Read Batak Karo NEHEMIA 5 Bible Online

NEHEMIA 5 - Batak Karo bible

NEHEMIA 5

¹Piga-piga paksa kenca si e, subuk dilaki bage pe diberu, mulai jungut-jungut kerna teman-temanna kalak Jahudi.

²Deba ngatakenca nina, “Keluarga kami nterem, e maka perlu kami melala gandum man nakan kami, gelah ola kami mate.”

³Si deban ka nina, “La banci lang igadeken kami juma kami, peken anggur kami gelah banci kami dat gandum maka ola kami mate la man.”

⁴Lit denga ka pe si deban ngatakenca, “La banci lang kami minjam duit guna nggalari pajak si ipindo raja kerna juma ras peken anggur kami.

⁵Kami sada dareh nge ras senina-senina kami kalak Jahudi. Ma seri nge ulina anak-anak kami ras anak-anakna? Tapi terpaksa ibere kami anak-anak kami jadi budak kalak. Piga-piga kalak anak kami si diberu enggo me deba idayaken jadi budak. Kami sitik pe lanai ergegeh ngelawan si e, sabap juma kami ras peken anggur kami enggo man kalak.”

⁶Kenca kubegi kelsehen kalak e, merawa kal ateku,

⁷janah kuputusken erbahan sada tindaken. Kutembehi pengulu-pengulu ras pegawai-pegawai bangsa e janah ningku man bana, “Uga maka ipindondu bunga si mesangat man senina-seninandu?” Jenari kupepulung jelma si nterem guna encakapken si e, [4†]

⁸janah ningku, “Kidekah enda, asa ngasup kami enggo itukur kami senina-seninanta kalak Jahudi si la banci lang ndayaken bana jadi budak bangsa si deban. Genduari kam jine maksa senina-seninandu e ndayaken bana man bandu!” Sinik kerina pengulu-pengulu e janah la ia ngasup ngerana sengkebabah pe.

⁹Kenca bage ningku, “Salah kap perbahanenndu e! Arusna mbiar kam man Dibata janah ngelakoken kai si benar. Adi bage tentu la iberendu dalan man musuh-musuhta kalak perbegu ah megombang man banta.

¹⁰Aku ras teman-temanku bage pe kalak si erdahin ras aku enggo minjamken duit ras gandum man bangsanta. Genduari lanai pada sipindo galarna.

¹¹Sasapkenlah kerina utang kalak e man bandu, subuk duit, gandum, anggur bage pe minak saitun. Janah ulihkenlah minter man bana jumana, peken anggurna, peken saitunna bage pe rumahna!”

¹²Ngaloi pengulu-pengulu e, “Uga nindu bage idalanken kami. Kerina erta-erta e iulihken kami, janah la ipindo kami utangna.” Kenca bage kudilo imam-imam, jenari kusuruh kalak e ersumpah i lebe-lebe imam-imam e maka icikepna kai si enggo ipadankenna.

¹³E maka kutangtangi bentingku jenari kukisamken, janah ningku, “Ise kam si la ncikep padanndu, bagenda me kam pengkisamken Dibata. Ibuat Dibata rumahndu ras kasa kai sikerajangenndu, janah kai pe la lit itadingkenNa i bas kam.” E maka ngaloi kerina si pulung e nina, “Amin!” jenari ipujina TUHAN. Kerina pengulu-pengulu e nehken si ipadankenna.

¹⁴Kidekah si sepuluh dua tahun aku jadi gubernur Juda, i bas tahun si pedua puluhken seh tahun si petelu puluh duaken pemerentahen Raja Artaserses, aku ras kade-kadengku la man pangan si jadi hakku selaku sekalak gubernur.

¹⁵Tiap gubernur si ertugas ope denga aku, ia jadi baban si mberat man jelma si nterem, janah ituntutna empat puluh duit pirak tiap wari man penukur pangan ras anggur. Suruh-suruhenna pe nindih jelma si nterem. Tapi aku la bage perbahanenku, sabap mbiar aku Dibata.

¹⁶Kerina gegehku kupake lako pekena tembok e, janah selambar juma pe la lit kubuat man bangku. Janah kerina kalak si erdahin ras aku kusuruh ikut i bas dahin pekena tembok e.

¹⁷Temue si man berenken nakan tetap lit seratus lima puluh kalak Jahudi ras pengulu-penguluna, tambah-tambah kerina kalak si reh ndahi aku i bas negeri-negeri sekelewet Juda nari.

¹⁸Bengkau si man pekenan tep-tep wari e me sada lembu, enem biri-biri si mejilena, ras melala manuk janah sepuluh wari sekali kusikapken anggur si mbaru. Tapi kueteh uga beratna tanggungen jelma si nterem, e maka la kubuat belanja si arusna kin jadi sikerajangen gubernur.

¹⁹O Dibatangku, erkiteken kasa kai si enggo kubahan man bangsa enda, ingetlah min aku, gelah tambah kesangapenku.