Read Batak Karo NEHEMIA 8 Bible Online

NEHEMIA 8 - Batak Karo bible

NEHEMIA 8

¹Kenca enggo seh bulan si pepituken kerina kalak Israel enggo ringan i bas kuta pengulihenna. I bas wari si pemena bulan e, kerina ia pulung i Jerusalem, i tengah kesain deherken Gerbang Lau. Ipindo kalak ndai man Esra, e me sekalak imam dingen ahli Undang-undang si ibereken TUHAN man Israel arah Musa, gelah i buatna kitap Undang-undang e.

²E maka ibaba Esra kitap e ku perpulungen ndai, i ja enggo pulung subuk dilaki, diberu, bage pe danak-danak si enggo ngasup ngantusisa.

³Alu ngala kempak jelma si pulung i bas kesain deherken Gerbang Lau e, iogeken Esra Undang-undang ndai mulai matawari pultak nari seh ciger, janah kerinana megikenca alu tutus.

⁴Esra tedis i das sada mimbar si enggo ibahan guna keperlun si e. Kalak si tedis arah kemuhenna e me: Matitia, Sema, Anaya, Uria, Hilkia ras Maaseya; janah si tedis arah kawesna e me: Pedaya, Misael, Malkiya, Hasum, Hasbaddana, Sakaria ras Mesullam.

⁵Sanga Esra tedis i das mimbar kerina kalak ngidahsa sabap ganjangen ia asang kerina kalak ndai. Kenca italangina kitap e, minter kalak ndai tedis kerina.

⁶Nina Esra, “Pujilah TUHAN, Dibata si Mbelin!” Kerina kalak ndai ngangkat tanna janahna ngaloi, “Amin! Amin!” Jenari nembah erjimpuh ia kerina, ayona seh ku taneh.

⁷Kenca bage keke ia kerina, tedis ia i bas inganna sekalak-sekalak, janah kalak Lewi si tersena i jenda nerangken Undang-undang e man bana, e me: Jesua, Bani, Serebia, Jamin, Akkub, Sabbetai, Hodia, Maaseya, Kelita, Asaria, Josabat, Hanan ras Pelia.

⁸Langsung iterjemahken kalak ndai Undang-undang Dibata e, jenari iterangkenna seh maka kerina kalak ndai ngangkasa.

⁹Kenca ibegi kalak ndai kai si ikataken i bas Undang-undang e, tangis ia kerina. E maka Nehemia gubernur tupung si e, ras Esra sekalak imam dingen ahli Undang-undang, bage pe kalak Lewi si nerangken Undang-undang e, ngataken man bana kerina nina, “Wari enda e me sada wari si badia man TUHAN Dibatandu. E maka ola kam tangis ntah pe erceda ate.

¹⁰Genduari mulihlah ku rumah janah man-manlah kam. Rasken panganndu ras anggurndu ras kalak si kekurangen. Sendah e me wari si badia man TUHANta, e maka ola ceda atendu. Keriahen si ibereken TUHAN man bandu erbahanca kam megegeh.”

¹¹Kalak Lewi niar-niar lako pesinik jelma si nterem janah ngatakenca gelah ola erceda ate i bas wari si bage badiana.

¹²E maka kerina ia mulih ku rumah jenari man ras minem alu meriah ukur janah iraskenna sikerajangenna ras kalak si deban, sabap angkana kai si enggo iogeken man bana.

¹³Papagina, kepala-kepala terpuk, rikut ras imam-imam ras kalak Lewi, lawes njumpai Esra guna mpelajari pengajaren Undang-undang e.

¹⁴Datca maka Undang-undang si ibereken TUHAN arah Musa, merentahken bangsa Israel gelah tading i bas Sapo-sapo kidekah Wari Raya Sapo-sapo i bas bulan si pepituken. [7†]

¹⁵E maka ibereken kalak ndai perentah-perentah si tersurat arah teruh enda, jenari ikiremkenna ku belang kuta Jerusalem ras kuta-kuta si deban bage pe ku kuta-kuta. Perentah e, e me: “Laweslah ku uruk-uruk jenari buatlah dahan-dahan tusam, dahan saitun, dahan mirt, bulung kurma, ras dahan kayu si deban si gupgup, lako mahan Sapo-sapo sue ras perentah si tersurat i bas Undang-undang.”

¹⁶E maka ibuat kalak ndai dahan-dahan jenari ibahanna Sapo-sapo i datas tarum rumahna, i kesain rumahna, i kesain Rumah Pertoton ras i taneh lapang deherken Gerbang Lau ras Gerbang Eperaim.

¹⁷Kerina kalak si enggo mulih i bas pembuangen e nari erbahan Sapo-sapo jenari ringan i bas. Enda me si pemenana kal ibahan kenca Josua anak Nun nai mate. E maka seh akapna riahna.

¹⁸Mulai i bas wari si pemena nari seh ku wari pendungi Wari Raya e, tep-tep wari ioge kalak ndai sada bagin i bas Undang-undang Dibata. Pitu wari dekahna kalak ndai ngerayakenca, janah i bas wari si pewaluhken ibahan acara pendungi, sue ras si iperentahken Undang-undang.