Read Batak Karo KELUAREN 15 Bible Online

KELUAREN 15 - Batak Karo bible

KELUAREN 15

¹Kenca bage Musa ras kerina bangsa Israel ngendeken ende-enden enda man TUHAN, “Ateku rende man TUHAN, sabap enggo menang Ia alu mulia; enggo ibenterkenNa ku bas lawit kerina kuda ras si ngersaksa. [38†]

² TUHAN kap pengawalku si megegeh; Ia kap si enggo nelamatken aku. Ia kap Dibatangku, e maka ateku muji Ia. Ia kap Dibata bapangku, e maka kupebelin gelarNa arah ende-endenku. [39†]

³ TUHAN kap si mbisa; TUHAN, e me kap gelarNa.

⁴IbenterkenNa ku bas lawit tentera Mesir ras gereta perangna; mate gedap bas Lawit Merah puanglima-puanglima pilihenna.

⁵Lawit si mbages nutupi ia; gedap ku teruh desken batu.

⁶TanNdu si kemuhen, o TUHAN, tuhu-tuhu seh kal gegehna; musuh iperperkenNa seh getem kerinana.

⁷Alu kemenangen si mulia ikerapkenNdu si ngelawan Kam; rawaNdu luar desken api si gara, ngkeriken musuhNdu seh meseng bagi nggala.

⁸IembusNdu lawit, e maka launa erjerungjung ku datas; pajek desken lingling; janah kubang i bas lawit si mbagesna pe jadi piher.

⁹Nina musuh i bas ukurna, ‘Kuayaki lah ia maka kutangkap; kubagi-bagiken ertana, janah kubuat kerina si ngena ateku; kusintak pedangku, gelah kukernepken ia.’

¹⁰Tapi sekali saja Kam erkumesah o TUHAN, enggo gedap bangsa Mesir, desken timah, gedap ia kerina ku bas lau si mejin bagesna.

¹¹O TUHAN, apai kin dibata-dibata si bali ras Kam? Labo lit ise pe bagi Kam badiana. Ise kin si ngasup erbahan tanda kuasa ras perbahanen si mbelin bagi si ibahanNdu?

¹²Ipepinter Kam tanNdu si kemuhen, e maka musuh kami itelen doni enda.

¹³Erkiteken setia Kam man padanNdu, itaruhken Kam bangsa si enggo ipulahiNdu; alu gegehNdu itegu-teguNdu ia ku tanehNdu si badia.

¹⁴Bangsa-bangsa enggo megisa, e maka nggirgir ia ban biarna; kalak Pilisti ikuasai kebiaren.

¹⁵Peminpin-peminpin kalak Edom gentar; kalak si mbisa bangsa Moap nggirgir; kalak Kanaan bene ukurna.

¹⁶Kebiaren ras aru ate ndabuh man bana. Idahna gegehNdu, o TUHAN, e maka kote ia kerina ibahan biarna. Seh bangsaNdu enggo mentas, e me bangsa si ibebaskenNdu i bas perbudaken nari.

¹⁷IbahanNdu ia, janah isuankenNdu ia i bas delengNdu, ingan si enggo ipilihNdu, o TUHAN, jadi rumahNdu, Rumah bekasNdu majekkenca.

¹⁸Kam, o TUHAN, Kam kap Raja rasa lalap seh rasa lalap.”

¹⁹Bangsa Israel erdalan arah tengah lawit i babo taneh kerah. Tapi kenca gereta perang kalak Mesir ras kudana bage pe puanglima si maba gereta e bengket ku bas lawit e, ipemulih TUHAN ka lau lawit e, e maka gedap ia kerina.

²⁰Ibuat nabiah Miriam turang Harun, gendangna jenari kerina diberu-diberu ngikutken ia, ergendang janah landek.

²¹Rende Miriam man kalak enda kerina, “Rende lah man TUHAN, sabap enggo idatNa kemenangen si mulia enggo ibenterkenNa kuda ras kerina si ngersaksa ku bas lawit.”

²²Jenari ibabai Musa bangsa Israel lawes i Lawit Merah nari ku gurun pasir Sur. Enggo telu wari dekahna ia erdalan arah gurun pasir, tapi lalap la jumpa lau.

²³E maka seh me ia ku sada ingan, gelarna Mara, tapi lau si lit i je seh kal pagitna, e maka la terinem. Em sabapna maka igelari Mara.

²⁴Erkiteken si e jungut-jungut bangsa Israel man Musa janahna mindo nina, “Apai inemen kami?”

²⁵Meseksek kal pertoton Musa man TUHAN, jenari ituduhken TUHAN man bana sepenggel batang kayu. Ibenterken Musa kayu ndai ku bas lau e, e maka lau ndai enggo banci iinem. I bas ingan e ibereken TUHAN man bangsa Israel Undang-undang si man ikutenken, janah i je pe iujiNa bangsa e.

²⁶Nina TUHAN, “Adi tuhu-tuhu kam erkemalangen man bangKu alu erbahan kai si payo Kuakap, janah iikutkenndu kerina si Kusuruh, la kam Kuukum alu penakit-penakit si Kubahan man bangsa Mesir. Aku kap TUHAN si erbahanca kam mejuah-juah.”

²⁷Pepagina seh ia i Elim. I je lit sepuluh dua ulu lau ras pitu puluh batang kurma; e maka ia erkemah i tepi lau ndai.