Read Batak Karo 2 KRONIKA 34 Bible Online

2 KRONIKA 34 - Batak Karo bible

2 KRONIKA 34

¹Josia umur waluh tahun tupung ia jadi raja Juda. Jenari merentah ia i Jerusalem telu puluh sada tahun dekahna. [58†]

²Ilakokenna kai si ngena ate TUHAN. Iusihna perbahanen nini-ninina Raja Daud, janah alu tutus iikutkenna kerina Undang-undang Dibata.

³I bas tahun pewaluhken kenca Josia jadi raja, tupung ia nguda denga kal, ia mulai nembah man Dibata nini-ninina Raja Daud. Empat tahun kenca si e ia mulai ngeruntuhken ingan-ingan ersembah man berhala-berhala, gana-gana Dewi Asera bage pe kerina gana-gana si deban.

⁴Arah perentahna iruntuhken anak buahna batar-batar ingan ersembah man Baal, janah batar-batar ingan nutung si merim-merim si ndeher i je pe irontaskenna. Iripukkenna jadi abu gana-gana Dewi Asera bage pe gana-gana si deban jenari icaburkenna abu e ku babo kuburen kalak si enggo mereken persembahen man gana-gana e. [59†]

⁵Itutungna tulan-tulan imam-imam perbegu i babo batar-batar inganna ersembah. Alu ngelakoken kerina si e, ibahanna Juda ras Jerusalem mulihken bersih rikutken aturen agama. [60†]

⁶Bage ka nge perbahanenna i bas kuta-kuta si enggo radas i daerah-daerah Manase, Eperaim bage pe Simeon seh ku Naptali i Utara.

⁷I belang-belang daerah Kerajan Utara iruntuhkenna batar-batar ras gana-gana Asera, iripukkenna gana-gana e jadi abu, janah iperperkenna kerina batar-batar ingan mpersembahken si merim-merim. Kenca bage mulihken ia ku Jerusalem.

⁸I bas pesepuluh waluh tahunken pemerentahen Josia kenca enggo ibersihkenna negeri ras Rumah Pertoton alu pengadi persembahen man berhala, isuruh Raja Josia telu kalak lako pehuli Rumah Pertoton TUHAN Dibata. Kalak si telu e, e me: Sapan anak Asalia, Maaseia, gubernur Jerusalem, ras Joah anak Joahas, sekalak pegawai tinggi.

⁹Duit si enggo ipepulung kalak Lewi, e me pengawal-pengawal Rumah Pertoton, enggo ibereken kempak Imam si Mbelin. (Duit e ipepulung i bas kalak Eperaim, Manase ras kalak si deban i Kerajan Utara bage pe i bas kalak Juda, Benyamin ras Jerusalem nari.)

¹⁰Duit e ibereken man kalak si telu si ertanggung jawab pekena Rumah Pertoton e, jenari si telu kalak e mereken duit e man

¹¹tukang-tukang kayu ras pemborong-pemborong guna nukur batu dingen kayu-kayu si ipergunaken guna pekena bangunen-bangunen si enggo ipelepas raja-raja Juda ceda.

¹²Kalak si ndahiken dahin e tuhu-tuhu bujur. Si ngawasi dahin kalak enda e me empat kalak Lewi e me: Jahat ras Obaja i bas terpuk Merari nari, Sakaria ras Mesulam i bas terpuk Kohat nari. (Kalak Lewi enda kerina kalak si beluh main musik.)

¹³Kalak Lewi si deban ertanggung jawab i bas ngangkat bahan-bahan bangunen e, dingen jadi pengawas kalak si erdahin i bas dahin si melala erbagena. Kalak Lewi si debanna jadi juru tulis ntah pe jadi pengawal.

¹⁴Tupung duit e ipedarat i bas ingan penimpanenna nari, Hilkia ndat kitap Undang-undang TUHAN, Undang-undang si enggo ibereken Dibata man Musa.

