Read Batak Karo ESTER 6 Bible Online

ESTER 6 - Batak Karo bible

ESTER 6

¹I bas berngi si ndai raja la banci tertunduh, e maka iperentahkenna gelah ilegi cataten sejarah kerajan gelah iogeken man bana.

²I bas bagin si iogeken e lit tersinget maka pernah nai ikataken Mordekai kerna persekongkolen guna munuh raja, persekongkolen si ilakoken Bigtana ras Teres, duana suruh-suruhen raja si ngawal pintun i bas istana. [3†]

³Nungkun raja nina, “Pernah kin Mordekai dat pujin tah pangkat erkiteken jasana e?” Ngaloi suruh-suruhen ndai nina, “La lit pernah kai pe ibahan man bana.”

⁴“Ise genduari pegawaiku si lit i bas istana?” nina raja nungkun. Tupung si e rembang kal Haman bengket ku bas kesain istana. Ia reh lako mindo gelah Mordekai igantung i bas tiang gantungen si mbaru denga dung ipajekkenna.

⁵E maka nina suruh-suruhen e, “Haman sangana i kesain, atena njumpai kam.” “Suruh ia ku bas,” nina raja.

⁶Bengket Haman ku bas istana, jenari nina raja man bana, “Lit sekalak jelma; ateku mereken kehamaten man bana. Kai nge akapndu patut kubahan man bana?” Rukur Haman nina i bas ukurna, “Ise ka kin banci ipehaga raja lebih asangken aku? Tentu aku ngenca!”

⁷ [7-8] Erkiteken si e nina man raja. “Buatlah paken kerajan si meherga si biasa ipakendu. Jenari perentahken gelah ilegi kudandu, janah tamaken mahkotandu ku takal kuda e.

⁹Kenca bage dilo sekalak pembesar kerajan si meganjangna pangkatna lako makeken pakenndu ndai man kalak si ipehagandu atendu e. Kenca ipakena, iersakna kudandu, e maka pembesar ndai ngarakken ia arah tengah-tengah kuta janahna ersurak-surak nina, ‘Nehenlah bagenda me perbahan raja nandangi kalak si ipehagana!’ ”

¹⁰Kenca bage nina raja kempak Haman, “To pedasken legi paken kerajan ras kudangku, jenari bereken kehagan si bage man Mordekai kalak Jahudi e. Bahanlah kai si ikatakenndu ndai ola kurangi sitik pe. Banci ijumpaindu ia i bas dalan bengket ku istana; ia sangana kundul i je.”

¹¹E maka ilegi Haman paken kerajan ras kuda raja, ipakekenna man Mordekai, iarakkenna Mordekai ngersak kuda raja arah tengah-tengah kuta. Janah tupung kalak enda erdalan, ersurak-surak Haman nina, “Nehenlah, bagenda me perbahanen raja nandangi kalak si ipehagana!”

¹²Kenca dung si e, mulih Mordekai ku kerabangen istana, janah Haman pedas-pedas mulih ku rumahna. Mela kal akapna, e maka itamburina ayona.

¹³Iturikenna kerina si enggo jadi man ndeharana ras man teman-temanna. Nina ndeharana ras teman-temanna si pentar e, “Kuasandu enggo mulai ndabuh man Mordekai. Ia kalak Jahudi, e maka labo terlawanndu ia. Ugapa pe talu nge kam ibahanna.”

¹⁴Tupung kalak enda ndai sangana ngerana denga, reh suruh-suruhen i bas istana nari ngelegi Haman. Pedas-pedas Haman itaruhkenna ku pesta man-man si isikapken Ester.