Read Batak Karo NEHEMIA 2 Bible Online

NEHEMIA 2 - Batak Karo bible

NEHEMIA 2

¹I bas sada wari, empat bulan kenca si ndai, asum Raja Artaserses sangana man, kubaba anggur man bana. Ope denga si e, langa pernah idah raja ayongku serbut,

²e maka nungkun ia nina, “Engkai maka serbut ayondu? Kam labo sakit, e maka ugapa pe gulut nge ukurndu.” Sengget kal aku

³e maka ningku ngaloi, “Mejuah-juahlah kam rasa lalap, Raja! Banci kin la serbut ayongku adi kuta ingan nini-niningku ikuburken enggo sontar janah pintu-pintu gerbangna enggo keri ipan api?” [3†]

⁴Nungkun raja man bangku, “Kai dage atendu?” Ertoto aku man Dibata Surga,

⁵janah kenca bage ningku man raja, “Adi metunggung akapndu aku, janah adi mehuli iakapndu nehken pemindonku, berelah aku lawes ku negeri Juda ku kuta ingan nini-niningku ikuburken, gelah banci kupajekken mulihi kuta e.”

⁶Pemindonku e ialoken raja ras kemberahenna si sangana kundul deherken ia. Isungkun raja aku uga dekahna aku lawes janah ndigan ka aku mulih. E maka kuturiken man bana.

⁷Kenca bage kupindo perkuah ate raja gelah iberekenna man bangku surat perentah guna isehken man gubernur-gubernur i propinsi Eprat Barat, gelah isampatina aku i bas perdalanenku ku Juda.

⁸Tambah si e kupindo pe surat perentah si man sehenken man si Asap pengawas kerangen kerajan, gelah isikapkenna man bangku kayu guna pintu-pintu gerbang benteng Rumah Pertoton, guna tembok kuta e, ras rumah man inganku. Kerina pemindonku e ibereken raja, sabap Dibata nemani aku.

⁹Kenca bage berkat aku ku propinsi Eprat Barat. Raja nuruh piga-piga kalak perwira ras sada pasuken tentera si erkuda nemani aku. E maka kubereken me surat raja man gubernur-gubernur e.

¹⁰Tapi Sanballat, anak kuta Bet Horon, ras Tobia, pegawai i propinsi Amon, megi maka enggo lit sekalak si reh erdahin guna kiniulin bangsa Israel, e maka nembeh kal atena.

¹¹Kuterusken perdalanenku ku Jerusalem, janah telu wari dekahna

¹²la kuturiken man ise pe sura-sura si enggo ipeturah Dibata i bas pusuhku guna Jerusalem. Tengah berngi keke aku jenari lawes ndarat ras piga-piga kalak teman. La lit asuh-asuhen ibaba kami seakatan kelede si kuersak.

¹³Berngi gelap denga asum aku nadingken kuta arah Gerbang Baluren si arah Barat. Jenari lawes aku ku Selatan mentasi Ulu Lau Naga, terus ku Gerbang Sampah. Sanga erdalan, kupepayo tembok-tembok kuta si enggo runtuh ras pintu-pintu gerbangna si enggo ceda ipan api.

¹⁴Kenca bage lawes aku ku Gerbang Ulu Lau ras Kolam Raja. Tapi kelede si kuersak e la lit dalanna mentas arah tembok si enggo runtuh e.

¹⁵E maka ngincuah aku ku Baluren Kidron, janah i jenari me kupepayo tembok e. Kenca bage mulihken aku arah dalanku ndai ka, jenari bengket ku bas kuta arah Gerbang Baluren.

¹⁶La lit sekalak pe pegawai-pegawai si meteh kai si kulakoken. Kidekah si e la lit kai pe kukataken man senina-seninangku kalak Jahudi, subuk man imam-imam, peminpin-peminpin, pegawai-pegawai, ntah kalak si deban si nandangi muat bagin i bas dahin e.

¹⁷Tapi dungna kukataken man bana kerina, ningku, “Nehenlah uga susahna siakap genduari erkiteken Jerusalem lalap langa ipekena kenca kin nai tembokna runtuh dingen gerbangna ipan api. Sipajekkenlah mulihi tembok kuta e maka olanai kalak megombang man banta.”

¹⁸Janah kuturiken man bana uga Dibata nemani aku ras nampati aku, dingen kai si enggo ikataken raja man bangku. Ngaloi kalak ndai, “Ota, sipajekken mulihi!” E maka ersikap ia minter kerina menaken dahin si mehuli e.

¹⁹Tapi asum Sanballat, Tobia, ras sekalak kalak Arab, si Gesem gelarna, megi kai ate kami ibahan kami, itawa-tawaina kami, janah nina, “Kai kin akapndu si ibahanndu e? Ngelawan raja kin atendu?”

²⁰Ngaloi aku, “Dibata Surga kap pagi si erbahanca maka seh sura-sura kami. Kami enda suruh-suruhenNa, e maka ibenai kami ate kami pekenasa mulihken; tapi kam labo lit sitik pe hakndu kerna taneh i Jerusalem, janah ibas peradaten pe labo kam atan.”