Read Batak Karo KELUAREN 14 Bible Online

KELUAREN 14 - Batak Karo bible

KELUAREN 14

¹Jenari nina TUHAN man Musa,

²“Kataken man bangsa Israel gelah ia mulihken, gelah erkemah ia i lebe-lebe Pi-Hahirot, kelang-kelang Migdol ras Lawit Merah, deherken Baal-Sepon.

³Tentu iakap raja Mesir maka kalak Israel enggo papak i bas daerah e janah enggo terkurung ibahan gurun pasir.

⁴E maka mekeng Kubahan ukurna, gelah iayakina kam. I je Kucidahken kemulianKu, sabap Kutaluken raja Mesir ras kerina tenterana, gelah ieteh bangsa Mesir maka Aku kap TUHAN.” Minter ilakoken kalak Israel kai si ikataken man bana.

⁵Kenca ikataken man raja Mesir maka kalak Israel enggo kiam lawes, erkusur ukur raja ras pegawai-pegawaina, janah nina, “Uga nge perbahanenta e? Enggo sipelepas kalak Israel lawes; ma lanai ia banci jadi budakta?”

⁶E maka isuruh raja nikapken gereta perangna ras tenterana.

⁷Berkat ia ras kerina gereta perangna, rikut ras 600 gereta pilihen, ipinpin puanglima-puanglima.

⁸Ipemersik TUHAN ukur raja, e maka iayakina bangsa Israel si sangana erdalan i bas pengkawali TUHAN.

⁹Iayaki tentera Mesir bangsa Israel alu ngersak kuda, ras nangkih gereta perang, janah itunduksa i bas inganna erkemah i tepi Lawit Merah deherken Pi-Hahirot ras Baal-Sepon.

¹⁰Kenca idah kalak Israel maka raja Mesir ras tenterana reh ngayaki janah enggo ndeher pe, seh kal ia biarna kerina, janah nderkuh ia mindo penampat man TUHAN.

¹¹Nina bangsa Israel man Musa, “La kin mbarenda lit kuburen i Mesir maka ibabandu kami ndarat i jah nari gelah mate i gurun pasir enda? Ibabandu kami ndarat i Mesir nari; genduari nehenlah akibatna perbahanenndu e.

¹²Ma enggo me mbarenda ikataken kami man bandu ope denga kita berkat, ugapa pe bagenda nge jadina? Ipindo kami mbarenda man bandu gelah itadingkenndu kami gelah kami banci tetap jadi budak kalak Mesir. Ulin iakap kami jadi budak i jah asangken mate i bas gurun pasir enda.”

¹³Erjabap Musa nina, “Ola mbiar, tetapkenlah ukurndu! Sendah idahndu me kai si ibahan TUHAN guna nelamatken kam; ndigan pe lanai bo idahndu bangsa Mesir e.

¹⁴TUHAN kari si erperang guna kam, e maka kai pe labo perlu ibahanndu.”

¹⁵Nina TUHAN man Musa, “Engkai maka kam tangis man bangKu? Suruh kalak Israel terus erdalan.

¹⁶Angkat cikenndu janah tatang i babo lawit e gelah erbelah launa maka banci kalak Israel erdalan arah tengah lawit i babo taneh kerah.

¹⁷Aku erbahanca maka seh mersikna ukur kalak Mesir gelah ia bengket ngayaki kalak Israel. Aku ndat kemulian arah kemenangenKu nandangi raja Mesir, tenterana, geretana, ras si maba gereta e.

¹⁸Kenca Kutaluken ia kerina, i je ieteh bangsa Mesir me maka Aku kap TUHAN.”

¹⁹Malekat Dibata si erdalan arah lebe tentera Israel, miser ku pudi. Binangun embun e pe miser ku

²⁰kelang-kelang bangsa Mesir ras bangsa Israel. Embun e erbahanca gelap arah bangsa Mesir, tapi iterangina bangsa Israel. E maka tentera Mesir ras bangsa Israel la banci sideheren gedang-gedang berngi.

²¹Ipepinter Musa tanna i babo lawit, kenca bage ipesurut TUHAN lawit e alu angin Timur si megegeh. Lawit ndai enggo erbelah. Angin e rembus gedang-gedang berngi, e maka salih ibahanna lawit e jadi taneh kerah.

²²Erdalan me bangsa Israel arah taneh kerah ngepari lawit janah arah kawes-kemuhenna lau enggo bagi lingling. [37†]

²³Iayaki kalak Mesir, iikutkenna arah pudi ku tengah lawit ras kerina kudana, ras gereta perangna.

²⁴Ope denga siang erpagi-pagi itatap TUHAN tentera bangsa Mesir i datas binangun api ras embun nari, janah ihuntakenna ia kerina.

²⁵Roda gereta perangna ibahanNa lanai banci erpusing e maka seh kal akapna serana erdalan. Nina kalak Mesir, “Ota kiam kita, sabap TUHAN nge si erperang guna bangsa Israel ngelawan kita!”

²⁶Ikataken TUHAN man Musa nina, “Pepinter tanndu i babo lawit, maka maler mulihken lau, nggedapken kerina bangsa Mesir ras gereta perangna ras si maba gereta e.”

²⁷E maka ipepinter Musa tanna i babo lawit, janah enggo kenca matawari pultak, lau lawit enggo ka mulihken bagi biasa. Icubaken kalak Mesir kiam ndarat i bas lau e nari, tapi ibenterken TUHAN ia ku bas lawit.

²⁸Maler mulihken lau ndai, itamburina gereta perang, si maba gereta e, puanglima-puanglima ras kerina tentera Mesir si ngayaki bangsa Israel ku bas lawit ndai; sada pe la lit tading.

²⁹Tapi bangsa Israel erdalan arah tengah lawit i bas taneh kerah, lau si enggo bagi lingling arah kawes-kemuhenna.

³⁰I bas wari e iselamatken TUHAN bangsa Israel i bas kalak Mesir nari, janah idah bangsa Israel mate bangsa Mesir ampar-ampar i tepi lawit e.

³¹Kenca idah bangsa Israel kuga belinna gegeh ras kuasa TUHAN i bas naluken kalak Mesir, e maka mbiar ia kerina man TUHAN; tek ia kerina man TUHAN ras man Musa, suruh-suruhenNa.