Read Batak Karo ESRA 7 Bible Online

ESRA 7 - Batak Karo bible

ESRA 7

¹ [1-5] Ertahun-tahun kenca kejadin enda kerina, paksana Raja Artasasta erkuasa i Persia, lit me sekalak dilaki si tergelar Esra. Ia kesusuren Harun, Imam si Mbelin e, rikutken terombo si tersena arah teruh enda: Harun Eleasar Pinehas Abisua Bukki Ussi Serahia Merayot Asaria Amaria Ahitup Sadok Salum Hilkia Asaria Seraya

⁶ [6-7] Esra sekalak si meganjang dingen mbages kal pemetehna kerna Undang-undang si enggo ibereken TUHAN Dibata Israel man Musa. Erkiteken Esra ipasu-pasu TUHAN Dibatana, ibereken raja kerina kai si ipindona. I bas tahun si pepituken pemerentahen Artasasta, berkat Esra i Babil nari ku Jerusalem. Piga-piga kalak Israel pe ikut ras ia, janah atan pe imam-imam, kalak Lewi, tukang musik Rumah Pertoton, pengawal Rumah Pertoton, dingen si erdahin i bas Rumah Pertoton.

⁸[8-9] Kalak enda ndai berkat i Babil nari i bas wari si pemena, bulan si pemena janah alu penampat Dibata, seh i Jerusalem i bas wari si pemena bulan si pelimaken.

¹⁰Gelgel nari enggo tutus kal ate Esra melajari Undang-undang TUHAN, bage pe makekenca i bas geluhna, dingen ngajarken pedah ras peraturen-peraturen si lit i bas Undang-undang e man bangsa Israel.

¹¹Artasasta mereken surat enda man Esra imam si meganjang sekolahna, si mbages pemetehna kerna undang-undang ras perentah-perentah si enggo ibereken TUHAN man Israel. Isi surat enda bagi si tersena arah teruh enda:

¹²“Man: Imam Esra ahli Undang-undang Dibata Surga.

¹³Kuperentahken maka i belang-belang kerajanku kerina kalak Israel, imam-imam, kalak Lewi, arus ibere ijin, adi atena mulih ras kam ku Jerusalem.

¹⁴Aku, rikut ras menteringku si pitu, nuruh kam gelah ipepayondu i Jerusalem ras Juda seh i ja pengikutken kalak undang-undang si ipelimiken i bas kam, e me Undang-undang Dibatandu.

¹⁵Mesikel aku ras menteri-menteringku mereken persembahen emas ras pirak man Dibata Israel i Rumah PertotonNa i Jerusalem, e maka ibabandu lah persembahen e ku jah.

¹⁶Bage pe baba kerina pirak ras emas si ipepulungndu i belang-belang propinsi Babilon ras persembahen si ibereken kalak Israel ras imam-imamna guna Rumah Pertoton Dibatana i Jerusalem.

¹⁷Pakeken duit e alu mehuli janah tukurlah jenggi lembu, bajar biri-biri, anak biri-biri, gandum, ras lau anggur, jenari persembahken kerina i bas batar-batar Rumah Pertoton si lit i Jerusalem.

¹⁸Iba pirak ras emas e banci ipakendu ras temanndu sada bangsa lako nukur kai saja atendu, sue ras peraten Dibatandu.

¹⁹Persembahken man Dibata i Jerusalem kerina perkakas si enggo ibereken man bandu guna ipake i bas lakon-lakon i bas Rumah Pertoton e.

²⁰Janah si debanna si iperlukenndu guna Rumah Pertoton e, banci ibuatndu i bas perbendaharan kerajan nari.

²¹Kuperentahken man kerina bendahara si lit i propinsi Eprat Barat gelah minter nikapken kai si ipindo Esra, sekalak imam dingen ahli Undang-undang Dibata Surga e,

²²asal ola lebih 3.400 kilo pirak, 10.000 kilo gandum, 2.000 liter lau anggur, 2.000 liter minak saitun, ras sira asa perluna.

²³Arus maka metenget kam nikapken kai si iperluken Dibata Surga guna Rumah PertotonNa, gelah alu bage ola Ia ndigan pe merawa man kinirajanku ras man anak-anakku.

²⁴Pajak kai pe la banci ipindondu i bas imam-imam kalak Lewi, tukang musik, pengawal-pengawal rumah pertoton, si erdahin i bas Rumah Pertoton, tah kerina kalak si deban si atan erdahin i bas Rumah Pertoton e.

²⁵Kam Esra, alu make kepentaren si enggo ibereken Dibatandu man bandu, angkatlah pengulu-pengulu ras hakim-hakim lako merentah kerina kalak si lit i propinsi Eprat Barat si nggeluh erpalasken Undang-undang Dibatandu. Ajarken Undang-undang e man kerina kalak si langa metehsa.

²⁶Adi lit kalak si la ngikutken undang-undang Dibatandu e ntah undang-undang kerajan, arus maka minter iukum mate, ntah ibuang ntah erta-ertana irampas, ntah pe ipenjaraken.”

²⁷Nina Esra, “Pujilah TUHAN, Dibata nini-nininta! Ia kap si peturahsa ukur raja pemuliaken Rumah Pertoton TUHAN i Jerusalem.

²⁸Arah lias ate Dibata aku enggo ndat perkuah ate raja ras menteri-menterina bage pe kerina pegawai-pegawaina si erkuasa; TUHAN Dibatangku enggo pepiherken ukurku, janah enggo ngasup aku ngiahken nterem peminpin suku Israel gelah mulih ras aku.”