Read Batak Karo 2 KRONIKA 5 Bible Online

2 KRONIKA 5 - Batak Karo bible

2 KRONIKA 5

¹Kenca Raja Salomo enggo dung ndahiken kerina dahin guna Rumah Pertoton e, kerina barang-barang si enggo ipersembahken bapana Daud, e me pirak, emas ras barang-barang si debanna, itamakenna ku bas gudang Rumah Pertoton. [16†]

²Kenca bage ipepulung Raja Salomo kerina peminpin suku ras peminpin terpuk Israel ku Jerusalem gelah maba Peti Perpadanen TUHAN i Sion, i Kuta Daud nari ku Rumah Pertoton. [17†]

³Kerina pulung i bas paksa Wari Raya Sapo-sapo.

⁴Kenca peminpin e enggo pulung kerina, iangkat kalak Lewi Peti Perpadanen e,

⁵ibabana ku bas Rumah Pertoton. Kemah Perjumpan ras kerina alat-alatna pe ipindahken imam-imam ras kalak Lewi ku Rumah Pertoton e.

⁶Raja Salomo ras bangsa Israel pulung i lebe-lebe Peti Perpadanen mpersembahken biri-biri, ras lembu si lanai lang-lang buena, lanai terbeligai.

⁷Kenca bage ilanja imam-imam Peti Perpadanen TUHAN ku bas Rumah Pertoton, iamparkenna i bas Ingan si Badiana kal i teruh gana-gana mahluk si erkabeng.

⁸Kabeng gana-gana mahluk-mahluk e kimbang nutupi Peti ras lanja-lanja Peti e.

⁹Ujung lanja-lanja Peti Perpadanen e ise pe banci ngidahsa adi ia tedis petingtang i lebe-lebe Ingan si Badiana kal, tapi la teridah i bas ingan si deban nari. (Lanja-lanja e i je denga seh genduari.)

¹⁰La lit kai pe i bas Peti Perpadanen e seakatan dua papan batu si ibaba Musa i bas Deleng Sinai nari, asum TUHAN erbahan perpadanen ras bangsa Israel sanga bangsa e ndarat i Mesir nari. [18†]

¹¹ [11-14] Kerina imam i je, la erpilihen i bas terpuk si apai nari pe ia, enggo ibersihkenna dirina rikutken aturen agama. Bage pe kerina pemain musik kalak Lewi -- Asap, Heman, ras Jedutun ikut ras kerina anggota terpukna -- make baju si ibahan i bas uis lenen nari. Kalak Lewi e tedis arah Timur batar-batar janahna njemak ceracak ras kulcapi. I je lit seratus dua puluh imam ngembus terompet. Si rende iikuti sora terompet, ceracak ras gendang si debanna, ersada kal kerina sorana. Ipujina TUHAN alu rende nina, “Pujilah TUHAN sabap kiniulinNa, dingen keleng ateNa tetap asa lalap.” Asum imam-imam nandangi nadingken Rumah Pertoton e, rempet dem embun i bas Rumah Pertoton e, e maka lanai terterusken imam-imam e kebaktin ndai, sabap kemulian TUHAN ndemi Rumah Pertoton e. [19†] [20†]