalem dem alu keriahen, erkiteken la pernah jadi bagenda kenca jaman Raja Salomo, anak Daud e.

²⁷Imam-imam ras kalak Lewi mindo man TUHAN gelah ipasu-pasuna perpulungen e. Dibata si ringan i Surga megiken pertotonna e.