Read Batak Karo ESTER 1 Bible Online

ESTER 1 - Batak Karo bible

ESTER 1

¹Turi-turin enda jadi tupung paksa pemerentahen Ahasweros, raja Persia. Kerajanna lit 127 propinsi, mulai i India nari seh ku Etiopia. [1†]

²Ia merentah i Susan nari, ibukota Persia.

³I bas tahun si peteluken kenca ia jadi raja, ibahanna pesta man-man guna kerina pembesar ras pegawai-pegawaina. Tentera Persia ras Medi pe ikut i bas pesta e, bage pe gubernur-gubernur ras bangsawan-bangsawan i bas propinsi-propinsi nari.

⁴Enem bulan dekahna icidah-cidahkenna kebayaken istana kerajan rikut ras kemulianna si mbelin bage pe kehaganna si medolat.

⁵Kenca dung si e, ibahan raja ka pesta man-man guna kerina kalak si ringan i kuta Susan, subuk si bayak tah musil. Pesta enda ibahan i bas peken istana, pitu wari dekahna.

⁶Kesain istana ihiasi alu kire-kire uis biru ras mbentar, si iiket salu nali lenen halus, ungu rupana, janah igantungken ku tiang-tiang marmar salu cincin-cincin pirak. Bale-bale emas ras pirak, itama i bas kesain e. Lante kesain e ibahan i bas marmar mbentar, batu kristal megara, kulit mutiara si erndilap, ras batu meherga si deban nari.

⁷Inemen iidangken tare calung emas, tempasna kerina pelain-lain, janah raja seh kal melumbarna mereken inemen.

⁸Inemen si iidangken la lit sibarna. Enggo iperentahken raja man kerina pelayan istana maka tiap kalak arus iidangi sue ras pemindonna.

⁹Radu ras si e, i bas istana, Kemberahen Wasti pe erbahan pesta man-man guna kerina si diberu.

¹⁰I bas wari pepituken, tupung raja minem-minem, meriah kal iakapna. E maka idilona pitu kalak suruh-suruhenna si ertugas khusus guna raja, e me Mehuman, Bista, Harbona, Bigta, Abagta, Setar, ras Karkas.

¹¹Iperentahken raja ngelegi Kemberahen Wasti, tupung kemberahen e ermahkota denga. Kemberahen e seh kal jilena, e maka icidah-cidahken raja atena kinijilen kemberahenna man kerina pegawaina ras temuena.

¹²Tapi tupung suruh-suruhen ndai nehken perentah raja man Kemberahen Wasti, la ia nggit reh. Erkiteken si e nembeh kal ate raja.

¹³Bagi semalna adi lit persoalen, isungkun raja lebe kalak si meteh undang-undang. E maka idilona penasehatna, lako nungkunisa kai arus ibahan.

¹⁴Kalak si rusurna isungkunina e me Karsena, Setar, Admata, Tarsis, Meres, Marsena, ras Memukan; pituna kalak enda pembesar bangsa Persia ras Medi, si katawari pe banci ngadap man raja, janah pangkatna me si meganjangna i bas kerajan.

¹⁵Nina Raja Ahasweros man kalak ndai, “Enggo kusuruh juak-juakku ngelegi Kemberahen Wasti, tapi la ia nggit reh. Kuga nge arus ibahan man bana, sue ras undang-undang?”

¹⁶E maka nina Memukan man raja ras pegawai-pegawaina, “Alu perbahanenna e si tuhuna Kemberahen Wasti enggo megombang man raja ras man pegawai-pegawaina. Labo terjeng je saja, tapi kerina dilaki i bas kerajan enda pe enggo igombangina.

¹⁷Adi perbahanen kemberahen e enggo pagi seh beritana man kerina diberu-diberu i bas kerajan enda, ugapa pe lanai ia mehamat man perbulangenna. Sabap nina pagi, ‘Iperentahken raja kemberahenna ngadap, tapi la ia nggit reh.’

¹⁸Katawari pagi ndehara pembesar-pembesar Persia ras Medi megi kerna lagu langkah kemberahen e, i je ka nge minter iturikenna man perbulangenna. Erkiteken si e, ijapa pe pagi ndehara lanai mehamat man perbulangenna, janah perbulangen pe merawa-rawa man ndehara.

¹⁹Dage, adi mehuli iakapndu o raja, pedaratlah perentah maka Wasti lanai banci ndigan pe ngadap man raja. Perentahkenlah maka si e isuratken jadi undang-undang Persia ras Medi gelah lanai banci ndigan pe iubah. Kenca bage pangkatna selaku kemberahen ibereken man diberu si deban si ulin asangken ia.

²⁰Kenca perentahndu e imomoken i belang-belang kerajanndu si mbelin enda, tentu kerina ndehara mehamat man perbulangenna bagi patutna, subuk perbulangenna e bayak tah musil.”

²¹Usul si enda mehuli iakap raja ras pembesar-pembesarna. E maka minter ibahan raja bagi si ikataken Memukan.

²²Ku tep-tep propinsi kerajan ikiremken raja perentah i bas cakap ras tulisen penduduk propinsi e. I bas surat perentah e ikataken maka perbulangen nge pengulu i bas jabuna, janah kata perbulangen arus ibegiken.