Read Batak Karo KELUAREN 12 Bible Online

KELUAREN 12 - Batak Karo bible

KELUAREN 12

¹Sanga Musa ras Harun i Mesir ikataken TUHAN man bana nina, [27†]

²“Bulan enda me jadi bulan si pemena i bas perkiran tahunndu.

³Peseh lah perentah enda man kerina perpulungen bangsa Israel: I bas wari si pesepuluhken i bas bulan enda, tep-tep perbapan la banci la milih sada anak biri-biri ntah pe anak kambing guna keluargana.

⁴Adi keluargana e la nterem janah la kerisa sada anak biri-biri, tah anak kambing iraskenna ras kalak si deher rumahna gelah terkeriken sada anak biri-biri tah anak kambing alu mperkiraken teremna kalak si manca ras si terpan sekalak-sekalak.

⁵Banci ipilihndu biri-biri ntah pe kambing, tapi la banci la bajarna, umurna sada tahun, si la erpandangen.

⁶Kenca bage, karaben i bas wari si pesepuluh empatken i bas bulan e, kerina perpulungen bangsa Israel arus nggeleh asuh-asuhen si enggo isikapken e.

⁷Darehna ibuat sitik, jenari tamaken ku binangun pintun si pajek duana ras ku beloti si berteng i babo pintun rumah ingan asuh-asuhen e ipan.

⁸I bas berngina dagingna arus ipanggang, jenari ipan ras gule-gulen si pagit ras roti si la itama ragi.

⁹La banci ipan matah-matah ntah pe itanggerken, tapi arus ipanggang kerina, subuk takalna, nahena ras isi beltekna.

¹⁰La banci itadingkenndu sitik pe seh erpagi-pagi; adi lit denga tading, la banci la itutung seh meseng.

¹¹Pedas-pedas kam manca. Tupung si e arus kam make paken erdalan ndauh, pake sepatundu, cikep cikenndu. E me Pesta Paskah guna enghamati Aku, TUHAN.

¹²I bas berngi si e mentas Aku arah tengah-tengah negeri Mesir munuh kerina anak dilaki sintua, subuk manusia bage pe asuh-asuhen bage pe kerina dibata-dibata bangsa Mesir. Aku kap TUHAN.

¹³Dareh si i bas pintun ndai, e me jadi sada tanda maka i je me kam ringan. Adi Kuidah dareh e, Kusilahi saja e maka la kam kena kai pe Kuban asum Kuukum kalak Mesir.

¹⁴La banci la irayakenndu wari e jadi sada pesta agama, guna peringet-ingeten man bandu, maka Aku, TUHAN enggo erbahan si enda kerina. Rayakenlah e i bas kerina paksa-paksa si reh enda.” [28†]

¹⁵Nina TUHAN, “Pitu wari dekahna la banci ipanndu roti si itama ragi e maka si la erragi saja ngenca banci ipanndu. I bas wari si pemena la banci la iambekkenndu kerina ragi si lit i bas rumahndu, sabap kalak si man roti si itama ragi i bas si pitu wari e, ia lanai ikira bangsangKu.

¹⁶I bas wari si pemena bage pe i bas wari si pepituken arus kam pulung erbahan kebaktin. La banci kam erdahin tupung e, tapi banci isikapkenndu nakan.

¹⁷Rayakenlah rusur Pesta Roti si la tama ragi enda, sabap i bas wari e me suku-sukundu Kubaba ndarat i bas negeri Mesir nari. I bas kerina paksa-paksa si reh, la banci la irayakenndu wari enda alu erbahan pesta.

¹⁸Mulai karaben i bas wari si pesepuluh empatken i bas bulan si pemena seh ku bas karaben i bas wari si peduapuluh sadaken la banci ipanndu roti si lit ragina.

¹⁹[19-20] Pitu wari dekahna la banci lit sitik pe ragi i bas rumahndu, sabap adi lit sekalak si man roti itama ragi, subuk ia kalak Israel asli ntah pe kalak pertandang lanai ia ikira bangsangKu.”

²⁰

²¹Idilo Musa kerina peminpin-peminpin kalak Israel nina, “Sekalak-sekalak kam arus milih sada anak biri-biri ntah pe sada anak kambing, kenca bage gelehlah, gelah banci keluargandu ngerayaken Paskah.

²²Buat pe sada iket batang hisop, cebukken ku bas baskom si isin dareh biri-biri ntah kambing ndai, jenari sapuken dareh e ku duana binangun pintun ras ku beloti si berteng i babo pintun rumahndu. La banci ise pe kam nadingken rumahndu seh erpagi-pagi.

²³Tupung TUHAN mentas arah tengah-tengah negeri Mesir munuh kalak Mesir, iidahNa dareh si i bas beloti si berteng i babo pintun bage pe i bas binangun pintun e, maka la ibereNa Malekat Kematen mengketi rumahndu munuh kam. [29†]

²⁴Kam ras anak-anakndu la banci la patuh man peraturen enda seh rasa lalap.

