Read Batak Karo ESRA 8 Bible Online

ESRA 8 - Batak Karo bible

ESRA 8

¹Enda me daftar pengulu terpuk si ibuang ku Babilon jenari mulih ras Esra ku Jerusalem asum Artasasta jadi raja:

² [2-14] Gersom, i bas terpuk Pinehas nari Daniel, i bas terpuk Itamar nari Hattus anak Sekania, i bas terpuk Daud nari Sakaria, i bas terpuk Paros nari, rikut ras 150 kalak dilaki i bas terpukna nari (lit surat terombona) Eliehunai anak Serahia, i bas terpuk Pahat Moap nari, rikut ras 200 kalak dilaki Sekanya anak Jahasiel, i bas terpuk Sattu nari, rikut ras 300 kalak dilaki Ebed anak Jonatan, i bas terpuk Adin nari, rikut ras 50 kalak dilaki Jesaya anak Atalia, i bas terpuk Elam nari, rikut ras 70 kalak dilaki Sebadia anak Mikael, i bas terpuk Sepatia nari, rikut ras 80 kalak dilaki Obaja anak Jehiel, i bas terpuk Joap nari, rikut ras 218 kalak dilaki Selomit anak Josipia, i bas terpuk Bani nari, rikut ras 160 kalak dilaki Sakaria anak Bebai i bas terpuk Bebai nari, rikut ras 28 kalak dilaki Johanan anak Hakkatan, i bas terpuk Asgat nari, rikut ras 110 kalak dilaki Elipelet, Jewel, ras Semaya, i bas terpuk Ad(...)

¹⁵Kerina terpuk ndai ipepulung i tepi lau anak si malerna ku kuta Ahawa, janah telu wari dekahna kami erkemah i je. I bas kalak ndai lit dat aku imam-imam, tapi la lit kalak Lewi.

¹⁶Kudilo pengulu kalak ndai siwah kalak, e me: Elieser, Ariel, Semaya, Elnatan, Jarib, Elnatan, Natan, Sakaria, ras Mesullam, bage pe dua kalak guru, Joyarip ras Elnatan.

¹⁷Kusuruh kalak enda ndai kerina njumpai Iddo, e me pengulu perpulungen si lit i Kasipia, lako mindo man bana ras teman-temanna, e me kesusuren kalak si erdahin i bas Rumah Pertoton, gelah ikiremkenna man kami kalak si erdahin guna Dibata i bas Rumah Pertoton.

¹⁸Arah perkuah ate Dibata isuruhna ras kami si Serebia, sekalak si ngasup i bas kai-kai pe. Ia sekalak Lewi i bas terpuk Mahli nari, janah sepuluh waluh kalak anakna ras senina-seninana reh ras ia.

¹⁹Hasabia ras Jesaia i bas terpuk Merari nari pe isuruhna man kami, rikut ras dua puluh kalak kade-kadena.

²⁰Tambah si e lit ka pe 220 kalak si erdahin i bas rumah pertoton. Nini-nini kalak enda nai enggo itetapken Raja Daud ras pegawai-pegawaina lako nampati kalak Lewi i bas rumah pertoton. Kerina ia isuratken gelarna sekalak-sekalak.

²¹I tepi lau anak Ahawa e, kuperentahken kerina erpuasa dingen peteruk diri i lebe-lebe Dibata janah mindo gelah ibabaiNa kami i bas perdalanen janah ikawaliNa kami ras anak-anak kami bage pe kerina sikerajangen kami.

²²Tentu mela nge min ndai kuakap mindo tentera si erkuda i bas raja nari guna engkawal kami i bas musuh-musuh nari kidekah perdalanen sabap enggo kukataken man raja maka Dibata kami masu-masu kalak si ernalem man baNa, janah ise si nadingken Ia la ateNa ngena janah iukumNa pe.

²³E maka erpuasa dingen ertoto kami man Dibata gelah ikawaliNa janah pertoton kami e ialokenNa.

²⁴I bas pengulu imam-imam e nari kubuat Serebia, Hasabia, ras sepuluh kalak si debanna.

²⁵Kenca bage kutimbang pirak, emas, ras kerina perkakas-perkakas si ibereken raja, penasehat-penasehat ras pegawai-pegawaina, bage pe kalak Israel guna ipake i bas Rumah Pertoton e, jenari kubereken man imam-imam e.

²⁶[26-27] Enda me si kubereken man bana: pirak: beratna 22 ton 100 perkakas pirak: beratna 70 kilo emas: beratna 3.400 kilo 20 mangkuk emas: beratna 8,4 kilo 2 mangkuk tembaga si mejile, ergana bali ras 2 mangkuk emas.

²⁸Ningku man imam-imam e, “Kam enggo iserapken man TUHAN, Dibata nini-ninindu, janah bage pe kerina perkakas-perkakas pirak ras emas si iendesken man baNa jadi persembahen riah ukur.

²⁹Jagalah alu metenget kerina perkakas-perkakas e seh kam i bas Rumah Pertoton e. Timbanglah perkakas-perkakas e i bas kamar imam-imam si lit i bas Rumah Pertoton e jenari endesken man pengulu imam ras pengulu-pengulu kalak Lewi, bage pe man pengulu-pengulu kalak Israel si lit i Jerusalem.”

³⁰E maka ialoken imam-imam ras kalak Lewi pirak, emas ras perkakas-perkakas e, gelah ibabana ku Rumah Pertoton i Jerusalem.

³¹E maka berkat kami i lau anak Ahawa nari ku Jerusalem i bas wari sepuluh dua bulan si pemena. Dibata ngarak-ngarak kami janah ikawaliNa kami maka la iserang musuh-musuh bage pe perngerampuk si nggempangi kami i bas perdalanen.

³²Kenca kami seh i Jerusalem, pekesahken kami telu wari dekahna.

³³Kenca bage i bas wari peempatken lawes kami ku Rumah Pertoton. I je itimbang kami pirak, emas, ras kerina perkakas-perkakas e, jenari iendesken kami man Imam Meremot, anak Uria. Si nemani ia e me Eleasar anak Pinehas ras dua kalak kalak Lewi, si Josabat anak Jesua ras Noadia anak Binnui.

³⁴Kerina ikira ras itimbang, jenari isuratken alu lengkap.

³⁵Kenca bage kerina kalak si enggo mulih i bas pembuangen e nari maba persembahen tutungen man Dibata Israel. Ipersembahkenna sepuluh dua jenggi lembu guna kerina kalak Israel, siwah puluh enem bajar biri-biri, pitu puluh pitu anak biri-biri. Janah ipersembahkenna pe sepuluh dua kambing guna nasapken dosa-dosana. Kerina asuh-asuhen e itutung jadi persembahen man TUHAN.

³⁶Surat si enggo ibereken raja e pe ibuatna, jenari iberekenna man gubernur-gubernur ras pegawai-pegawai propinsi Eprat Barat. Iberekenna semangat man bangsa Israel dingen nampati pembangunen Rumah Pertoton ingan ersembah e.