Read Batak Karo NEHEMIA 13 Bible Online

NEHEMIA 13 - Batak Karo bible

NEHEMIA 13

¹Asum Undang-undang Musa iogeken man bangsa e ijumpai kalak ndai i je lit tersurat la banci ndigan pe ipelepas sekalak kalak Amon ntah kalak Moap bengket ku bas perpulungen bangsa Dibata. [37†]

²Si enda erkiteken bangsa Amon ras bangsa Moap la mereken pangan ras inemen man kalak Israel asum i bas perdalanen i Mesir nari, tapi iupahina Bilham numpahi bangsa Israel, tapi isalihken Dibata sumpah e jadi pasu-pasu. [38†]

³Asum bangsa Israel megi undang-undang e iogeken, kerina bangsa si deban ipedaratna i bas perpulungenna nari.

⁴Imam Eliasip, si ertugas ngurus kamar perbendaharan Rumah Pertoton, enggo ndekah si kade-kaden ras Tobia.

⁵Iberena Tobia make sada kamar galang si arusna kin ipergunaken man ingan nimpan persembahen gandum ras kumenen, perkakas-perkakas si ipake i bas Rumah Pertoton, persembahen guna imam-imam, bage pe persepuluhen i bas gandum, anggur, ras minak saitun si man berenken man kalak Lewi, pemain musik ras pengawal Rumah Pertoton.

⁶Tupung si enda jadi, aku sangana la i Jerusalem, sabap i bas tahun si petelu puluh duaken Artaserses jadi raja Babil, aku sanga ngadap man bana. La ndekah kenca si e iberena aku mulih,

⁷e maka mulih aku ku Jerusalem. Kenca seh i Jerusalem sengget kal aku sabap kueteh enggo ibere Eliasip ipake Tobia sada kamar i bas Rumah Pertoton e.

⁸Merawa kal aku, jenari kusampetken ndarat kerina barang-barang Tobia.

⁹Kenca bage kuperentahken maka kamar e ibersihken rikutken aturen agama janah alat-alat Rumah Pertoton, persembahen buah gandum, ras kumenen iulihken ku bas kamar e.

¹⁰Dungna kueteh pe maka pemain-pemain musik Rumah Pertoton ras kalak Lewi si debanna enggo nadingken Jerusalem janah mulih ku jumana, sabap lanai ibereken bangsa e keperlun kegeluhenna. [39†]

¹¹E maka kusuriangi pegawai-pegawai e erkiteken Rumah Pertoton e terulang. Kenca bage kupepulung mulihken kalak Lewi ras pemain musik e ku Rumah Pertoton, jenari kusuruh erdahin mulihken.

¹²Dungna kerina kalak Juda mulai ka maba persepuluhen buah gandum, anggur, ras minak saitun, ku bas kamar perbendaharan Rumah Pertoton e. [40†]

¹³Kalak si kutugasken ngurus kamar perbendaharan e, e me: Selemia, ia sekalak imam: Sadok, ia kalak si pentar kerna Undang-undang Musa; ras Pedaya, ia sekalak kalak Lewi. Hanan anak Sakkur, kempu Mattania, e me si nampati kalak enda. Kueteh dingen tek aku maka kalak e kerina bujur perbahanenna i bas magiken perbekalen e man teman-temanna sada dahin.

¹⁴O Dibatangku, ingetlah min kerina si kubahan enda guna Rumah PertotonNdu ras kebaktin i je.

¹⁵I bas paksa e kuidah kalak Juda ngerik buah anggur tupung wari Sabat. Si debanna namaken gandum, anggur, buah anggur, buah ara, ras barang-barang si deban ku das keledena jenari ibabana ku Jerusalem. Kupersingeti man bana maka ola kai pe idayakenna tupung wari Sabat. [41†]

¹⁶Lit ka piga-piga kalak si asalna i kuta Tirus nari ringan i Jerusalem. Kalak e maba ikan ras melala erbage barang-barang ku kuta Jerusalem lako ndayakenca man bangsa kami i bas wari Sabat.

¹⁷Kusuriangi peminpin-peminpin kalak Jahudi ningku, “Uga maka bage jahatna perbahanendu? Iliamindu wari Sabat!

¹⁸Bagenda kal me nai pe maka iukum Dibata nini-ninindu asum icedakenNa kuta enda. Amin enggo pe bage lalap ka nge iusur-usurndu maba rawa Dibata si terbuen nandangi Israel alu ngeliami wari Sabat.”

¹⁹E maka kuperentahken gelah gerbang-gerbang kuta ipintu tep-tep permulan wari Sabat, kenca ben wari, janah la banci italangi ope denga wari Sabat lepas. Guna si e kutugasken piga-piga kalak si erdahin ras aku erjaga i bas pintu-pintu gerbang gelah la lit kai pe ibaba bengket ku bas kuta e i bas wari Sabat.

²⁰Sekali tah dua kali perbinaga ndayaken erbage barang-barang erberngi i darat tembok kuta.

²¹Erkiteken si e kupersingeti man perbinaga-perbinaga e, ningku, “Labo gunana kam erberngi i darat tembok kuta. Adi iulihindu denga ka, kutangkap kam.” Mulai i bas paksa e nari lanai ia reh tupung wari Sabat.

²²Kuperentahken kalak Lewi gelah ibersihkenna dirina janah gelah ia lawes njaga pintu-pintu gerbang maka wari Sabat ipebadiaken. O Dibatangku, ingetlah aku erkiteken si enda pe, janah selamatkenlah aku erkiteken kekelengenNdu si mbelin.

²³Paksa e kudat pe maka nterem kalak Jahudi enggo ngempoi diberu i Asdot, Amon, ras i Moap nari. [42†]

²⁴Setengah i bas anak-anakna nari cakapna enggo cakap Asdot ntah cakap si deban janah la ietehna cakap kami.

²⁵Kusuriangi dilaki-dilaki e, kusumpahi kupekpeki, janah kuruah bukna. Kenca bage kusuruh ia ersumpah i bas gelar Dibata maka ndigan pe ia ntah anak-anakna la siempon ras bangsa si deban.

²⁶Ningku, “Diberu bangsa si deban nge nai erbahanca maka Raja Salomo erdosa. Ia belinen asa kerina raja-raja negeri si deban. Keleng ate Dibata man Salomo janah ibahanna ia jadi raja kerina Israel. Amin bage gia ndabuh ka ia ku bas dosa bekas pemabai diberu-diberu bangsa si deban. [43†]

²⁷Patut kin dage iusih kami kam janah la ngikutken Dibatanta alu ngempoi diberu bangsa si deban?”

²⁸Joyada anak Imam si Mbelin Eliasip. Sekalak i bas anak Joyada ngempoi anak Sanballat i kuta Bet Horon nari. Erkiteken si e kupelawes Joyada i Jerusalem nari. [44†]

²⁹O Dibatangku, ingetlah uga kalak e ngeliami jabaten keimamen ras perpadanen si ibahanNdu ras imam-imam bage pe kalak Lewi.

³⁰Kubersihken bangsa e i bas kasa pengaruh bangsa si deban nari, kusikapken peraturen imam-imam ras kalak Lewi gelah sekalak-sekalak meteh tugasna.

³¹Kuaturken gelah ranting si ipake guna nutung persembahen ola terlambat ibaba, bage pe gelah ibaba bangsa e buah gandum ras buah pangan si pemena tasak jadi persembahenna. O Dibatangku, ingetlah min kerina si enda gelah tama kiniulinku.