Read Batak Karo 2 KRONIKA 7 Bible Online

2 KRONIKA 7 - Batak Karo bible

2 KRONIKA 7

¹Kenca Raja Salomo ndungi pertotonna, nusur api i langit nari, ipanna persembahen si enggo ipersembahken e, jenari sinalsal kemulian TUHAN ndemi Rumah Pertoton e. [26†]

²Erkiteken Rumah Pertoton enggo dem alu sinalsal kemulian TUHAN, e maka imam-imam e lanai banci bengket ku bas.

³Kenca idah kalak Israel api e nusur i langit nari dingen sinalsal kemulian TUHAN ndemi Rumah Pertoton e, erjimpuh ia kerina ayona seh ku taneh. Isembah dingen ipujina Dibata erkiteken kiniulin ras keleng ateNa si la erkeri-kerin. [27†]

⁴Kenca bage Salomo ras kerina bangsa e erbahan persembahen man TUHAN.

⁵Ipersembahken Salomo 22.000 lembu dingen 120.000 biri-biri jadi persembahen persadan. Alu bage ia ras kerina bangsa Israel nangkuhken Rumah Pertoton e.

⁶Imam-imam tedis i bas ingan si enggo itetapken janah i lebe imam-imam e tedis kerina kalak Lewi. Ipujina TUHAN alu alat-alat musik si enggo isikapken Daud janah ngendeken ende-enden “KekelengenNa si la erkeri-kerin”, sue ras si enggo itugasken Daud. Kerina imam-imam e ngembus terompet sedangken kerina perpulungen pe tedis.

⁷I tengah-tengah kesain e, arah bagin lebe Rumah Pertoton e, si ipebadiaken Salomo, ipersembahkenna i je kerina persembahen tutungen, persembahen buah gandum, dingen tabeh-tabeh i bas persembahen persadan nari. Ilakokenna e, erkiteken batar-batar tembaga si enggo ibahanna e kitiksa man ingan kerina persembahen e.

⁸I bas paksa e irayaken Salomo ras kerina bangsa e wari Raya Sapo-sapo, dekahna lit pitu wari. Seh kal teremna jelma pulung, menaken i bas dalan kempak ku Hamat i Utara dingen perbalengen Mesir i Selatan.

⁹Pitu wari dekahna kalak ndai nangkuhken batar-batar e, janah kenca bage pitu wari nari ka guna ngerayaken wari Raya Sapo-sapo e. I bas wari pendungi ibahanna penutupen pesta e,

¹⁰e maka pepagina wari si pedua puluh teluken bulan si pepituken isuruhna perpulungen e mulih. Meriah kal iakapna kerna pasu-pasu si enggo ibereken TUHAN man bangsaNa Israel, man Daud ras man Salomo.

¹¹Kenca Raja Salomo dung erbahan Rumah Pertoton e ras istanana, dingen enggo genep sue ras si enggo isura-surakenna,

¹²icidahken TUHAN baNa man Salomo berngi e. Nina, “Enggo Kubegi pertotonndu dingen Kualoken Rumah Pertoton e jadi ingan mpersembahken persembahen man bangKu.

¹³Adi la Kubereken udan, ntah adi Kusuruh labang mangani sinuan-sinuan, ntah adi Kubereken penakit laya-laya man bangsangKu,

¹⁴adi ertoto ia man bangKu dingen erkadiola ia jenari itadingkenna si jahat si enggo ibahanna, Kubegiken pertotonna i Surga nari, Kualemi dosa-dosana, jenari Kubahan ka maka mehumur mulihken tanehna.

¹⁵Aku si mperdiateken Rumah Pertoton enda, dingen Aku enggo ersikap megikenca kerina pertoton si itotoken i jenda,

¹⁶sabap enggo Kupilih dingen Kupebadiaken ingan e jadi ingan ersembah man bangKu seh rasa lalap.

¹⁷Adi patuh kam nembah Aku bali ras si enggo ibahan bapandu, ipatuhindu undang-undangKu, idalankenndu kerina si Kuperentahken man bandu,

¹⁸adi bage Kucikep padan si enggo Kubahan ras bapandu Daud sanga Kukataken man bana, maka Israel tetap iperentah kesusurenna. [28†]

¹⁹Tapi kune pagi kam ntah bangsandu la ngikutken undang-undang e ras perentah-perentah si enggo Kubereken man bandu, jenari nembah kam man dibata-dibata si deban,

²⁰adi bage Kupelawes kam i bas negeri si enggo Kubereken man bandu enda nari, dingen Kutadingken Rumah Pertoton enda si enggo Kupebadiaken jadi ingan ersembah man bangKu. I japa pe Rumah Pertoton jadi kuan-kuan dingen ciga ate kalak man bana.

²¹Rumah Pertoton si genduari e ipehaga tuhu-tuhu tapi denggo asa kalak si mentas arah e mamang atena dingen nungkun ia nina, ‘Engkai maka bage ibahan TUHAN man negeri enda ras man Rumah Pertoton enda?’

²²Ijabap kalak me pagin nina, ‘Erkiteken bangsa Israel enggo nadingken TUHAN Dibatana, si enggo maba nini-ninina ndarat i Mesir nari. Leket ukurna man dibata-dibata si deban dingen nembah ia man bana. E me sabapna maka ibereken TUHAN mara si mbelin e man bangsa Israel enda.’ ”