Read Batak Karo NEHEMIA 1 Bible Online

NEHEMIA 1 - Batak Karo bible

NEHEMIA 1

¹Enda me turi-turinna Nehemia anak Hakalia. I bas bulan Kislew, i bas tahun si pedua puluhken kenca Artaserses jadi raja Persia, aku, Nehemia, sangana i kuta Susan ibukota kerajan Persia.

²Tupung e sekalak seninangku Hanani gelarna, reh i Jerusalem nari ras piga-piga kalak si debanna. E maka kusungkuni ia kerna Jerusalem ras kerna senina-senina kami kalak Jahudi si enggo mulih i pembuangen Babilon nari.

³Iturikenna man bangku maka kalak si nggeluh denga dingen enggo mulih ku negeri kami sangana i bas kiniseran si mbelin janah bangsa-bangsa si deban si tading i sekelewetna megombang man bana. Iturikenna ka pe maka tembok kuta Jerusalem enggo ka sontar janah pintu-pintu gerbangna langa ipekena kenca kin iciluk.

⁴Kenca kubegi kerina si enda, kundul aku janahku tangis. Piga-piga wari dekahna aku erceda ate janah erpuasa. Ertoto aku man Dibata, ningku,

⁵“O TUHAN, Dibata Surga. Kam kap Dibata si mbelin, si ihamati. Kam setia nehken perpadanenNdu man kalak si ngkelengi Kam ras ngelakoken si iperentahkenNdu.

⁶Tataplah aku, TUHAN, janah dengkehkenlah pertotonku asum aku ertoto suari ras berngi guna kerina suruh-suruhenNdu, bangsa Israel. Ngaku aku maka kami, bangsa Israel, enggo erdosa. Nini-niningku ras aku, enggo erdosa.

⁷Perbahanen kami man baNdu tuhu-tuhu enggo jahat, janah la i lakoken kami kai si iperentahkenNdu. La ipake kami undang-undang si iberekenNdu arah Musa, suruh-suruhenNdu e.

⁸Inget min kai si ikatakenNdu man Musa, niNdu, ‘Adi la kam setia man bangKu, Kukerapken kam ku tengah-tengah bangsa-bangsa si deban. [1†]

⁹Tapi adi erkusur kam mulihken kempak Aku janah ilakokenndu kai si enggo Kuperentahken, Kubaba kam mulih ku ingan si enggo Kupilih guna ingan ersembah man bangKu, aminna gia kam sangana merap seh ku tampuk doni.’ [2†]

¹⁰Enda kap kerina suruh-suruhenNdu, bangsaNdu. IpulahiNdu ia alu kuasa ras gegehNdu si mbelin.

¹¹TUHAN, begikenlah pertotonku ras pertoton kerina suruh-suruhenNdu si deban si mesikel nghamati Kam. Berelah maka seh si kusuraken sendah, janah bahanlah maka mekuah ate raja man bangku.” I bas paksa si e aku me si ngidangi inemen raja.