Read Batak Karo ESRA 10 Bible Online

ESRA 10 - Batak Karo bible

ESRA 10

¹Asum Esra sanga mungkuk denga ertoto janahna tangis ras ngakuken dosa-dosa i lebe-lebe Rumah Pertoton e, reh ngkeleweti Esra nterem kalak Israel subuk dilaki, diberu ras danak-danak. Kerina tangis kesi-kesi.

²Kenca bage nina Sekanya anak Jehiel, anggota terpuk Elam, man Esra, “Kami lanai setia man Dibata. Iempoi singuda-nguda bangsa si deban, tapi amin bage gia, lit denga nge arapen man Israel.

³Genduari arus kami erbahan perpadanen ras Dibata kami maka ipelawes kami diberu-diberu e ras anak-anakna. Kai si ipedahkenndu ras kalak si deban si ngergai perentah-perentah Dibata, arus ilakoken kami. Uga nina Undang-undang Dibata, bage ilakoken kami.

⁴Kamlah lebe ngelakokenca. Kami mihak kam. Ota silakoken!”

⁵E maka ibenai Esra nuruh pengulu imam-imam kalak Lewi, ras pengulu-pengulu bangsa ersumpah ngelakoken si iusulken Sekanya.

⁶Kenca bage lawes Esra i lebe-lebe Rumah Pertoton e nari ku kamar Johanan anak Eliasip, janah erberngi ia i je, la man la minem, sabap ceda atena erkiteken kalak buangen si enggo mulih e la setia man Dibata.

⁷Kenca bage imomoken ku belang-belang Jerusalem ras Juda maka kerina kalak si enggo mulih i bas buangen e nari arus pulung i Jerusalem.

⁸Sue ras perentah pengulu-pengulu bangsa e, ise la reh kenca telu wari maka kerina ertana ibuat, janah bene hakna jadi anggota perpulungen e.

⁹E maka i bas si telu wari e, i bas wari dua puluh bulan si pesiwahken, kerina dilaki si ringan i daerah Juda ras Benyamin reh ku Jerusalem jenari pulung i kesain Rumah Pertoton. Kerinana ia nggirgir, subuk erkiteken pentingna perjumpan e bage pe erkiteken udan si meder paksa e.

¹⁰E maka tedis Imam Esra, jenari nina man kalak ndai, “Kam enggo lanai setia janah ibabandu kesalahen kempak Israel alu ngempoi singuda-nguda bangsa si deban.

¹¹Dage genduari akukenlah dosa-dosandu man TUHAN, Dibata nini-ninindu, jenari lakokenlah kai si ngena ateNa. Serapkenlah dirindu i bas bangsa-bangsa si deban nari si ringan i bas negerinta janah ulihkenlah ndeharandu bangsa si deban e.”

¹²E maka ngaloi kalak ndai alu sora megang nina, “Uga nindu, bage ilakoken kami!”

¹³Tapi nina ka tole, “Kita si pulung seh kal kap teremna, janah udan pe meder. Adi bage labo ise pe ngasup tedis i darat. Perkara enda labo terdungi i bas sada tah dua wari sabap nterem kami sandit i bas dosa enda.

¹⁴Pengulu-pengulu kami sajalah tading i Jerusalem ngurus perkara enda, janah kalak si lit ndeharana bangsa si deban suruh ngadap i bas paksa si enggo itetapken radu ras pengulu-pengulu bage pe hakim-hakim si lit i bas kutana. Alu bage nilah me rawa Dibata i bas perkara enda.”

¹⁵La lit ise pe si nimbak rencana enda seakatan Jonatan anak Asahel ras Jahseya anak Tikwa si ikapiti Mesulam ras si Sabbetai sekalak kalak Lewi.

¹⁶Kalak buangen si enggo mulihken e sada perarih kerna rencana e. E maka itangkuhken Esra kalak i bas pengulu-pengulu terpuk e jenari isuratkenna gelarna sada-sada. I bas wari pemena bulan si pesepuluhken ibenakenna mereksa perkara e,

¹⁷janah i bas jangka telu bulan enggo irunggui kalak ndai kerina perkara dilaki si ngempoi diberu bangsa si deban.

¹⁸Enda me gelar-gelar dilaki si ndeharana diberu bangsa si deban: Imam-imam, isuratken rikutken terpukna: I bas terpuk Josua ras senina-seninana, anak-anak Josadak nari e me: Maaseya, Elieser, Jarib, ras Gedalya.

¹⁹Kalak enda erpadan ngulihken ndeharana jenari ipersembahkenna sada bajar biri-biri jadi sada persembahen erkiteken dosa-dosana.

²⁰I bas terpuk Immer nari e me: Hanani ras Sebadia.

²¹I bas terpuk Harim nari e me: Maaseya, Elia, Semaya, Jehiel, ras Usia.

²²I bas terpuk Passur nari e me: Elyoenai, Maaseya, Ismael, Natanael, Josabat, ras Elasa.

²³ Kalak Lewi: Josabat, Simei, Kelaya (igelari ka pe Kelita), Petahia, Juda, ras Elieser.

²⁴ Pemain musik: Eliasip. Pengawal Rumah Pertoton: Saleum, Telem, ras Uri.

²⁵ Si debanna: I bas terpuk Paros nari e me: Ramia, Issia, Malkia, Miyamin, Eleasar, Malkia, ras Benaya.

²⁶I bas terpuk Elam nari e me: Mattania, Sakaria, Jehiel, Abdi, Jeremot, ras Elia.

²⁷I bas terpuk Sattu nari e me: Elyoenai, Eliasip, Mattania, Jeremot, Sabat ras Asisa.

²⁸I bas terpuk Bebai nari e me: Johanan, Hanania, Sabbai, ras Atelai.

²⁹I bas terpuk Bani nari e me: Mesullam, Malluk, Adaya, Jasup, Seal, ras Jeremot

³⁰I bas terpuk Pahat Moap nari e me: Adna, Kelal, Benaya, Maaseya, Mattania, Besalel, Binnui, ras Manase.

³¹ [31-32] I bas terpuk Harim nari e me: Elieser, Issia, Malkia, Semaya, Simeon, Benyamin, Malluk, ras Semaria.

³³I bas terpuk Hasum nari e me: Mattenai, Mattatta, Sabat, Elipelet, Jeremai, Manase, ras Simei.

³⁴ [34-37] I bas terpuk Bani nari e me: Maadai, Amram, Uel, Benaya, Bedeya, Keluhi, Wania, Meremot, Eliasip, Mattania, Mattenai, ras Jaasu.

³⁸ [38-42] I bas terpuk Binnui nari e me: Simei, Selemia, Natan, Adaya, Maknadebai, Sasai, Sarai, Asarel, Selemia, Semaria, Sallum, Amaria, ras Jusup

⁴³I bas terpuk Nebo nari e me: Jeyel, Mattitia, Sabat, Sebina, Jaddai, Joel, ras Benaya.

⁴⁴Kerina kalak enda ndai ngempoi diberu bangsa si deban. Iulihkenna ndeharana e, jenari isuruhna lawes ras anak-anakna.