Read Batak Karo ESRA 4 Bible Online

ESRA 4 - Batak Karo bible

ESRA 4

¹Musuh-musuh kalak Juda ras Benyamin megi maka kalak si enggo mulih i pembuangen nari iulihina ka majekken Rumah Pertoton TUHAN, Dibata Israel.

²Erkiteken si e ijumpai kalak ndai Serubabel ras pengulu-pengulu terpuk Juda ras Benyamin nina, “Berelah kami ikut majekken Rumah Pertoton e, sabap Dibata si isembahndu e ka nge isembah kami. Kidekah kami isuruh Esarhaddon, raja Assur, ngiani negeri enda, kami enggo tetap mpersembahken persembahen man baNa.” [11†]

³Megi si e nina Serubabel, Josua, ras pengulu-pengulu terpuk e ngaloi, “La kami perlu penampatndu i bas majekken Rumah Pertoton man TUHAN Dibata kami. Kami saja majekkenca, sue ras perentah Kores, raja Persia.”

⁴Kenca bage iusahaken kalak si ringan i bas negeri e gelah urak ukur kalak Jahudi. Ipebiar-biarna dingen iambatina ia majekken Rumah Pertoton e.

⁵Pegawai-pegawai pemerentah Persia pe isogokna gelah ola dung dahin e. Si enda ilakokenna kidekah pemerentahen Kores janah seh pe ku pemerentahen Darius.

⁶I bas permulan pemerentahen Raja Ahasweros, kalak si ringan i bas negeri e ngaduken kalak Jahudi si ringan i Juda ras Jerusalem alu sada surat. [12†]

⁷Tole pe, i bas pemerentahen Artasasta raja Persia, si Bislam, Mitredat, Tabeel, ras teman-temanna, erbahan surat man raja. Surat e ibahan i bas cakap Aram janah arus iterjemahken asum ngogesa.

⁸Si Rehum pe, sekalak gubernur, ras Simsai, sekretaris propinsi erbahan surat si tersena arah teruh enda man Artasasta kerna Jerusalem:

⁹“I bas gubernur Rehum, Simsai sekretaris propinsi i bas teman-temanna nari, e me hakim-hakim ras i bas kerina pegawai si deban nari si asalna i Erek, i Babil, ras Susan i negeri Elam nari,

¹⁰rikut ras bangsa-bangsa si deban si ipindahken Asurbanipal, raja si mbelin dingen erkuasa, i bas kutana nari, jenari ringan i bas kuta Samaria ras i bas ingan si deban i propinsi Eprat Barat.”

¹¹Enda me surat si ikiremna e: “Man Raja Artasasta si mehamat, i bas suruh-suruhen Raja nari si ringan i Eprat Barat.

¹²Ipebetehken kami man bandu o, Raja, maka kalak Jahudi si reh ku jenda i bas daerah-daerahndu si deban nari, genduari enggo ringan i Jerusalem, janah ipajekkenna ka mulihi kuta si jahat dingen rusur berontak e. Enggo ibenakenna majekken tembok kuta e, janah lanai ndekah dung me.

¹³O Raja, adi kuta enda ipajekken mulihi janah bentengna enggo dung, pendudukna lanai nggit nggalar pajak, e maka duit si bengket ku kerajanndu reh sitikna.

¹⁴Dage, erkiteken kami ertanggung jabap man bandu, la ate kami jadi si enda. E maka iusulken kami

¹⁵gelah iperentahkenndu ndarami surat-surat si ibuniken nini-ninindu nai. Arah e tentu idatndu maka kuta enda gelgel e nari kin pe rusur nge berontak janah nai-nai nari nuhsahi raja-raja ras pemerentah propinsi-propinsi. Rayatna seh kal serana ngaturkensa. E me sabapna maka kuta e icedaken.

¹⁶Erkiteken si e tek kami maka adi ipajekken kin kuta enda mulihken dingen bentengna enggo dung, lanai kam ngasup ngkuasai propinsi Eprat Barat. I bas kami nari, Suruh-suruhenndu Kalak Eprat Barat.”

¹⁷Enda me balasen surat e i bas raja nari: “Man gubernur Rehum, Simsai sekretaris daerah ras man teman-temanna si ringan i Samaria ras ingan-ingan si deban i Propinsi Eprat Barat. Mejuah-juah.

¹⁸Surat si ikiremkenndu enggo iterjemahken dingen iogeken man bangku.

¹⁹Enggo kuperentahken gelah iselidiki, janah tuhu-tuhu enggo tangkas maka nai-nai nari Jerusalem enggo berontak ngelawan kuasa raja janah kuta e dem alu pemberontak ras pengacau.

²⁰Raja-raja si megegeh enggo pernah erkuasa i je janah iperentahna kerina daerah propinsi Eprat Barat, dingen ipepulungna pajak ras upeti.

²¹Erkiteken si e pedaratlah perentah maka la banci lang ngadi kalak e majekken kuta e mulihken seh kubereken ka perentahku.

²²Minterlah lakoken enda, gelah ola tambah kecedan ras kerugin nandangi raja.”

²³Kenca surat Artasasta iogeken man Rehum, Simsai ras teman-temanna, minter lawes pedas-pedas ku Jerusalem. Ipaksana kalak Jahudi e gelah ngadi majekken kuta e mulihi.

²⁴Dahin majekken Rumah Pertoton e enggo ipengadi janah lalap la iterusken seh tahun si peduaken pemerentahen Darius, raja Persia. [13†]