Read Batak Karo ESRA 3 Bible Online

ESRA 3 - Batak Karo bible

ESRA 3

¹Kira-kira i bas bulan si pepituken, kerina bangsa Israel enggo ringan i bas kuta-kuta pengulihenna. Sekali jadi pulung ia kerina i Jerusalem,

²janah Josua anak Josadak, ras temanna imam si deban, bage pe Serubabel anak Sealtiel rikut ras kade-kadena, majekken batar-batar Dibata Israel, gelah banci itutungna persembahen i babona sue ras pedah si isuratken i bas Undang-undang Musa, suruh-suruhen Dibata. [5†]

³Batar-batar e ipajekken kalak ndai i bas tapakna si dekah, aminna pe mbiar ia man kalak si ngiani negeri. Dage ibenai kalak ndai ka mulihi nutung persembahen si biasa i je subuk erpagi-pagi bage pe karaben. [6†]

⁴Irayakenna Wari Raya Sapo-sapo sue ras aturenna; tiap wari ipersembahkenna persembahen gelehen asa si iperluken guna wari e. [7†]

⁵Tambah si e ipersembahkenna ka pe persembahen gelehen si itutung kerinana ras persembahen-persembahen Wari Raya Bulan si Mbaru, persembahen tupung ia pulung nembah TUHAN, bage pe persembahen si ibereken man TUHAN sue ukur meriah. [8†]

⁶Aminna pe bangsa e langa menai majekken Rumah Pertoton e mulihi, enggo ibenaina nutung persembahen man TUHAN i bas wari si pemena, bulan si pepituken e.

⁷Bangsa e mereken duit guna nggalari upah tukang batu ras tukang kayu, dingen mereken pangan, inemen, ras minak saitun guna ikirem ku kuta-kuta Tirus ras Sidon gelah itukarken ras kayu aras i Libanon nari, si ibaba arah lawit ku Joppa. Kerina si enda ilakoken arah persetujun Kores, raja Persia.

⁸Pendahin e ibenaken i bas bulan si peduaken tahun si peduaken kenca kalak ndai mulihken ku pertapaken Rumah Pertoton i Jerusalem. Serubabel, Josua, ras kerina teman sada bangsana, imam-imam, ras kalak Lewi. Gendekna, kerina kalak buangen si enggo mulih ku Jerusalem, ikut i bas dahin e. Kerina kalak Lewi, mulai umur dua puluh tahun ku das itugasken ngarak-ngarak pendahin majekken Rumah Pertoton e.

⁹Sekalak kalak Lewi, e me Josua ras anak-anakna si dilaki, ras kade-kadena, bage pe Kadmiel ras anak-anakna si dilaki (terpuk Hodawia) ikut muat bagin i bas njagai pembangunen Rumah Pertoton e mulihi. (Si nampati kalak enda e me kalak Lewi i bas terpuk Henadad nari.)

¹⁰Asum tukang-tukang e mulai majekken palas Rumah Pertoton e, pulung kerina imam-imam ras kalak Lewi i bas terpuk Asap nari. Imam-imam make jubahna dingen ijemakna terompet, janah kalak Lewi maba gendang. Ipuji kalak enda TUHAN sue ras si itetapken Raja Daud nai. [9†]

¹¹Sialo-alon ia ngendeken puji-pujin man TUHAN nina, “Mehuli kal TUHAN, Keleng ateNa man Israel tetap rasa lalap.” Kerina jelma si nterem ersurak asa gegehna muji TUHAN, erkiteken palas Rumah Pertoton enggo pajek. [10†]

¹²Sanga si e nterem imam-imam, ras kalak Lewi, bage pe kepala-kepala terpuk si enggo metua, si gelgel e enggo ngidah Rumah Pertoton si pemena, tangis dingen ngandung ngenehen palas Rumah Pertoton e enggo mulai icibalken. Tapi kalak si debanna ersurak meriah asa gangna.

¹³E maka lanai tereteh apai sora kalak ersurak, apai sora kalak ngandung, erkiteken bage gejekna sora kalak ndai, seh maka terbegi i bas ingan si ndauh nari pe.