²⁵Adi bengket kam ku bas negeri si enggo ipadanken TUHAN iberekenNa man bandu, la banci la tetap idalankenndu adat agama enda.

²⁶Adi isungkun anakndu kam nina, ‘Kai ertina adat enda?’

²⁷E maka nindu lah njabapsa, ‘Enda kap persembahen Paskah guna pehaga TUHAN, sabap ibentasiNa rumah-rumah kalak Israel i negeri Mesir. IbunuhNa kalak Mesir tapi iselamatkenNa kita.’ ” E maka, erjimpuh kalak Israel nembah.

²⁸Kenca bage lawes ia erbahan kai si enggo ipedahken TUHAN man Musa ras Harun.

²⁹Tupung tengah berngi ibunuh TUHAN kerina anak sintua i Mesir, mulai i bas anak raja nari, si mewarisi tahta kerajan, seh ku anak kalak tahanen i bas penjara bage pe kerina anak si pemena i bas asuh-asuhen. [30†]

³⁰I bas berngi e raja, pegawai-pegawaina, ras kalak Mesir si debanna, keke kerina. Sora nderkuh si megang terbegi i belang-belang Mesir, sabap la lit sada keluarga pe si la kematen anak.

³¹E maka i bas berngi e ka nge idilo raja minter Musa ras Harun nina, “To lawes kam ras bangsandu Israel! Tadingken negeringku enda; lawes lah, sembah lah TUHAN bagi pemindonndu.

³²Buat biri-birindu, kambingndu, ras lembundu. Tapi totokenlah maka aku daten pasu-pasu.”

³³Alu mesek-sek ipindo bangsa Mesir man bangsa Israel, gelah pedas-pedas itadingkenna negeri e; nina, “Adi la kam lawes, mate nge kami kerina.”

³⁴E maka idemi kalak Israel kudinna salu cimpa matah si la itama ragi, ibalutina salu uis, kenca bage ipersanna lawes.

³⁵Ilakoken bangsa Israel sue ras si enggo ikataken Musa; enggo ipindoina man kalak Mesir perhiasen-perhiasen emas, pirak, ras pe uis. [31†]

³⁶Ibahan TUHAN maka melumbar kerina kalak Mesir man kalak Israel, e maka iberena kai si ipindo bangsa e. Alu bagenda iangkut kalak Israel kebayaken kalak Mesir.

³⁷Bangsa Israel mulai berkat i Ramses nari ku Sukot. Teremna lit kira-kira 600.000 kalak dilaki, langa ikira diberu ras anak-anak.

³⁸Bangsa si deban pe nterem ikut lawes, ras melala biri-biri, kambing, ras lembu.

³⁹Erkiteken bage rempetna ia ipelawes bangsa Mesir, bangsa Israel lanai sempat nikapken pangan ntah pe cimpa si itama ragi. E maka itasakkenna roti si la itama ragi i bas cimpa matah si ibabana i Mesir nari e.

⁴⁰Kalak Israel ringan i Mesir 430 tahun dekahna. [32†]

⁴¹I bas wari pendungi si 430 tahun e, kerina suku-suku bangsa TUHAN nadingken Mesir.

⁴²Berngi si e, e me sada berngi i ja TUHAN tetap erjaga-jaga mabai bangsa Israel ndarat i bas negeri Mesir nari. E maka guna mperingeti kejadin e, kalak Israel pe arus erjaga-jaga tep-tep tahun i bas berngi e turun-temurun guna kemulian TUHAN.

⁴³Ikataken TUHAN man Musa ras Harun nina, “Enda me peraturen-peraturen Paskah: Bangsa si deban la banci man pangan si isikapken guna Paskah e,

⁴⁴tapi tep-tep budak si enggo itukurndu banci manca adi enggo isunatkenndu lebe.

⁴⁵Kalak si tandang-tandang ras kalak upahen la banci manca.

⁴⁶Pangan Paskah e arus keri ipan i bas rumah ingan erbanca; la banci ibaba ndarat. Tulan asuh-asuhen e sada pe la banci ipenggelken. [33†]

⁴⁷Kerina perpulungen kalak Israel la banci la ngerayaken pesta enda,

⁴⁸tapi kalak si langa isunatken la banci manca. Adi lit sekalak asing enggo tetap ringan i tengah-tengahndu, janah merincuh ia ngerayaken Paskah e guna kemulian TUHAN, la banci la isunatkenndu lebe kerina si dilaki i bas keluargana. Kenca bage ia arus ipeserindu ras kalak Israel asli janah banci ia ikut i bas pesta e.

⁴⁹Peraturen-peraturen man kalak asing si ringan i tengah-tengahndu ras man kalak Israel asli arus bali.”

⁵⁰Kerina kalak Israel patuh ngikuti kai si enggo iperentahken TUHAN man Musa ras Harun.

⁵¹I bas wari e ibabai TUHAN suku-suku bangsa Israel ndarat i bas negeri Mesir nari.