Read Batak Karo KELUAREN 1 Bible Online

KELUAREN 1 - Batak Karo bible

KELUAREN 1

¹Enda me gelar-gelar anak Jakup si lawes ras ia ku Mesir, sekalak-sekalak ras keluargana: [1†]

²Ruben Simeon Lewi Juda

³Isakar Sebulon Benyamin

⁴Dan Naptali Gat Aser

⁵Kesusuren Jakup i bas si enda nari kerina lit pitu puluh kalak. Tapi Jusup enggo leben ringan i Mesir.

⁶Jenari mate me Jusup ras senina-seninana, bage pe kerina si sebekbek ras ia,

⁷tapi kesusurenna, e me kalak Israel, nterem kal anakna. Dungna enggo nterem kal ia janah megegeh pe, seh maka idemina negeri Mesir. [2†]

⁸Jenari erkuasa me i Mesir sekalak raja si mbaru, si la meteh sitik pe kerna Jusup. [3†]

⁹Ikatakenna man rayatna nina, “Kita enggo terancam ibahan bangsa Israel enda, sabap seh kal ia teremna janah megegeh pe.

¹⁰Kune kenca terjadi perang, banci jadi ipersadana arihna ras musuhta merangi kita, gelah banci ia lawes i bas negeri enda nari. Arus dage sidarami dalan gelah ola ia nteremsa.” [4†]

¹¹E maka isuruh bangsa Mesir me mandur-mandur pengawas kerja paksa guna nakiti ia alu mereken dahin si mberat man bangsa Israel. Kalak Israel ipaksa majekken kuta-kuta Pitom ras Ramses jadi pusat perbekalen man raja.

¹²Tapi reh kelekna bangsa Israel itindas, reh teremna ka ras reh ngasakna ia. E maka mbiar bangsa Mesir man bangsa Israel.

¹³[13-14] E maka iusahaken bangsa Mesir gelah latih akap bangsa Israel nggeluh alu maksaken ia alu perbudaken si kejam. Alu kejam ipaksana bangsa Israel erdahin majekken bangunen-bangunen bage pe erdahin i bas juma.

¹⁵Jenari iperentahken raja Mesir man Siprah ras Puah, e me dua kalak bidan si nampati diberu kalak Heber nina,

¹⁶“Adi isampatindu diberu kalak Heber mupus, bunuh anakna e adi dilaki; tapi adi diberu, pelepas saja nggeluh.”

¹⁷Tapi mbiar bidan-bidan e man Dibata, e maka la ipatuhina perentah raja; e maka ipelepasna saja anak si dilaki nggeluh.

¹⁸Erkiteken si e idilo raja bidan ndai duana jenari isungkunina nina, “Engkai maka bage perbahanenndu? Engkai maka la ibunuhndu kerina anak dilaki si tubuh?”

¹⁹Erjabap ia duana nina, “Diberu kalak Heber la seri ras diberu kalak Mesir; diberu kalak Heber murah kal akapna mupus, janah ope denga sada i bas kami seh i je, anakna enggo tubuh.”

²⁰[20-21] Erkiteken mbiar bidan-bidan enda man Dibata, e maka mehuli perbahanen Dibata man bana, janah iberena pe ia manteki jabuna sekalak-sekalak. Bangsa Israel terus ertambah-tambah ras reh gegehna.

²²Kedungenna ipedarat raja perentah man kerina rayatna nina, “Ambekkenlah kerina anak dilaki bangsa Heber si mbaru tubuh ku Lau Nil, tapi kerina anak diberu pelepas nggeluh.” [5†]