Read Batak Karo KELUAREN 11 Bible Online

KELUAREN 11 - Batak Karo bible

KELUAREN 11

¹Kenca bage nina TUHAN man Musa, “Sada ukumen nari ngenca ateKu Kubereken man raja Mesir ras rayatna. Kenca si e labo saja terjeng iberena lawes ngenca, tapi ipelawesna nge pe.

²E maka katakenlah man kalak Israel gelah ipindona man tetangga-tetanggana barang-barang emas ras pirak.”

³Ibahan TUHAN maka melumbar kalak Mesir man kalak Israel; terlebih-lebih pe Musa, tuhu-tuhu mehaga kal ia iakap kerina pegawai-pegawai raja ras rayat Mesir.

⁴Ikataken Musa man raja nina, “Bagenda nina TUHAN, ‘Kira-kira tengah berngi Kubentasi me negeri Mesir;

⁵e maka mate kerina anak dilaki sintua i negeri Mesir, i bas anak raja nari, si mewarisi kursi kinirajan, seh ku bas anak dilaki sintua i bas anak budak si diberu si erdahin i bas batu penggiling gandum. Bage pe anak si pemena i bas asuh-asuhen mate kerina.

⁶I je terbegi me sora tangis si megang i belang-belang Mesir, si la kin enggo pernah jadi bage, janah lanai ndigan pe jadi bage.

⁷Tapi man kalak Israel ras asuh-asuhenna biang pe la nggit ngereng. I je itehndu me maka Aku, TUHAN, la seri perbahanenKu man kalak Mesir ras man kalak Israel.’ ”

⁸Ndungi rananna nina Musa, “E maka kerina pegawai-pegawaindu reh me pagi ndahi aku janahna erjimpuh i lebe-lebengku, jenari ipindona alu mesek-sek gelah kubabai kerina bangsangku lawes, kenca bage, lawes me aku.” Kenca ibelasken Musa kata enda, alu pernembeh si gara la teralang itadingkenna raja.

⁹Enggo ikataken TUHAN man Musa nina, “Raja tetap nge la nggit megiken kam, gelah banci Kubahan tole tanda kuasa i negeri Mesir.”

¹⁰Ibahan Musa ras Harun kerina tanda-tanda kuasa i lebe-lebe raja, tapi ipemersik TUHAN ukur raja e maka la iberena bangsa Israel nadingken negeri Mesir.