Read Batak Karo NEHEMIA 12 Bible Online

NEHEMIA 12 - Batak Karo bible

NEHEMIA 12

¹Si tersurat arah teruh enda, e me gelar-gelar imam ras kalak Lewi si mulih i bas pembuangen nari ras Serubabel anak Sealtiel, bage pe ras Josua, sekalak Imam si Mbelin.

² [2-7] Imam-imam: Seraya, Jeremia, Esra, Amaria, Malluk, Hattus, Sekanya, Rehum, Meremot, Iddo, Ginnetoi, Abia, Miyamin, Maadia, Bilga, Semaya, Joyarip, Jedaya, Sallu, Amok, Hilkia, ras Jedaya. Imam-imam enda me si jadi peminpin i bas teman-temanna sada dahin i bas paksa Josua nggeluh denga.

⁸ Kalak Lewi: Kalak si tersurat gelarna arah teruh enda tugasna e me ngendeken ende-enden pengataken bujur, e me: Jesua, Binnui, Kadmiel, Serebia, Juda, ras Mattania.

⁹Si tersurat gelarna arah teruh enda e me kalak si tedis petala-tala ras kalak ndai i bas kebaktin e: Bakbukia, Unni, ras senina-seninana kalak Lewi si deban.

¹⁰Josua e me bapa Joyakim, Joyakim e me bapa Eliasip, Eliasip e me bapa Joyada,

¹¹Joyada e me bapa Jonatan, Jonatan e me bapa Jaddua.

¹² [12-21] Asum Joyakim jadi Imam si Mbelin, imam si tersurat arah teruh enda e me kepala-kepala terpuk imam-imam: [Imam:] — [Terpuk:] Meraya — Seraya Hanania — Jeremia Mesullam — Esra Johanan — Amaria Jonatan — Malluki Jusup — Sebanya Adna — Harim Helkai — Merayot Sakaria — Iddo Mesullam — Ginneton Sikri — Abiya ... — Miniamin Piltai — Moadia Sammua — Bilga Jonatan — Semaya Mattenai — Joyarip Ussi — Jedaya Kallai — Sallai Eber — Amok Hasabia — Hilkia Natanel — Jedaya

²²Lit sada surat ibahan kerna kepala-kepala keluarga kalak Lewi ras imam-imam kidekah nggeluh denga Imam-imam si Mbelin si tersena arah teruh enda, e me: Eliasip, Joyada, Jonatan, ras Jaddua. Surat e enggo dung ibahan asum Darius jadi raja Persia.

²³Amin bage gia seh paksa Jonatan, kempu Eliasip ngenca kepala keluarga kalak Lewi si isuratken i bas surat Rumah Pertoton.

²⁴Arah pengaturken Hasabia, Serebia, Jesua, Binnui, ras Kadmiel, kalak Lewi e ibagi jadi piga-piga terpuk. Dua terpuk ngendeken puji-pujin man Dibata alu sialo-alon dingen ngataken bujur man baNa, sue ras perentah si ibereken Raja Daud, suruh-suruhen Dibata e.

²⁵Pengawal Rumah Pertoton si tersurat arah teruh enda ertugas njaga kamar perbendaharan deherken pintu gerbang Rumah Pertoton, e me: Mattania, Bakbukia, Obaja, Mesulam, Talmon ras Akkub.

²⁶Tupung e si jadi imam si mbelin e me Joyakim anak Josua, kempu Josadak. Si jadi gubernur e me Nehemia. Janah sanga si e nggeluh denga pe Esra. Ia sekalak imam janah kalak si pentar kerna Undang-undang Musa.

²⁷Asum tembok kuta Jerusalem itangkuhken, ipepulung kerina kalak Lewi ku Jerusalem i ja pe ia ringan, gelah banci ikut i bas perayan penangkuhen e alu ngendeken ende-enden pengataken ras alu gendang, kulcapi ras murdap.

²⁸Kerina keluarga kalak Lewi si perende-enden reh i bas daerah inganna tading i sekelewet ras i kuta-kuta sekelewet Netopa nari,

²⁹bage pe i Betgilgal, Geba, ras Asmawet nari.

³⁰Imam-imam ras kalak Lewi erbahan lakon gunaa pebadiaken dirina, jelma si nterem, pintu-pintu gerbang ras tembok kuta e.

