Read Batak Karo 2 KRONIKA 4 Bible Online

2 KRONIKA 4 - Batak Karo bible

2 KRONIKA 4

¹Isuruh Raja Salomo erbahan batar-batar tembaga; ukurenna e me: siwah meter gedangna ras belangna, dingen ganjangna empat setengah meter. [12†]

²Ibahanna pe tong tembaga bulat, ukurenna e me 2,2 meter bagesna, 4,4 meter garis tengahna, dingen 13,2 meter kelilingna.

³Tong e arah darat ililet alu dua baris hiasen, sada i babo si debanna. Bentuk hiasen e bagi lembu, si ituang ersada ras tong e kerina.

⁴Tong e iamparken i babo sepuluh dua lembu tembaga si ngala ku darat; tiap telu lembu ngadap kempak tiap jurusen.

⁵Tong e kapalna pitu setengah meter. Biberna bagi cangkir, lempir ku darat bagi rudang. Isina kira-kira 50.000 liter.

⁶Ibahan pe sepuluh baskom, lima baskom itamaken arah Selatan Rumah Pertoton dingen lima arah Utara. Baskom e ipake guna murihi bagin-bagin asuh-asuhen si itutung jadi persembahen. Lau si i bas tong si galang e guna ipake man perburihen imam-imam. [13†]

⁷ [7-8] Ibahan sepuluh nahe lampu rikutken bentuk si enggo itetapken, dingen sepuluh meja, jenari itamakenna barang-barang e i bas ruang pematang Rumah Pertoton. Lima nahe lampu ras lima meja arah kawes ras lima arah kemuhen. Ibahan pe seratus mangkuk emas. [14†] [15†]

⁹Guna imam-imam ibahan kesain arah darat ras arah bas Rumah Pertoton e. Pintun-pintun i bas pintu gerbang kesain e, ilapisi alu tembaga.

¹⁰Tong e itamaken i bas suki Rumah Pertoton e.

¹¹ [11-16] Piga-piga belanga, mangkuk, skop pe ibahan Huram ka. Alu bage enggo idungina dahin si enggo ipadankenna man Raja Salomo guna Rumah Pertoton e. Alat-alat e me: Dua tiang. Dua takal tiang si tempasna bagi mangkuk i datas tiap tiang. Dua rante si ibayu jadi hiasen tiap takal tiang. Empat ratus buah delima tembaga isusun i bas dua baris sekelewet takal tiang e. Sepuluh gereta. Sepuluh baskom. Sada tong. Sepuluh dua lembu tembaga natang tong e. Piga-piga belanga, sendok ras garpu. Huram tukang si beluh mahan kerina alat-alat enda i bas tembaga si erndilap nari, sue ras si enggo iperentahken Raja Salomo, guna ipake i bas Rumah Pertoton TUHAN.

¹⁷Kerina barang-barang ndai ituang raja kelang-kelang Sukot ras Sereda i Baluren Lau Jordan.

¹⁸Perbahan bage buena alat-alat si ibahan e, lanai ieteh berat tembaga si ipake.

¹⁹Alat-alat i bas emas nari pe ibahan Salomo guna Rumah Pertoton e, e me: batar-batarna, piga-piga meja guna ingan roti si ipersembahken man Dibata;

²⁰kerina nahe lampu ras lampuna, ibahan i bas emas murni nari, si isagan i adep-adepen Ingan si Badiana kal, sue ras rencana;

²¹hiasen, si tempasna bagi bunga, lampu-lampu, ras jepit-jepit rara;

²²perkakas guna nimpeti lampu-lampu e, mangkuk-mangkuk, pinggan guna ingan si merim-merim, ingan rara. Kerina alat-alat enda ibahan i bas emas murni nari. Pintun-pintun Rumah Pertoton e, si arah darat ras pintun-pintun ku Ingan si Badiana kal ilapisi alu emas.