Read Batak Karo KELUAREN 10 Bible Online

KELUAREN 10 - Batak Karo bible

KELUAREN 10

¹Kenca bage ikataken TUHAN man Musa nina, “Dahilah raja. Enggo Kupemersik ukur raja ras pegawai-pegawaina, gelah banci Kucidahken kerina tanda kuasa enda i lebe-lebena,

²gelah arah e banci iturikenndu man anakndu ras kempu-kempundu kuga serana akap kalak Mesir enggo Kupermain-mainken alu tanda-tanda kuasa e. Alu bage kerina kam metehsa maka Aku kap TUHAN.”

³E maka lawes Musa ras Harun njumpai raja nina, “TUHAN Dibata kalak Heber ngataken, ‘Asa kai nari dekahna kam la nggit nembah man bangKu? Berelah bangsangKu lawes maka banci Aku isembahna.

⁴Adi lalap la iberendu, Kusuruh pagi labang reh ku negerindu enda.

⁵Lanai lang-lang buena seh maka kerina taneh ketamburen labang. Asa kai si langa icedaken udan baho e kerina pagi ipanganina, subuk bulung-bulung kayu si tading denga.

⁶Istana-istanandu idemina, bage pe kerina rumah-rumah pegawai ras rayatndu. Enda pagi lebihen asa si pernah iidah nini-ninindu.’ ” Kenca e erkusur raja, lawes ia.

⁷Nina pegawai-pegawaina man raja, “Asa kai nari dekahna ia nuhsahi kita? Berelah kalak Israel si dilaki lawes, gelah banci isembahna TUHAN Dibatana. La kin igejapndu maka Mesir enggo ceda?”

⁸E maka Musa ras Harun ibaba mulihi ngadap raja, janah ikataken raja man bana duana nina, “Banci kam lawes gelah isembahndu TUHAN Dibatandu. Tapi ise kin kam si lawes e?”

⁹Erjabap Musa nina, “Kerina kami lawes, subuk anak-anak kami, bage pe si enggo metua. Ibaba kami kerina anak-anak kami si dilaki ras si diberu, biri-biri ras kambing kami, bage pe lembu kami, sabap la banci lang ibahan kami pesta lako pehaga TUHAN.”

¹⁰Nina raja, “Ersumpah aku i lebe-lebe TUHAN, maka tetap la kubere ibabandu ndeharandu ras anak-anakndu! Enggo tangkas maka enggo ersada arihndu ngelawan raja.

¹¹Lang! Si dilaki saja ngenca banci lawes ersembah man TUHAN adi e kin sura-surandu.” Alu bage, Musa ras Harun ipelawesna ndarat i adep-adepen raja nari.

¹²Kenca bage nina TUHAN man Musa, “Angkatlah tanndu i babo taneh Mesir gelah reh labang, maka ipanganina kerina si turah, kerina si tading ibahan udan baho e.”

¹³Iangkat Musa cikenna e maka ibahan TUHAN angin rembus i Timur nari babo negeri e sada wari sada berngi dekahna. Nandangi erpagi-pagi ibaba angin e labang ndai.

¹⁴Erduyun-duyun ia reh, janah icinepina kerina negeri e. Ope denga si e la enggo pernah iidah kalak bage buena labang, janah ndigan pe la pernah nari bage. [25†]

¹⁵Itamburina taneh seh mbiring kerina teridah; ipanganina asa kai si itadingken udan baho e, bage pe asa kai buah kayu si lit i bas batangna. Lanai lit tading bulung-bulung si meratah, subuk i bas batang kayu bage pe i bas sinuan-sinuan i belang-belang negeri Mesir.

¹⁶Perban e pedas-pedas idilo raja si Musa ras Harun. Nina raja, “Aku enggo erdosa man TUHAN Dibatandu ras man bandu.

¹⁷Alemilah dosangku sekali nari saja janah ertotolah man TUHAN Dibatandu, gelah ipedauhNa ukumen si mberat enda i bas aku nari.”

¹⁸Itadingken Musa raja jenari ertoto ia man TUHAN.

¹⁹E maka iobah TUHAN angin Timur ku angin Barat si meter. Iangkutna labang ndai, iembuskenna ku Teluk Sues. Sada labang pe lanai lit tading i belang-belang Mesir.

²⁰Tapi mekeng ibahan TUHAN ukur raja, e maka la iberena kalak Israel lawes.

²¹Kenca bage nina TUHAN man Musa, “Pepinterlah tanndu kempak langit maka gelap si mesangat nutupi kerina negeri Mesir.”

²²Ipepinter Musa tanna kempak langit, e maka gelap me kerina taneh Mesir telu wari dekahna. [26†]

²³Kalak Mesir lanai siidahen sapih-sapih ia, e maka paksa e sekalak pe la lit si ndarat i bas rumahna nari. Tapi i ja kalak Israel ringan, i je lit terang.

²⁴Idilo raja me Musa, janah nina, “Banci kam lawes gelah isembahndu TUHAN; ndeharandu ras anak-anakndu banci lawes ras kam. Tapi biri-birindu, kambingndu, ras lembundu arus tading i jenda.”

²⁵Nina Musa erjabap, “Adi bage la banci lang isikapkenndu man kami asuh-asuhen guna persembahen gelehen ras persembahen tutungen si man persembahenken man TUHAN Dibata kami.

²⁶E maka labo banci bage. Arus ibaba kami kerina asuh-asuhen kami, sada pe la banci tading. I bas si e nari arus ipilih kami asuh-asuhen si man persembahenken man TUHAN Dibata kami. Janah ope denga kami seh i jah, langa bo iteh kami asuh-asuhen si apai si man persembahenken man baNa.”

²⁷Ipemersik TUHAN ukur raja, e maka la iberena lawes kalak Israel.

²⁸Nina raja man Musa, “To lawesken! Olanai ndigan pe kam kuidah! Adi kuidah denga kam, mate naring kam!”

²⁹“Payo katandu e,” nina Musa erjabap. “Lanai bo ndigan pe idahndu aku.”