³¹Kupepulung peminpin-peminpin Juda i datas tembok e, jenari kusuruh ngaturken dua terpuk jelma si nterem erbaris ngkeleweti kuta e janahna rende ngataken bujur man Dibata. Terpuk si pemena erdalan ku kemuhen i datas tembok e kempak Gerbang Sampah.

³²Hosaya erdalan arah pudi perende-ende e, ngikut pe setengah i bas peminpin Juda nari.

³³[33-35] Imam-imam si tersena arah teruh enda, janahna ngembus terompet erbaris arah pudi peminpin-peminpin ndai, e me: Asaria, Esra, Mesullam, Juda, Benyamin, Semaya, ras Jeremia. Seterusna e me Sakaria anak Jonatan, kempu Semaya. (Nini denge e me Mattania, Mikaya, ras Sakkur i bas terpuk Asap nari.)

³⁶Anggota-anggota terpuk ngikuti arah pudina e me Semaya, Asarel, Milalai, Gilalai, Maai, Netanel, Juda, ras Hanani. Kalak enda kerina maba alat musik seri ras si ipake Raja Daud nai, suruh-suruhen Dibata. Si minpin barisen e Esra, kalak si pentar i bas Undang-undang Musa e.

³⁷Deherken Gerbang Ulu Lau nangkeng kalak enda arah tangga si kempak Kuta Daud, mentasi istana Daud, jenari mulih ku tembok e deherken Gerbang Lau, arah timur kuta e.

³⁸Terpuk sada nari si rende ngataken bujur e erdalan kempak kawes arah datas tembok e, janah ngikut pe setengah i bas bangsa e. Kami erbaris mentasi Menara Ginuhur kempak Tembok si Mbelang,

³⁹janah i jenari erdalan mentasi Gerbang Eperaim, Gerbang Jesana, Gerbang Ikan, Menara Hananel, ras Menara Seratus terus kempak Gerbang Biri-biri. Kami ngadi erbaris deherken gerbang si kempak Rumah Pertoton.

⁴⁰Dage duana terpuk si rende ngataken bujur man Dibata e seh i kesain Rumah Pertoton. Seakatan peminpin si ras aku,

⁴¹imam-imam si tersena arah teruh enda pe ikut i bas terpukku e me: Eliakim, Maaseya, Miniamin, Mikaya, Eliunai, Sakaria, ras Hanania; kalak enda ngembus terompet.

⁴²Arah pudi barisen kalak enda me Maaseya, Semaya, Eleasar, Ussi, Johanan, Malkia, Elam, ras Eser. Perende-ende alu ipinpin Jesrahia, rende asa gang sorana.

⁴³I bas wari e melala kal asuh-asuhen igeleh jadi persembahen, janah bangsa e dem keriahen erkiteken meriah kal ukurna kerina ibahan Dibata. Diberu ras danak-danak pe ikut i bas perayan e, e maka sorana kerina terbegi i dauh-dauh nari.

⁴⁴Tupung e, dilaki itugasken njaga kamar perbendaharan ingan nimpan pemere guna Rumah Pertoton, subuk persembahen persepuluhen ras buah gandum si pemena ras buah pangan si pemena tasak tep-tep tahun. Kalak enda ertanggung jawab pepulung ulih juma deherken erbage-bage kuta, si jadi bagin imam-imam ras kalak Lewi sue ras si iperentahken Undang-undang. Kerina kalak Juda erngena ate nandangi imam-imam ras kalak Lewi,

⁴⁵erkiteken kalak e ngelakoken acara pembersihen ras lakon-lakon si deban si iperentahken Dibata. Pemain musik ras pengawal Rumah Pertoton pe ndalanken tugasna sue ras peraturen-peraturen si ibahan Raja Daud ras anakna Salomo. [36†]

⁴⁶Mulai i bas paksa Raja Daud ras pemain musik Asap nai, pemain-pemain musik enggo minpin ende-enden pujin ras pengataken bujur man Dibata.

⁴⁷I bas paksa Serubabel bage pe i bas paksa Nehemia, kerina kalak Israel tep-tep wari mereken pemerena guna keperlun pemain musik ras pengawal Rumah Pertoton. Bangsa e mereken persembahen si badia guna kalak Lewi, janah kalak Lewi e mereken bagin imam-imam.