Read Batak Karo 2 KRONIKA 8 Bible Online

2 KRONIKA 8 - Batak Karo bible

2 KRONIKA 8

¹Dua puluh tahun dekahna Salomo ndungi Rumah Pertoton ras istanana.

²Ipekenana pe mulihi kuta-kuta si ibereken Raja Hiram man bana janah isuruhna kalak Israel ringan i je.

³Ibuatna daerah Hamat-Soba,

⁴jenari ibahanna benteng kuta Tadmor i gurun pasir. Ipekenana mulihi kerina kuta Hamat si jadi lumbung perbekalen.

⁵Kota-kota si tersena arah teruh enda pe ipekena Salomo mulihken, e me: Bet Horon Gugung ras Bet Horon Berneh (kuta-kuta si lit bentengna dingen pintu-pintu gerbangna banci ieruk),

⁶kuta Baalat, ras kerina kuta-kuta si ijadikenna lumbung perbekalen, ras kerina kuta-kuta si jadi ingan kuda ras gereta kudana. Idalankenna kerina rencanana guna majekken Jerusalem, Libanon ras kerina daerah jajahenna.

⁷[7-8] Isuruhna kerja paksa kerina kesusuren bangsa Kanaan si la ibunuh bangsa Israel tupung e naluken negeri e. Bangsa-bangsa e, atan pe bangsa Heti, Amori, Peris, Hewi ras bangsa Jebusi. Kesusuren bangsa-bangsa e terus jadi budak Israel seh paksa enda.

⁹Kalak Israel la isuruh kerja paksa, tapi jadi tentera, jadi perajurit, jadi komendan pasuken erkuda dingen jadi pasuken si ngersak kuda.

¹⁰Lit 250 kalak kepala si ngaturken kerja paksa erdahin i erbage-bage pembangunen.

¹¹Ipiser Salomo kemberahenna putri raja Mesir, i Kuta Daud nari ku istana si enggo ibahanna guna kemberahenna e. Nina Salomo, “La banci kemberahenku tading i istana Daud raja Israel, erkiteken kerina ingan si enggo jadi ingan Peti Perpadanen e badia kap.”

¹²Ipersembahken Salomo persembahen man TUHAN i babo batar-batar si enggo ipajekkenna i lebe-lebe Rumah Pertoton e.

¹³Ipersembahkenna persembahen tutungen sue ras aturen-aturen i bas Undang-undang Musa guna wari raya e me: wari Sabat, Wari Raya Bulan Mbaru, wari raya si telu kali sada tahun e me: Wari Raya Roti si La Itama Ragi, Wari Raya Peranin, Wari Raya Sapo-sapo. [29†]

¹⁴Sue ras peraturen si enggo itetapken bapana Daud, itetapken Salomo pendahin imam-imam si tep-tep wari dingen pendahin kalak Lewi si ngendeken ende-enden pujin ras nampati imam-imam e i bas ndahiken dahinna. Iaturkenna pe pengawal i bas pintu gerbang ndahiken dahinna tep-tep wari njaga pintu gerbang, sabap bage enggo iperentahken Daud, suruh-suruhen Dibata e.

¹⁵Peraturen-peraturen si ibereken Daud man imam-imam ras kalak Lewi kerna gudang-gudang ras perkara-perkara si debanna idalanken seh ku si kitik-kitikna.

¹⁶Mulai i bas ncibalken palas Rumah Pertoton seh dung kerina dahin e erdalan alu mehuli. E maka genduari kerina pendahin Salomo enggo erlayas.

¹⁷Kenca bage lawes Salomo ku Esiongeber ras Elat pelabuhen i tepi Teluk Akaba, i negeri Edom.

¹⁸Ikirem Raja Hiram man Salomo piga-piga kapal. Kerina kapten kapal e pegawai Raja Hiram, janah anak buahna pelaut-pelaut si erpengalemen. Kalak enda erlayar ras pegawai-pegawai Salomo ku negeri Opir, dingen i jah nari ibabana man Salomo lebih sepuluh lima ribu kilo emas.