¹⁵Nina Hilkia man Sapan, “Enggo kudat kitap Undang-undang e i bas Rumah Pertoton enda.” Ibereken Hilkia kitap e kempak Sapan,

¹⁶jenari iendesken Sapan man raja. Nina Sapan kempak raja, “Enggo ilakoken kami kerina si iperentahkenndu.

¹⁷Enggo ibuat kami duit si ibuniken i bas Rumah Pertoton, dingen enggo ibereken kami kempak si erdahin ras pengawas.”

¹⁸Kenca bage nina tole, “Enda lit sada kitap ibereken Hilkia man bangku.” Jenari iogekenna isi kitap e kempak raja.

¹⁹Megi isi kitap e, icaingken raja uisna perban ceda atena.

²⁰Kenca bage iperentahkenna man Hilkia, Ahikam anak Sapan, Abdon anak Mikaya, Sapan sekretaris kerajan, ras man Asaya pelayan raja nina,

²¹“To sungkun TUHAN kerna aku dingen kerna bangsa si tading denga i Israel ras Juda. Oratilah kerna pengajaren-pengajaren si lit i bas kitap enda. Nembeh TUHAN kempak kita erkiteken nini-nininta la ngikutken kata TUHAN dingen la ngelakoken kai si ikataken i bas kitap enda.”

²²Sue ras perentah raja, Hilkia ras kalak si deban lawes nungkun Hulda, sekalak nabi diberu si ringan i bas bagin kuta si mbaru i Jerusalem. (Perbulangenna, Salum gelarna, e me anak Tikwa kempu Harhas; ia me si ngurus paken-paken i bas Rumah Pertoton.) Ituriken kalak enda man bana kai si enggo jadi,

²³jenari isuruh Hulda ia kerina mulihken ndahi raja guna nehken

²⁴berita enda i bas TUHAN nari nina, “Kuukum ateKu Jerusalem ras kerina pendudukna alu sumpah si tersurat i bas kitap si enggo iogeken kempak raja e.

²⁵Enggo itulakna Aku dingen enggo ipersembahkenna persembahen-persembahen man dibata-dibata si deban. E maka keke rawangKu erkiteken kerina si enggo ibahanna e. Nembeh Aku man Jerusalem janah rawangKu e la terpepalem.

²⁶Kerna raja e jine, enda me katangKu, Aku TUHAN Dibata Israel: Ibegikenndu kai si tersurat i bas kitap e,

²⁷jenari erkadiola kam janah ipeterukndu bandu i adep-adepenKu. Icaingkenndu uisndu jenari tangis kam tupung ibegindu kuga ancamenKu guna ngukum Jerusalem ras rayatna. Enggo Kubegi pertotondu.

²⁸E maka ukumen si ateKu Kubereken man Jerusalem langa Kusehken ngayak kam mate. Kupelepas kam mate i bas dame.” Mulih persuruhen e ndahi Raja Josia maba berita enda.

²⁹Kenca bage ipepulung Raja Josia kerina peminpin-peminpin Juda ras Jerusalem,

³⁰jenari ras ia bengket ku bas Rumah Pertoton, itemani kerina imam-imam ras kalak Lewi bage pe kerina rayat subuk bayak bage pe musil. I lebe-lebe kalak enda kerina, iogeken raja kerina isi kitap perpadanen si idat i bas Rumah Pertoton e.

³¹Tedis ia i bas ingan raja jenari ibahanna sada perpadanen ras TUHAN guna patuh man baNa, tetap ngikutken undang-undangNa ras perentah-perentahNa alu bulat ukur dingen ilakokenna atena tuntunten-tuntuten si enggo iikutken ku bas perpadanen e, rikutken si enggo isuratken i bas kitap e.

³²Kalak Benyamin ras kerina kalak si deban si reh ku Jerusalem isuruhna erpadan ngikutken tuntuten perpadanen si enggo ibahanna ras Dibata nini-ninina.

³³Raja Josia ngeradasken kerina gana-gana si mbau si lit i bas daerah sikerajangen kalak Israel, e maka kidekah geluhna isuruhna kalak Israel nembah man TUHAN, Dibata nini-ninina.