Read Batak Karo 2 KRONIKA 32 Bible Online

2 KRONIKA 32 - Batak Karo bible

2 KRONIKA 32

¹Kenca kejadin-kejadin si ndai kerina, i ja Raja Hiskia teridah erkemalangen man TUHAN arah perbahanenna, reh Sanherip raja Assur merang Juda. Ikepungna kuta-kuta Juda si erbenteng jenari iperentahkenna tenterana ngerebutsa.

²Kenca idah Hiskia maka kuta Jerusalem pe iserang Sanherip atena,

³[3-4] Hiskia ras pegawai-pegawaina muat keputusen guna nutup kerina ingan lau i darat kuta Jerusalem, gelah alu bage bangsa Assur la dat lau adi ia enggo seh i deher Jerusalem. Ipinpin anak buahna nterem jelma ndarat kuta guna nutupi kerina ulu-ulu lau, seh maka lanai nari lit lau erburak i jenari.

⁵Ipeteguh raja benteng kuta alu pekena tembok-tembok si ceda, dingen majekken menara i babo tembok e. Tambah si e ipajekkenna ka pe tembok sada lapis nari arah darat. Jenari benteng si lit i babo taneh tambusen si arah Timur bagin kuta Jerusalem si dekah pe, ipekena. Lembing ras ampang-ampang melala kal ibahanna.

⁶Itamakenna kerina dilaki i bas kuta e i teruh perentah puanglima-puanglima tentera. Jenari isuruhna kalak enda pulung i kesain deherken pintu gerbang kuta. Nina man si pulung e,

⁷“Tetapkenlah ukurndu dingen teklah kam. Ola kam mbiar kempak raja Assur e ras man tentera si ipinpinna. Belinen kap gegeh si arah kita asangken gegeh si arah ia.

⁸I bas ia lit gegeh manusia, tapi arah kita lit TUHAN Dibatanta si nampati kita dingen erperang guna kemenangenta.” Tetap ukur rayat megi kata-kata si ibereken rajana.

⁹La asa kai dekahna kenca si e, asum Sanherip ras tenterana i Lakis denga, itenahkenna kata enda man Hiskia ras man kalak Juda si lit ras ia i Jerusalem nina,

¹⁰“Aku Sanherip, raja Assur, nungkun man bandu kerina, kai sabapna maka kam tetap pang tading i Jerusalem si sangana ikepung e.

¹¹Ntah erkiteken ikataken Hiskia man bandu maka ipulahi TUHAN Dibatandu kam pagi i bas kuasa kami nari? Itipu Hiskia kam e, dingen ipelepasna me kam mate la man dingen la minem.

¹²Ia kap si enggo ngeradasken ingan-ingan nembah man TUHAN ras batar-batarNa, jenari ikatakenna man kalak Juda ras kalak Jerusalem gelah nembah dingen nutung si merim-merim i bas sada batar-batar saja ngenca.

¹³La kin ietehndu kai si ibahan nini-niningku dingen si kubahan man bangsa-bangsa si deban? Isampati dibata-dibatana kin bangsa-bangsa si deban e gelah pulah i bas raja Assur nari?

¹⁴Pernah kin dibata-dibata i bas negeri-negeri si deban nampati ia gelah pulah i bas kami nari? Dage kai si erbahanca kam rukur maka dibatandu ngasup nampati kam?

¹⁵E maka genduari ola kam nggit itipu Hiskia ntah ibabaina papak. Ola kam tek man bana! Labo enggo lit dibata bangsa-bangsa si deban si enggo pernah ngasup mulahi bangsana i bas kuasa raja-raja Assur nari. Dage ugapa pe dibatandu e labo ngasup nampati kam!”

¹⁶Kata-kata si ibelasken utusen-utusen Assur e ndauh denga ka kasaren sanga ihinana TUHAN Dibata ras Hiskia suruh-suruhen TUHAN e.

