Read Batak Karo ESTER 8 Bible Online

ESTER 8 - Batak Karo bible

ESTER 8

¹I bas wari e ibereken Raja Ahasweros man Kemberahen Ester kerina erta Haman, musuh kalak Jahudi e. Janah Mordekai pe enggo banci ngadap man raja kenca ituriken Ester kuga perkade-kadenna ras Mordekai.

²Itangtangi raja cincin stempelna (si enggo ipindona mulihi i bas Haman nari) jenari iberekenna man Mordekai. E maka ibereken Ester tugas man Mordekai lako ngaturken erta Haman.

³Kenca bage ngerana ka Ester man raja alu erjimpuh mungkuk i bas tapak-tapak nahe raja janahna tangis. Ipindona perkuah ate raja maka iolangina min rencana jahat nandangi kalak Jahudi si enggo ibahan Haman, kesusuren Agag.

⁴Idudurken raja tongkat emas man Ester, e maka tedis ia, janah nina,

⁵“Adi meriah ukurndu o raja, adi keleng atendu aku, janah adi mehuli akapndu, ibahanndu min sada momo gelah perentah Haman ola sahun idalanken, sabap perentah si ibahan anak Hamedata, kesusuren Agag e, lakonna ngkernepken kerina kalak Jahudi i bas kerajan enda.

⁶I ja nge aku ngasup ngenenca adi cilaka e reh ngkenai bangsangku, janah kerina kade-kadengku ibunuh?”

⁷Kenca bage nina Raja Ahasweros kempak kemberahen Ester ras Mordekai kalak Jahudi e, “Tuhu enggo kugantung, Haman erkiteken sura-surana si jahat nandangi kalak Jahudi, janah ertana enggo kubereken man Ester.

⁸Tapi surat perentah si ibahan i bas gelar raja janah istempel alu stempel raja lanai banci itarik. Amin bage gia, banci ibahanndu surat man kalak Jahudi bagi akapndu mehuli. Surat e banci ibahanndu i bas gelarku janah istempel alu stempel raja.”

⁹I bas wari e pe, e me wari dua puluh telu bulan Siwan, minter idilo Mordekai kerina sekretaris raja. Iperentahkenna man erbahan surat man kalak Jahudi, bage pe man kerina gubernur, bupati ras pembesar-pembesar i bas kerina propinsi seratus dua puluh pitu e, mulai i India nari seh ku Etiopia. Surat e isehken ku tep-tep propinsi rikutken cakap ras tulisenna.

¹⁰Iperentahken Mordekai gelah surat e ibahan i bas gelar raja, jenari istempel alu stempel raja. Kenca dung isuruhna kalak naruhkenca alu ngersak kuda si megegeh kiam, si nibuat i bas karang kuda raja nari.

¹¹I bas surat e ituriken maka kalak Jahudi ibere raja pulung guna njagai dirina. Adi kalak si ersenjata merang ia, subuk bangsa kai gia si nerangsa janah i bas propinsi si apai gia, kalak Jahudi banci ngelawan, banci pe ngkernepken musuhna e ras ndeharana bage pe anak-anakna kerina. Banci ibunuh seh keri janah erta-ertana irampas.

¹²Perentah enda arus idalanken i belang-belang Kerajan Persia, i bas wari si enggo itetapken guna munuhi kalak Jahudi, e me i bas wari sepuluh telu bulan Adar, bulan si pesepuluhken.

¹³Perentah e ipedarat selaku undang-undang janah ipebetehken man kerina penduduk i bas tep-tep propinsi, gelah kerina kalak Jahudi ersikap ngelawan musuhna adi enggo seh wari si nitetapken e.

¹⁴E maka bekas perentah raja berkat me pertenahen-pertenahen alu ngersak kuda raja, iratuhna kudana kiam bagi angin. I kuta Susan pe, ibukota kerajan, perentah enda imomoken.

¹⁵Kenca bage ndarat Mordekai i bas istana nari make uis kerajan, biru ras mbentar rupana, janah jubahna uis lenen halus, ungu rupana. I bas takalna ipakena mahkota emas si mejile. Ngidah si e, kerina penduduk kuta Susan ersurak-surak dem keriahen.

¹⁶Kerina kalak Jahudi meriah akapna, senang ras longge ukurna, dingen puas pe akapna.

¹⁷I bas tiap kuta i tiap propinsi, i japa pe surat perentah raja e iogeken, meriah kal akap kalak Jahudi, janah irayakenna wari e alu kerja man-man si meriah. Janah nterem bangsa si deban bengket jadi kalak Jahudi sabap mbiar ia nandangi kalak Jahudi e.