Read Batak Karo NEHEMIA 4 Bible Online

NEHEMIA 4 - Batak Karo bible

NEHEMIA 4

¹Kenca Sanballat megi maka kami kalak Jahudi enggo mulai majekken tembok e mulihi, merawa kal atena janah iuru-uruna kami.

²I lebe-lebe teman-temanna ras tentera Samaria nina, “Kai ka kin si ibahani kalak Jahudi si la ergegeh enda? Ipajekkenna ka kin atena mulihi kuta e? Banci kin akapna arah mpersembahken persembahen ndungi dahin e i bas sada wari? Banci kin ibahanna gedung batu i bas sampah-sampah si enggo meseng nari?”

³Tobia si sangana tedis deherken ia pe ngerana nina, “Kai pe ibahanna labo tuhu! Biang pe lompat ku das minter nge runtuh tembokna ah!”

⁴E maka ertoto aku ningku, “O, Dibata kami, begikenlah uga penguru-nguruna kami. Bahanlah maka penaling-nalingna e ndabuh mulihi ku takalna. Pelepaslah maka kasa sikerajangenna keri irampasi kalak, janah bahanlah maka ia ibuang ku negeri si deban.

⁵Ola alemi kejahatenna janah ola lupaken dosa-dosana, sabap enggo megombang ia man kami si sangana majekken tembok e.”

⁶Dage iterusken kami me pekena tembok e, janah lanai ndekahsa enggo dung setengah asa ganjangna, sabap ergiah-giah ukur bangsa e erdahin.

⁷Kenca Sanballat, Tobia, bage pe kalak Arab, kalak Amon, ras kalak Asdot megi maka dahin kami pekena tembok Jerusalem terus erdalan alu mehuli, janah bagin-bagin tembok si rontas pe enggo itutupi, e maka merawa kal atena.

⁸E maka erpekat ia kerina lako merang Jerusalem gelah guntar,

⁹tapi ertoto kami man Dibata janah isuruh kami kalak gelah tetap erjaga-jaga suari ras berngi nandangi kalak ndai.

¹⁰I bas kalak Juda lit sada ende-enden bagenda: “Enggo ngelabuh kita ngangkati baban si mberat; janah melala denga kal batu si man pindahenken. Uga denga ninta majekken tembok e?”

¹¹Iakap musuh maka labo kami erpemeteh, janah labo idah kami ia ope denga ia seh i tengah-tengah kami lako munuhi kami dingen pengadi dahin e.

¹²I bas paksa ku paksa kalak Jahudi si ringan i tengah musuh-musuh kami reh mpersingeti kami kerna rencana musuh-musuh e ngelawan kami.

¹³Erkiteken si e kusuruh bangsa e erpedang, erlembing, ras erpanah, janah kusuruh ia erjaga rikutken terpuk-terpukna arah pudi tembok si langa dung.

¹⁴Kuidah maka bangsa e mbiar, e maka kukataken man bana kerina ras man peminpin-peminpinna bage pe man pegawai-pegawaina, “Ola kam mbiar man musuh-musuhta. Inget uga belinna ras gegehna Tuhanta, e maka erjuanglah guna senina-seninanta sada bangsa, guna anak-anakndu, ndeharandu ras rumahndu.”

¹⁵Musuh-musuh kami megi maka enggo tereteh man kami kerna perpekatenna janah sadar ia maka Dibata enggo naluken rencanana. Kenca bage mulih ka kami kerina pekena tembok e.

¹⁶Mulai paksa e nari setengah si ras aku erdahin janah setengah nari ka tedis erjaga-jaga erpaken baju besi, dingen erlembing, erampang-ampang, ras erpanah. Peminpin-peminpin kami pegegehi ukur kalak

¹⁷si sangana erdahin pekena tembok kuta e. Kalak si dahinna ngangkati bahan-bahan bangunen e pe erdahin alu sada tan, janah alu tanna si sada nari njemak senjata.

¹⁸Janah kerina tukang batu nggenditken pedang i bas awakna. Kalak si tugasna ngembus terompet tanda bahaya tedis deherken aku.

¹⁹Kukataken man bangsa e bage pe man pegawai-pegawaina ras man peminpin-peminpinna ningku, “Dahin e merap tuhu-tuhu i bas sada ingan si mbelang seh maka ndauh kita sirang sada ras si debanna i babo tembok e.

²⁰E maka adi ibegindu sora terompet, minter kam pulung ku sekelewetku. Dibatanta kap si erperang guna kita.”

²¹Dage tep-tep wari, mulai erpagi-pagi si lampas nari seh teridah bintang i bas bernginna setengah kami erdahin i bas tembok e, janah setengah nari tedis erjaga-jaga alu erlembing.

²²Kidekah e kukataken man kalak si ertugas maka ia ras kerina kalak si nampati ia arus erberngi i Jerusalem, gelah banci ikawal kami kuta sanga berngi jenari erdahin paksa suari.

²³Berngi pe la kutangtangi pakenku, janah bage ka pe ibahan teman-temanku, suruh-suruhenku ras pengawalku. Janah katawari pe sikap ibahan kami senjata kami kerina.