Read Batak Karo KELUAREN 13 Bible Online

KELUAREN 13 - Batak Karo bible

KELUAREN 13

¹Nina TUHAN man Musa,

²“Persembahken man bangKu anak dilaki sintua, sabap tep-tep anak dilaki sintua kalak Israel ras anak si pemena i bas asuh-asuhen Aku empuna.” [34†]

³Ikataken Musa man bangsa Israel nina, “Ingetlah wari enda, warina kam nadingken Mesir, inganndu iperbudak. Enda me wari TUHAN mulahi kam alu kuasaNa si mbelin. La banci ipanndu roti si itama ragi.

⁴I bas wari enda, i bas bulan si pemena, bulan Abip, berkat kam nadingken Mesir.

⁵TUHAN enggo erpadan tuhu-tuhu man nini-ninindu maka iberekenNa man bandu taneh kalak Kanaan, Heti, Amori, Hewi ras Jebusi. Kenca itaruhkenNa kam ku taneh si mehuli ras mehumur e, arus maka irayakenndu pesta enda i bas bulan si pemena tep-tep tahun.

⁶Pitu wari dekahna la banci la ipanndu roti si la itama ragi, jenari i bas wari si pepituken la banci la ibahan pesta guna kemulian TUHAN.

⁷Pitu wari dekahna la banci ipanndu roti si lit ragina; ragi ras roti si itama ragi la banci lit i japa pe i bas daerahndu.

⁸Asum pesta e ibenaken, turiken man kerina anak-anakndu maka enda kerina ibahanndu erkite-kiteken kai si enggo ibahan TUHAN man bandu tupung kam nadingken Mesir.

⁹Si enda gunana jadi sada persinget, desken sada barang si itambatken i bas tanndu ntah pe i bas perdempakenndu, guna mpersingeti kam gelah terus ibelasken ras ipelajarindu Undang-undang TUHAN, sabap enggo ibaba TUHAN kam ndarat i Mesir nari alu kuasaNa si mbelin.

¹⁰Rayakenlah pesta enda i bas waktu si enggo itentuken tep-tep tahun.”

¹¹“TUHAN si naruhken kam ku taneh Kanaan, si enggo ipadankenNa tuhu-tuhu man bandu ras man nini-ninindu. Jenari kenca iberekenNa taneh e man bandu,

¹²la banci la ipersembahkenndu kerina anak sintua dilaki man TUHAN. Tep-tep anak si pemena si tubuh i bas asuh-asuhenndu nari TUHAN empuna, [35†]

¹³tapi tep-tep anak kelede sangkarna si pemena la banci la itebusindu alu mpersembahken sada anak biri-biri. Adi la atendu itebusindu kelede e, arus ipenggelkenndu kerahungna. Tep-tep anakndu sintua dilaki la banci la itebusindu.

¹⁴Adi isungkuni anakndu kam denggo kai ertina aturen enda, arus ijabapndu ia, nindu, ‘Alu kuasa si mbelin TUHAN enggo maba kami ndarat i bas negeri Mesir nari, i ja kami iperbudak.

¹⁵Asum raja Mesir mekeng janah la iberena kami lawes, e maka ibunuh TUHAN kerina anak sintua i negeri Mesir, manusia ras asuh-asuhen. Em sabapna maka ipersembahken kami kerina anak si pemena i bas asuh-asuhen nari man TUHAN, tapi anak kami sintua itebusi kami.

¹⁶Peraturen enda jadi sada persinget, desken sada barang si itambatken i bas tan ntah i bas perdempaken kami, gelah iinget kami maka TUHAN maba kami ndarat i bas negeri Mesir nari alu kuasaNa si mbelin.’ ”

¹⁷Tupung bangsa Israel ibere raja Mesir lawes, la ia ibabai Dibata arah pasar ngikuti tepi lawit ku taneh Pilisti, aminna gia arah e nge si ndeherna. Nina i bas ukurNa, “La ateKu sambar perukuren kalak enda jenari mulihken ia ku Mesir adi itehna maka arus ia erperang.”

¹⁸E maka ibabaiNa ia arah dalan si meluk-eluk arah gurun pasir nandangi Lawit Merah. Bangsa Israel berkat i Mesir nari sikap guna erperang.

¹⁹Tulan-tulan Jusup pe ibaba Musa, sabap nai enggo isuruh Jusup kalak Israel erpadan mabasa nina, “Adi ipulahi Dibata kam pagi, babalah tulan-tulanku i bas ingan enda nari.” [36†]

²⁰Lawes kalak Israel i Sukot nari, jenari ipajekkenna kemahna i Etam i tepi gurun pasir.

²¹Suari TUHAN erdalan arah lebena i bas binangun embun guna nuduhken dalan man bana, janah berngi i bas binangun api guna mereken terang. E maka kalak Israel banci erdalan berngi ras suari.

²²Binangun embun ndai tetap arah lebena adi suari, janah binangun api paksa berngi.