Read Batak Karo ESTER 2 Bible Online

ESTER 2 - Batak Karo bible

ESTER 2

¹Piga-piga paksa kenca kejadin ndai, enggo me malem nembeh ate raja man Wasti. Tapi rusur iinget raja perbahanen Wasti bage pe ukumen si enggo ibahan man bana.

²Erkiteken si e nina piga-piga penasehat si ndeher ras raja, “O raja, si mehulina daramilah man bandu piga-piga kalak singuda-nguda si mejile rupana.

³Aturken min piga-piga pegawai i bas tep-tep propinsi i bas kerajan enda lako maba singuda-nguda si mejile e ku rumah ingan gundik-gundikndu i Susan, ibukota kerajan enda. Jenari Hagai, suruh-suruhenndu si ngurus kerina gundik-gundikndu, tugasken pekena-kena singuda-nguda e maka tambah jilena.

⁴Kenca bage buat apai atendu si ngenana, jadiken ia kemberahenndu nggantiken Wasti.” Ajar si enda mehuli iakap raja, jenari ibahanna bage.

⁵I kuta Susan lit sekalak kalak Jahudi, Mordekai gelarna. Gelar bapana Jair, i bas suku Benyamin nari, janah nini-ninina e me Kis ras Simei.

⁶Asum Nebukadnesar raja Babil, maba Joyakin raja Juda ku pembuangen i Jerusalem nari, rikut ras tabanen-tabanen si deban, Mordekai pe ikut i je. [2†]

⁷Turang Mordekai sembuyak bapa lit sekalak, Ester gelarna; gelar Heberna e me Hadasa. Ia sekalak singuda-nguda si mejile rupana, janah potongenna pe sikap. Tupung mate orang tuana, ibuat Mordekai ia jadi anak angkatna, jenari ipebelin-belinna bagi anakna kal.

⁸Kenca perentah raja imomoken, nterem singuda-nguda ibaba ku Susan, janah Ester pe ikut i je. Ia pe ibaba ku istana raja, jenari iendesken man Hagai si ertugas ngawasi rumah gundik raja.

⁹Ngena ate Hagai ngenen Ester, janah mehuli kal ia man bana. Erkiteken si e, pedas-pedas ipekena Hagai minak si mejile guna pekena-kena daging Ester ras ngaturken pangan si mehulina man bana. Iberekenna ingan si mehulina i bas istana janah isuruhna pitu kalak singuda-nguda pilihen i bas istana jadi suruh-suruhen Ester guna pekena-kenasa.

¹⁰Kidekah si e, sue ras ajar Mordekai, la lit man ise pe ituriken Ester maka ia kalak Jahudi.

¹¹Tep-tep wari Mordekai gawah-gawah i bas kesain rumah gundik e guna meteh uga kecibal Ester, janah kai si nandangi jadi man bana.

¹²Rikutken aturen, singuda-nguda e ipekena-kena lebe dagingna sada tahun dekahna gelah mejile. Enem bulan alu make minak wangi campur kumenen, janah enem bulan nari alu make minak si merim-merim si debanna. Kenca dung si e, ibaba man Raja Ahasweros rikutken gilirenna.

¹³Adi sekalak singuda-nguda berkat i bas rumah gundik e nari ku istana, banci ipakena uis si mehulina kal bagi atena ngena.

¹⁴Kari gelap bengket ia ku istana, janah pepagina ibaba ia ku rumah gundik si deban i teruh pengawasen Sahasgas, suruh-suruhen si njagai kerina gundik raja. Diberu si enggo ngadap man raja, lanai perlu ndahi raja, pala mesikel raja man bana janah ipindona alu ngataken gelar diberu e.

¹⁵Dage seh me paksana Ester ngadap raja. Ester anak Abihail, turang Mordekai sembuyak bapa, si enggo ipebelin-belinna bagi anakna jine. Kerina si enggo ngidah Ester, erngena ate man bana. Kenca enggo seh gilirenna, ipakena me pakenna sue ras si nikataken Hagai, pengawas rumah gundik raja.

¹⁶Dage i bas tahun si pepituken kenca Ahasweros jadi raja, i bas bulan pesepuluhken, e me bulan Tebet, ibaba me Ester ngadap Raja Ahasweros ku istana kerajan.

¹⁷Lebih asangken singuda-nguda si deban, senang dingen malem kal ate raja ibahan Ester. Erkiteken si e ia ngenca ate raja si kelengna dingen si ngenana. Itamaken raja mahkota ku takal Ester janah iangkatna ia jadi kemberahen nggantiken Wasti.

¹⁸Kenca bage ibahan raja pesta man-man si meriah guna pehagaken Ester, janah iundangna kerina kalak si mehaga ras pegawaina. Imomoken wari libur i belang-belang kerajan, janah ibagi-bagikenna hadiah-hadiah alu melumbar.

¹⁹Mordekai enggo iangkat jadi pegawai kerajan.

²⁰Tupung e langa ikataken Ester man ise pe maka ia kalak Jahudi, sabap bage ipadanken Mordekai man bana. Pedah Mordekai enda ipatuhi Ester kal, bali ras patuhna ia nai asum ia danak-danak denga ras Mordekai.

²¹Tupung Mordekai ertugas i bas istana, lit dua kalak suruh-suruhen si ersura-sura munuh Raja Ahasweros perban nembeh kal atena man raja. Suruh-suruhen si dua e, e me Bigtan ras Teres; tugasna njaga pintun i bas istana.

²²Sura-sura kalak enda ndai tereteh man Mordekai, e maka minter iturikenna man kemberahen Ester, jenari ituriken Ester ka minter man raja kai si ikataken Mordekai ndai.

²³E maka kenca iselidiki, tuhu payo si ikataken Mordekai ndai. Si dua kalak ndai iukum gantung i bas tiang gantungen. Kejadin enda isuratken i bas kitap sejarah kerajan sue ras perentah raja.