Read Batak Karo ESRA 6 Bible Online

ESRA 6 - Batak Karo bible

ESRA 6

¹E maka iperentahken Raja Darius gelah ipepayo kerina surat-surat kerajan si isusun i Babil.

²Tapi i kuta Ekbatana, i bas propinsi Media nge gulungen surat e terdat. Isina bagi si tersena si arah teruh enda:

³“I bas tahun si pemena pemerentahenna raja Kores, merentahken maka Rumah Pertoton i Jerusalem ipajekken ka mulihi man ingan nehken persembahen gelehen ras persembahen tutungen. Rumah Pertoton e ganjangna dua puluh pitu meter janah belangna dua puluh pitu meter.

⁴Dingdingna ibahan ilapisi selambar kayu i babo tiap telu lapis batu. Kerina kinikerin igalari perbendaharan kerajan.

⁵Bage pe perkakas-perkakas emas ras pirak si ibaba Raja Nebukadnesar nai ku Babil i bas Rumah Pertoton i Jerusalem nari, arus iulihken ku bas inganna si payo i bas Rumah Pertoton i Jerusalem.”

⁶Kenca bage ikiremken Darius balasen si tersurat arah teruh enda: “Man Tattenai, Gubernur Eprat Barat ras Setar Bosenai bage pe teman-temanndu pegawai i Eprat Barat. Ola deherindu Rumah Pertoton e,

⁷janah ola campurindu dahin e. Pelepas gubernur Juda ras peminpin Jahudi e majekken Rumah Pertoton Dibata mulihi i bas inganna si gelgel.

⁸I jenda kuperentahken man bandu gelah isampatindu kalak e majekkenca. Kerina kinikerin arus igalarindu man kalak e, ola terlat, janah buat i bas kas kerajan si ialoken i bas duit pajak propinsi Eprat Barat, gelah dahin e ola lang-lang.

⁹Tep-tep wari, arus tetap iberekenndu man imam-imam i Jerusalem kai keperlun si ikataken man bandu: jenggi lembu si nguda denga, biri-biri, ntah anak biri-biri si man tutungen jadi persembahen Dibata Surga, ntah gandum, sira, lau anggur, tah minak saitun.

¹⁰Si enda arus ilakoken gelah banci ipersembahkenna persembahen si ngena ate Dibata Surga dingen ertoto mindo pasu-pasuNa guna aku ras anak-anakku si dilaki.

¹¹Tole pe kuperentahken: ise si la ngikutken perentah enda arus idekdek sada beloti i bas rumahna nari, jenari itelapi sada ujungna, kenca bage ipantemken ku bas beltekna seh telpus. Janah rumahna iruntuhken jadi gun-gunen sampah-sampah.

¹²Dibata, si milih Jerusalem jadi ingan ersembah man baNa, Ialah si ngambengken raja tah bangsa si ngelanggar perentah enda ras ncubakenca ncedaken Rumah Pertoton si lit i bas kuta e. Perentah enda la banci la ipatuhi tuhu-tuhu. Aku, si mereken perentah enda.” Raja Darius

¹³Kenca bage gubernur Tattenai, Setar Bosenai, ras teman-temanna pegawai si deban, nehken perentah Raja Darius, sitik pe la nimpang.

¹⁴E maka peminpin-peminpin Jahudi nerusken pembangunen Rumah Pertoton e, si erdalan alu mehuli alu penjemba-jemba Nabi Hagai ras Sakaria. Idungina Rumah Pertoton e sue ras si enggo iperentahken Dibata Israel ras si iperentahken Kores, Darius, ras Artasasta, raja Persia. [18†]

¹⁵Rumah Pertoton e enggo dung i bas wari si peteluken bulan Adar, i bas tahun peenemken pemerentahen Raja Darius.

¹⁶Kenca bage bangsa Israel, imam-imam, kalak Lewi, ras kerina kalak si deban, si enggo mulih i pembuangen nari alu ukur meriah mengket Rumah Pertoton e.

¹⁷Guna kerja mengket Rumah Pertoton e ipersembahkenna seratus jenggi lembu, dua ratus biri-biri, ras empat ratus anak biri-biri jadi persembahen gelehen, ras sepuluh dua kambing jadi persembahen pengalemi dosa, sada guna tiap suku Israel.

¹⁸Tambah si e iaturkenna pe imam-imam ras kalak Lewi guna ndahiken dahin-dahin i bas Rumah Pertoton i Jerusalem, sue ras pedah-pedah si isuratken i bas kitap Musa.

¹⁹Kalak si enggo mulih i pembuangen e nari ngerayaken Paskah i bas wari si pesepuluh empatken bulan si pemena. [19†]

²⁰Kerina imam-imam ras kalak Lewi enggo mbersihken dirina, e maka enggo ia bersih rikutken aturen agama. Jenari kalak Lewi nggeleh asuh-asuhen si man persembahen i bas wari Paskah e guna kerina kalak si enggo mulih i bas pembuangen e nari, bage pe guna imam-imam ras kalak Lewi e jine.

²¹Si atan man persembahen e, e me kalak Israel si enggo mulih i bas pembuangen nari, bage pe kalak si ngiani negeri e si lanai nggit ngikutken lagu langkah perbegu si melket e, jenari reh ia nembah man TUHAN.

²²Pitu wari dekahna kalak ndai ngerayaken Wari Raya Roti si La Itama Ragi e alu dem keriahen. Meriah kal ukur kalak ndai erkiteken ibahan TUHAN enggo mehuli ukur raja Assur man bana seh maka isampati raja e ia i bas dahin majekken mulihi Rumah Pertoton Dibata nu Israel.