Read Batak Karo ESTER 9 Bible Online

ESTER 9 - Batak Karo bible

ESTER 9

¹Dungna seh me wari sepuluh telu bulan Adar, wari si enggo itetapken lako ndalanken perentah raja. I bas wari e musuh-musuh kalak Jahudi ngarap maka banci engkuasai bangsa e. Tapi sebalikna, kalak Jahudi nge naluken musuh-musuhna.

²I bas tep-tep kuta inganna tading i bas kerajan e, pulung kalak Jahudi, janah ilawanna kerina kalak si merang ia atena. I japa pe mbiar kalak man bangsa Jahudi, janah la lit ise pe si ngasup ngelawanca.

³Terlebih ka pe erkiteken penguasa-penguasa propinsi, e me gubernur, bupati ras wakil raja i bas daerah e, kerina nampati kalak Jahudi sabap mbiar ia man Mordekai.

⁴Sabap i belang-belang kerajan enggo terberita maka mbelin kal pengaruh Mordekai i bas istana, janah kuasana pe reh belinna denga.

⁵Dage kalak Jahudi enggo rate-ate nandangi musuhna; ibunuhina alu pedang, ikernepkenna.

⁶I bas kuta Susan, ibukota kerajan, lit lima ratus kalak ibunuh bangsa Jahudi.

⁷[7-10] I bas kalak si ibunuhna e atan pe sepuluh kalak anak Haman kempu Hamedata, musuh bangsa Jahudi e me: Parsadata, Dalon, Aspata, Porata, Adalia, Aridata, Permasta, Arisai, Arida, ras Waisata. Tapi erta kalak la irampasi bangsa Jahudi.

¹¹Teremna si ibunuh kalak Jahudi minter iberitaken man raja i bas wari e.

¹²Jenari nina raja man Kemberahen Ester, “I bas kuta Susan saja lit lima ratus kalak ibunuh, atan sepuluh kalak anak Haman si dilaki, terlebih i bas propinsi-propinsi si deban, tah uga deba enggo ibahan kalak Jahudi. Genduari kai denga pemindonndu? Turikenlah kai tole sura-surandu, gelah kubereken.”

¹³Ngaloi Ester nina, “Adi mehuli akapndu, berelah maka pagi pe banci ka ilakoken kalak Jahudi bagi si sendah enda. Janah perentahken min maka sepuluhna mait anak-anak Haman igantung i bas tiang gantungen.”

¹⁴E maka iperentahken raja maka si enda ilakoken. Perentah enda ipedarat raja i kuta Susan janah mait anak-anak Haman pe igantung.

¹⁵Dage i bas wari e sepuluh empat bulan Adar, pulung ka kalak Jahudi si ringan i kuta Susan, jenari ibunuhna telu ratus kalak i bas kuta e. Tapi i bas si enda pe, la irampasna erta kalak.

¹⁶Kalak Jahudi si ringan i propinsi-propinsi pe pulung guna ngkawali kesahna. Ipulahina bana i bas musuhna nari alu munuh 75.000 kalak si ernembeh ate man kalak Jahudi. Tapi la irampasina ertana.

¹⁷Si enda jadi i bas wari sepuluh telu bulan Adar. Pepagina, e me i bas wari sepuluh empat, lanai lit si ibunuh, janah i bas wari e ibahan kalak Jahudi kerja man-man si meriah,

¹⁸Tapi kalak Jahudi si ringan i kuta Susan ngerayakenca wari sepuluh lima, erkiteken i bas wari sepuluh telu ras sepuluh empat ibunuhna denga musuh-musuhna, jenari i bas wari sepuluh lima ngadi ia.

¹⁹E me sabapna maka kalak Jahudi si ringan i bas kuta si kitik ngerayaken wari sepuluh empat bulan Adar jadi sada wari raya si meriah. I bas wari e ibahanna kerja man-man janah sipiring-piringen pangan ia sapih-sapih ia.

²⁰Kerina kejadin enda isuratken Mordekai, jenari ikiremkenna man kerina kalak Jahudi i bas Kerajan Persia, subuk si ndauh bage pe si ndeher.

²¹I bas surat e iperentahkenna maka wari sepuluh empat ras sepuluh lima bulan Adar arus irayaken tiap tahun.

²²Sabap i bas wari e me bangsa Jahudi pulah i bas musuh-musuhna nari. I bas bulan e me paksa ceda ate ras aru ate enggo salih jadi keriahen ras kesenangen. Erkiteken si e wari-wari e arus irayaken alu kerja man-man ras pesta-pesta, dingen mereken pangan sada nandangi si debanna ras man kalak musil.

²³Dage perentah Mordekai iikutken bangsa Jahudi, e maka perayan e enggo jadi kebiasan tiap tahun.

²⁴Haman anak Hamedata, kesusuren Agag, musuh bangsa Jahudi e, enggo erbahan tikam tanduk si igelari “purim” guna netapken wari lako ngkernepken bangsa Jahudi; isasapken Haman atena bangsa e. [4†]

²⁵Tapi ijumpai Ester raja, e maka ipedarat raja perentah si tersurat; erkiteken si e sura-sura Haman si jahat nandangi bangsa Jahudi ersimulih engkenai ia; ia ras anak-anakna si dilaki igantung i bas tiang gantungen.

²⁶E me sabapna maka wari raya e igelari Purim. Erkiteken surat Mordekai bage pe erkiteken kerina si enggo jadi man bangsa Jahudi,

²⁷bangsa e erbahan peraturen guna ia ras kesusurenna, bage pe man kerina kalak si i-Jahudiken. Rikutken peraturen e, maka tiap tahun bangsa e arus ngerayaken si dua wari e, sue ras si enggo iperentahken Mordekai.

²⁸Itetapken ka pe maka tiap keluarga kalak Jahudi ras kesusurenna, arus nginget ras ngerayaken wari-wari Purim e i bas tiap propinsi ras kuta, seh asa lalap.

²⁹Kenca bage Kemberahen Ester, anak Abihail, radu ras Mordekai, erbahan surat si peduaken. Arah surat e, alu kuasa si lit i bas ia, Kemberahen Ester ngesahken surat si enggo leben isuratken Mordekai kerna wari Raya Purim.

³⁰Surat e itujuken man kerina kalak Jahudi, janah salinenna ikiremken ku 127 propinsi si lit i bas Kerajan Persia. Surat e ikiremken rikut ras pengarepen maka kalak Jahudi nggeluh alu dame ras mejuah-juah.

³¹I je ipedahken man kalak Jahudi ras kesusurenna gelah irayakenna wari Purim i bas paksa-paksa si payo, bali ras ia mpersingeti paksa-paksa puasa ras paksa-paksa erceda ate. Si enda iperentahken Mordekai ras Kemberahen Ester.

³²Perentah Ester si netapken peraturen-peraturen Purim isuratken i bas sada kitap.