Read Batak Karo ESRA 5 Bible Online

ESRA 5 - Batak Karo bible

ESRA 5

¹I bas paksa si e, lit dua kalak nabi, Hagai ras Sakaria anak Iddo, mulai ngerana i bas gelar Dibata Israel man kalak Jahudi si ringan i Juda ras Jerusalem. [14†]

²Kenca Serubabel anak Sealtiel ras Josua anak Josadak megi katana, ibenakenna me mulihi majekken Rumah Pertoton si i Jerusalem e. Nabi Hagai ras Sakaria nampati. [15†]

³Tupung si e pe minter reh ku Jerusalem Tattenai gubernur Eprat Barat, bage pe Setar Bosenai, ras teman-temanna ngoratisa nina, “Ise nuruhsa kam majekken Rumah Pertoton enda ras ndungisa?”

⁴Ipindo kalak ndai pe gelar-gelar kerina si nampati majekken Rumah Pertoton e.

⁵Tapi iperdiateken Dibata peminpin kalak Jahudi, e maka iputusken pegawai-pegawai Persia e la erbahan tindaken kai-kai pe seh banci ibahanna surat man Darius ras ngaloken balasenna.

⁶Enda me laporen si ikiremkenna man raja:

⁷“Man si mehamat: Raja Darius. Dame lah pemerentahenndu.

⁸Ietehndu min o raja, maka enggo kami ku propinsi Juda janah idapeti kami maka Rumah Pertoton man Dibata si mbelin, sangana ipajekken ka mulihi. Ipakena batu si galang janah dingdingna ilapisi alu papan. Dahin e alu tutus kal idahiken janah terus erdalan alu mehuli.

⁹E maka isungkun kami peminpin bangsa e ise nuruhsa majekken Rumah Pertoton e mulihi ras ndungisa.

¹⁰Gelar-gelarna pe isungkun kami gelah banci ipebetehken man bandu ise peminpin i bas dahin enda.

¹¹Ngaloi kalak e, ‘Kami enda suruh-suruhen Dibata langit ras doni. Ipajekken kami ka mulihken Rumah Pertoton enda, si gelgel e enggo ipanteki dingen idungi sekalak raja Israel si mbelin.

¹²Tapi erkiteken merawa Dibata Surga ibahan nini-nini kami, ipelepasNa nini-nini kami e italuken Raja Nebukadnesar, bangsa Kaldea i Babilon nari. Icedakenna Rumah Pertoton e, janah ibabana bangsa e ku pembuangen i Babilon. [16†]

¹³Kenca bage i bas tahun si pemena pemerentahen Raja Kores jadi raja Babilon, iperentahkenna gelah Rumah Pertoton e ipajekken ka mulihi. [17†]

¹⁴Iulihkenna perkakas emas ras pirak si gelgel e ibuat Nebukadnesar ibas Rumah Pertoton nari i Jerusalem si enggo nai itamakenna i bas rumah sembah-sembahen i Babil. Perkakas-perkakas e iendesken Sirus man sekalak jelma, Sesbasar gelarna, si iangkatna jadi gubernur Juda.

¹⁵Raja Sirus nuruh ia maba perkakas-perkakas e dingen ngulihkenca ku Rumah Pertoton i Jerusalem. Tambah si e isuruhna ka pe gelah Rumah Pertoton e ipajekken ka mulihi i bas tapakna si gelgel.

¹⁶E maka reh me Sesbasar jenari ipajekkenna palasna. Mulai i bas paksa e nari seh genduari dahin e erdalan terus, tapi Rumah Pertoton e langa dung.’

¹⁷Dage o, raja, adi mehuli iakapndu, selidiki min i bas arsip surat-surat kerajan i Babil, metehsa payo tah lang nai iperentahken Kores majekken mulihi Rumah Pertoton i Jerusalem enda. Janah kenca bage turiken man kami kuga sura-surandu i bas perkara enda.”