Read Batak Karo 2 KRONIKA 35 Bible Online

2 KRONIKA 35 - Batak Karo bible

2 KRONIKA 35

¹Raja Josia ngerayaken Paskah i Jerusalem lako pemuliaken TUHAN. I bas pesepuluh empat wariken bulan si pemena igelehna asuh-asuhen guna pesta e.

²Ibagikenna tugas man imam-imam si arus ilakokenna i bas Rumah Pertoton jenari iberekenna semangat man bana gelah tutus ia kerina ndahiken dahinna.

³Perentah enda pe iberekenna man kalak Lewi, e me guru-guru Israel, si enggo ikhususken guna TUHAN nina, “Tamaken Peti Perpadanen si badia e i bas Rumah Pertoton si enggo ipajekken Raja Salomo, anak Daud. Lanai perlu ipindah-pindahkenndu Peti e, tapi erdahinlah guna TUHAN Dibatandu dingen guna bangsaNa Israel.

⁴Buat inganndu i bas Rumah Pertoton rikutken terpukndu, rikutken tanggung jawab si enggo itetapken Raja Daud ras anakna Raja Salomo man bandu. [61†]

⁵Janah aturkenlah pembagin tugasndu e maka piga-piga kalak i bas kam banci tetap sikap nampati tiap keluarga kalak Israel.

⁶Kam me si nggeleh anak biri-biri ras kambing guna Paskah e. E maka genduari bahanlah maka kam bersih rikutken aturen agama jenari sikapkenlah persembahen-persembahen gelah senina-seninandu kalak Israel banci ngikutken perentah-perentah si enggo iberekenNa arah Musa.”

⁷Guna keperlun rayatna i bas ngerayaken Paskah e isumbangken Raja Josia i bas rarasen asuh-asuhenna nari 30.000 biri-biri, anak biri-biri, ras kambing, ras 3.000 jenggi lembu.

⁸Pegawai-pegawaina pe mereken sumbangen man guna keperlun rayat, imam-imam ras kalak Lewi. Pengurus-pengurus Rumah Pertoton, e me Imam si Mbelin Hilkia, Sakaria ras Jehiel, mereken man imam-imam e 2.600 anak biri-biri ras kambing si nguda denga bage pe telu ratus jenggi lembu guna ipersembahken kidekah pesta e.

⁹Peminpin-peminpin kalak Lewi, e me Konania, Semaya, ras seninana Netanel, Hasabia, Jeiel dingen Josabat, isumbangkenna man kalak Lewi 5.000 anak biri-biri ras anak kambing bage pe 500 jenggi lembu guna ipersembahken jadi persembahen-persembahen.

¹⁰Kenca kerina enggo ratur guna ngerayaken Paskah e, imam-imam ras kalak Lewi ngiani inganna sue ras perentah raja.

¹¹Kenca anak biri-biri ras kambing e enggo dung igeleh, kalak Lewi ngkulitisa, janah imam-imam mirpirken darehna i babo batar-batar e.

¹²Kenca bage ibagi-bagikenna man rayat rikutken terpuk keluargana, gelah alu bage perpulungen e banci mpersembahken asuh-asuhen e sue ras si iperentahken i bas Undang-undang Musa.

¹³Kenca bage itutung kalak Lewi persembahen Paskah e i bas api, sue ras peraturen, jenari nanggerken persembahen khusus tare kudin ras belanga, e maka ibagi-bagikenna man jelma si nterem. [62†]

¹⁴Kenca bage maka isikapken kalak Lewi sikerajangenna ras kerajangen imam-imam kesusuren Harun. Sabap, seh ngayak berngi erdahin ia terus mpersembahken persembahen tutungen dingen nutungi tabeh-tabeh persembahen e.

¹⁵Pemain musik i bas terpuk Asap i bas suku Lewi, tetap ertugas sue ras si nitetapken Raja Daud. Enda me gelar-gelarna: Asap, Heman, ras Jedutun imam raja. Si engkawal pintu-pintu gerbang labo pada nadingken ingan jaga sabap banci nge ia ngerayaken Paskah alu isampati kalak si deban. [63†]

¹⁶I bas wari e ilakoken kalak enda kerina sue ras perentah Raja Josia kerna Paskah, subuk persembahen i bas batar-batar.

¹⁷Pitu wari dekahna kalak Israel ngerayaken Paskah ras ngerayaken Wari Raya Roti si La Itama Ragi. [64†]

¹⁸Kenca Nabi Samuel lanai pernah irayaken Paskah bagenda. Ope si e pe la pernah lit raja-raja ngerayaken Paskah bagi si nirayaken

¹⁹i bas abad pesepuluh waluhken pemerentahen Josia enda subuk raja jine ras imam-imam, kalak Lewi, kalak Juda ras Israel bage pe kalak Jerusalem.

²⁰Kenca Raja Josia ngelakoken kerina e guna Rumah Pertoton, ipinpin raja Mesir Neko, pasukenna erperang i Karkemis deher Lau Eprat. Icuba Josia ngolangisa,

²¹tapi itenahken Neko berita enda man Josia nina, “Perang enda labo ras kam raja Juda! Aku reh labo ngelawan kam, tapi ngelawan musuh-musuh ku janah Dibata nge si nuruh aku gelah pedas-pedas kulakoken. Dibata kap ras Aku, e maka ola olangi Ia gelah ola kam kernep ibahanNa.”

²²Tapi Josia tetap ngelawan, la ia nggit ngikutken kata Dibata arah Raja Neko. Josia menyamar erperang ku Baluren Megido.

²³I bas perang e, kena panah Raja Josia. E maka isuruhna suruh-suruhen maba ia ndarat sabap mekelek lukana.

²⁴Suruh-suruhen e ngangkat ia i bas geretana nari ku gereta si deban, jenari ibabana ku Jerusalem. I jah mate ia jenari ikuburken ku kuburen raja-raja. Kerina kalak Juda ras Jerusalem erceda ate perbahan kematenna.

²⁵Nabi Jeremia erbahan sada ende-enden perngandungen guna Raja Josia. Seh ngayak genduari ipake perende-ende denga ende-enden e i Israel subuk dilaki ntah diberu, i bas peringet-ingeten kerna kematen Josia. Ende-enden e enggo ipersada ku bas ende-enden perngandungen.

²⁶Turi-turin si deban kerna Josia, kerna keleng atena man TUHAN, kinipatuhenna ngikutken Undang-undang TUHAN.

²⁷Kerina sejarah geluhna mula-mula nari seh kedungenna isuratken i bas kitap Sejarah Raja-raja Israel ras Raja Juda.