Read Batak Karo ESTER 4 Bible Online

ESTER 4 - Batak Karo bible

ESTER 4

¹Kenca ieteh Mordekai kerina si enggo jadi, icaingkenna bajuna tanda atena ceda. Kenca bage ipakena uis guni, icaburkenna abu ku takalna, jenari erdalan ia ku tengah kuta janahna ngandung nderkuh-nderkuh alu pusuh getem.

²Dungna seh me ia i kerabangen istana. La ia ku bas, sabap la ise pe banci bengket adi make uis guni.

³I belang-belang kerina propinsi, i ja kenca perentah raja e imomoken, minter terbegi sora tangis megang i bas kalak Jahudi. Erpuasa ia, tangis ras ngandung, janah menam kerina make uis guni.

⁴Asum suruh-suruhen Ester si diberu ras si dilaki nuriken perbahanen Mordekai e man bana, lesek kal atena. Ikiremkenna uis man paken Mordekai gelah itangtangina uis guni e, tapi la nggit Mordekai ngalokenca.

⁵Kenca bage idilona Hatah, sekalak dilaki si itugasken raja jadi suruh-suruhen Ester, jenari isuruhna ia njumpai Mordekai lako ngorati kai si enggo jadi janah ngkai maka bage perbahanenna.

⁶Lawes Hatah njumpai Mordekai i bas taneh lapang deherken kerabangen istana.

⁷Ituriken Mordekai kerina si enggo jadi, bage pe asa kai buena duit si ipadanken Haman lako iberekenna man perbendaharan raja adi kerina kalak Jahudi enggo ibunuh.

⁸Ibereken Mordekai man Hatah salinen surat raja si enggo imomoken i Susan. I bas surat e iperentahken maka kerina kalak Jahudi arus ikernepken. Ipindo Mordekai maka salinen surat perentah e ibereken man Ester janah gelah iterangkenna uga kecibalna si tuhuna. Tole ipindo Mordekai gelah lawes Ester ngadap raja lako mindo perkuah ate raja nandangi bangsana kalak Jahudi.

⁹Kenca bage mulihken Hatah ku istana, iturikenna man Ester kai si ikataken Mordekai ndai.

¹⁰Jenari isuruh Ester ka ia mulihken ndahi Mordekai nehken berita enda;

¹¹nina Ester, “Asa kai kalak si ndahi raja alu la leben idilo raja, subuk dilaki, bage pe diberu, arus iukum mate. Enda me aturen; janah aturen si enda kerina kalak metehsa, mulai i bas penasehat-penasehat raja nari terus ku kalak si ringan i propinsi-propinsi. Sada ngenca dalan pulah i bas aturen e nari, e me: adi idudurken raja ciken emas kerajan man bana lako ndilosa, e maka la ia ibunuh. Tapi enggo lit sebulan dekahna aku la idilo raja.”

¹²Kenca ialoken Mordekai kata Ester enda ndai,

¹³itenahkenna ka mulihken kata pertenget enda nina, “Ola iarapkenndu maka kam sikapen asangken kalak Jahudi si deban erkiteken kam ringan i bas istana.

¹⁴Adi sinik pe kam i bas paksa-paksa si bagenda, ugapa pe reh nge penampat man kalak Jahudi tah i ja nari gia, janah kalak Jahudi e la banci lang selamat nge; tapi kam ugapa pe mate, janah keluarga si itadingken bapandu imasapken. Banci jadi guna nampati bangsandu nge maka kam enggo iangkat jadi kemberahen.”

¹⁵E maka itenahken Ester perkatan enda man Mordekai,

¹⁶“To, pepulunglah kerina kalak Jahudi si lit i kuta Susan enda; ertoto dingen erpuasalah kam kerina guna aku. Ola kai pe pan tah iinemndu telu wari telu berngi dekahna. Aku ras suruh-suruhenku si diberu pe bage ka ibahan kami. Kenca bage lawes aku ndahi raja, aminna gia e ngelanggar aturen. Adi terpaksa kin aku mate guna si e; mate pe labo dalih.”

¹⁷Kenca bage lawes Mordekai, jenari ibahanna kai si nikataken Ester ndai.