¹⁷Surat si itulis raja Assur e pe tuhu-tuhu ngelawan TUHAN, Dibata Israel. Nina i bas surat e, “Dibata-dibata bangsa si deban la pernah ngasup nampati bangsana i bas kuasangku nari, e maka Dibata Hiskia pe labo ngasup nampati bangsana i bas aku nari.”

¹⁸Utusen Assur e erlebuh alu sora megang i bas cakap Heber gelah mbiar dingen lanai tetap ukur kalak Jerusalem si lit i datas tembok kuta, gelah alu bage lebih mesunah iakapna naluken kuta e.

¹⁹Dibata si isembah i Jerusalem bali pencakapkenna ras dibata-dibata bangsa-bangsa si deban, e me gana-gana bekas tan manusia erbahanca.

²⁰Kenca bage, Raja Hiskia ras Nabi Jesaya anak Amos, ertoto man Dibata janah erlebuh ia mindo penampat.

²¹Isuruh TUHAN sada malekat munuhi puanglima-puanglima ras tentera bangsa Assur e. E maka mulih raja Assur, mela kal iakapna. I bas sada wari sanga raja e lit i bas rumah pertoton dibata-dibatana, piga-piga anakna dilaki munuh ia alu pedang.

²²Bage me carana TUHAN mulahi Raja Hiskia ras kalak Jerusalem i bas kuasa Sanherip, raja Assur e, ras i bas musuh-musuhna si deban nari. TUHAN mere Israel nggeluh alu dame ras kerina negeri-negeri sekelewetna.

²³Nterem kalak reh ku Jerusalem maba persembahen-persembahen man TUHAN dingen maba pemere man Hiskia. E maka mulai i bas paksa e nari Raja Hiskia ihamati kerina bangsa-bangsa.

²⁴I bas paksa-paksa si e sakit Raja Hiskia dingen menam mate. Ertoto ia, jenari ibereken TUHAN man bana sada tanda maka penakitna banci malem.

²⁵Tapi perban gombangna Hiskia la ngataken bujur kerna kai si enggo ibahan TUHAN man bana. Erkiteken si e Juda ras Jerusalem terpaksa ngenanami kiniseran.

²⁶Tapi kedungenna Hiskia ras kalak Jerusalem peteruk bana, e maka la iukum TUHAN bangsa e kidekah Hiskia nggeluh denga.

²⁷Raja Hiskia enggo bayak kal, janah kerina kalak mehamat man bana. Ibahanna kamar-kamar man ingan nimpan erta-ertana, e me: emas, pirak, batu permata, rempah-rempah, ampang-ampang, ras barang-barang meherga si debanna.

²⁸Tambah si e ipajekkenna gudang-gudang man ingan nimpan gandum, anggur, ras minak saitun. Karang lembu ras karang biri-birina pe lit ibahanna.

²⁹Seakatan si enda ndai kerina, ibereken Dibata man bana biri-biri dingen lembu bage pe kebayaken si debanna si seh kal buena. Kota-kota pe melala ipantekina.

³⁰Raja Hiskia me si erbahan bendungen i bas ulu Lau Gihon jenari ipalerkenna lau e arah sada terowongen ku sada ingan i bas kuta Jerusalem. Hiskia sangap i bas kerina si idahikenna.

³¹Janah tupung utusen bangsa Babilon reh nungkuni Hiskia kerna kejadin kuga maka Hiskia malem i bas penakitna nari secara luar biasa, ipelepas Dibata si Hiskia si sada ngelakoken bagi atena lako nguji ukurna.

³²Kerina si deban si ilakoken Raja Hiskia dingen kekelengenna man TUHAN isuratken i bas Pengenehenen Nabi Jesaya anak Amos bage pe i bas Sejarah Raja-raja Juda ras Raja-raja Israel.

³³Mate Hiskia, jenari ikuburken i bas bagin si arah datasna i bas kuburen raja-raja. Kerina kalak Juda ras Jerusalem mereken kehamaten man bana tupung ia mate. Anakna Manase nggantiken ia jadi raja.