Read Batak Karo ESTER 5 Bible Online

ESTER 5 - Batak Karo bible

ESTER 5

¹I bas wari peteluken sanga puasa ndai, ipake Ester paken kemberahen, jenari lawes ia ku kesain istana si arah bas. Tedis ia i je ngalaken kamar kursi kinirajan. Raja sangana kundul i bas kursi kinirajan, ngala kempak dalan bengket ku kamar e.

²Tupung raja ngidah kemberahen Ester tedis idarat, jadi kal atena ngenenca, e maka idudurkenna kempak Ester ciken emas kinirajan. Minter ideheri Ester, ikuitna ujung ciken e.

³Isungkun raja ia nina, “Kai atendu, Kemberahen? Turiken sura-surandu; aminna setengah pe kerajan enda, tentu kubereken man bandu.”

⁴Nina Ester ngaloi, “Adi meriah ukurndu raja, reh min kam ras Haman berngi enda ku pesta man-man si enggo kusikapken bandu.”

⁵E maka minter iperentahken raja ngelegi Haman, gelah banci ia ras-ras nehken sura-sura Ester. Dage berkat me raja ras Haman ndahi pesta si nisikapken Ester.

⁶Sangana minem-minem anggur, nungkun raja man Ester nina, “Turiken dage kai sura-surandu maka kubereken. Aminna setengah pe kerajanku ipindondu la aku ertahan.”

⁷Ngaloi Ester nina,

⁸“Adi keleng atendu aku, janah adi meriah ukurndu, kupindo man bandu alu meteruk ukur maka reh ka min kam pagi ras Haman ku pesta man-man si enggo kusikapken man bandu. I je pagi kuturiken kai kin si tuhuna sura-surangku.”

⁹Asum Haman lawes i bas pesta man-man e nari, meriah kal ukurna, janah senang kal akapna. Tapi tupung iidahna Mordekai i bas pintu gerbang istana, janah la ia tedis lako encidahken kehamatenna tupung ia mentas, seh kal rawana ate Haman man Mordekai.

¹⁰Tapi isabarina ukurna janah terus ia mulih ku rumah. Kenca bage idilona teman-temanna ku rumahna, janah isuruhna pe ndeharana Seres ikut ras.

¹¹Ipujikenna bana man teman-temanna, dingen imegahkenna kebayakenna, anakna si nterem, kerna pangkat si meganjang si enggo ibereken raja man bana. Janah iturikenna pe maka ndauh kal ia pentingen asangken pembesar-pembesar si deban i bas kerajan e.

¹²Tole nina, “I babo si e kerina, la lit man ise pe ibahan Kemberahen Ester man-man seakatan man raja ras aku, janah pagi pe iundangna denga ka kami.

¹³Tapi la lit kuakap ertina si enda kerina adi kuidah denga Mordekai kalak Jahudi ah ndai kundul i bas pintu gerbang istana.”

¹⁴E maka ikataken ndeharana ras teman-temanna man bana nina, “Suruh saja maka ibahan tiang gantungen dua puluh dua meter ganjangna. Pagi erpagi-pagi, banci ipindondu maka Mordekai igantung i je, janah kenca si e banci kam berkat ku pesta man-man e alu meriah ukur.” Mehuli kal akap Haman usul enda, e maka isuruhna gelah ipajekken sada tiang gantungen.