Read Batak Karo KELUAREN 16 Bible Online

KELUAREN 16 - Batak Karo bible

KELUAREN 16

¹Kenca bage berkat ka kerina perpulungen bangsa Israel i Elim nari, janah i bas wari pesepuluh limaken bulan si peduaken kenca nadingken Mesir, seh me kalak enda i gurun pasir Sin, kelang-kelang Elim ras Sinai.

²I tengah-tengah gurun pasir e kerina kalak e jungut-jungut man Musa ras Harun

³nina, “Ulin min ndube mate pe kami ibahan TUHAN i Mesir. I jah ndube banci kami kundul man daging, ras man pangan-pangan si deban asa besur kami. Tapi enggo ibabandu kami ndarat ku gurun pasir enda gelah kami kelihen seh mate.”

⁴Erkiteken si e nina TUHAN kempak Musa, “Genduari ateKu ndabuhken pangan bagi udan i langit nari man bandu kerina. Bangsa e arus luar tep-tep wari pepulungsa asa biasna guna wari e. Alu dalan si bagenda banci Kuuji ntah kin iikutkenna pengajarenKu ntah lang. [40†]

⁵I bas wari si peenemken ibabana lah ku bas kemahna dua kali lipat buena, jenari ipesikapnalah.”

⁶E maka ikataken Musa ras Harun man kerina kalak Israel, nina, “Kenca ben kari wari ietehndu me maka TUHAN nge si maba kam ndarat i Mesir nari.

⁷Erpagi-pagi, iidahndu me terang sinalsal kemulian TUHAN. Enggo ibegiNa sorandu jungut-jungut man baNa. Ia nge situhuna si ijungutindu, sabap kami enda persuruhenNa saja nge ngenca.”

⁸Tole nina Musa, “TUHAN nge kari si mereken daging man panganndu kenca ben wari, janah erpagi-pagi roti asa atendu buena, erkiteken enggo ibegiNa kuga sangatna kam jungut-jungut man baNa. Adi ijungutindu kami, situhuna TUHAN nge si ijungutindu e.”

⁹Nina Musa man Harun, “Suruh kerina perpulungen e reh tedis ngadap TUHAN, erkiteken enggo ibegiNa sora kalak e jungut-jungut.”

¹⁰Asum Harun ngerana man kerina perpulungen e, itulihken kalak e ku gurun pasir, janah rempet teridah terang sinalsal kemulian TUHAN i bas embun.

¹¹Jenari nina TUHAN kempak Musa,

¹²“Enggo Kubegi sora kalak Israel jungut-jungut. Kataken man bangsa e maka kenca ben kari wari ialokenna me daging man panganna, janah erpagi-pagi ialokenna roti asa buena atena. Kenca bage ietehna maka Aku, TUHAN, e me kap Dibatana.”

¹³Karabenna sada rarasen leto si lanai kal lang-lang buena, kabang ku bas inganna erkemah e. Perbahan buena itamburina ingan erkemah e. Janah pepagina itamburi embun sekelewet ingan erkemah e.

¹⁴Kenca embun e kabang, lit tading i babo taneh tempasna menipes, bagi sisik, melumat bagi bening.

¹⁵Sanga kalak Israel ngidahsa, la itandaina kai e, e maka nungkun-nungkun ia sapih-sapih ia, “Kai e?” Nina Musa man bana, “Enda me pangan si enggo ibereken TUHAN man panganndu. [41†]

¹⁶Enggo iperentahken TUHAN maka sekalak-sekalak kam pepulungsa asa iperlukenndu, dua liter man tep-tep anggota keluargandu.”

¹⁷Minter ilakoken kalak Israel bage. Deba ipepulungna lebih dua liter, deba kurang.

¹⁸Kenca isukati kalak e, kalak si lebih ipepulungna la ia kelebihen, janah kalak si kurang ipepulungna, la ia kekurangen. Asa perluna saja ngenca terpepulungsa sekalak-sekalak. [42†]

¹⁹Nina Musa man kalak e, “La ise pe banci munikenca seh pepagi.”

²⁰Tapi lit deba si la megiken kata Musa, e maka isimpanna deba. Pepagina enggo berngan janah seh kal bauna; e maka merawa Musa man kalak ndai.

²¹Tep-tep erpagi-pagi sekalak-sekalak pepulung asa si iperlukenna; janah kenca enggo las matawari, asa kai si tading i babo taneh kerina melengas.

²²I bas wari si peenemken ipepulung kalak ndai pangan dua kali lipat buena, e me empat liter guna sekalak jelma. Kerina peminpin-peminpin perpulungen e reh ndahi Musa guna ngataken kerna si e.

²³E maka nina Musa man peminpin-peminpin e, “Enggo iperentahken TUHAN maka pagi me wari pengadi-ngadin si badia, si ipersembahken man baNa. Panggang janah tanggerken lah kai atendu si man tanggerenken. Serapkenlah asa kai si la keri, janah simpan guna si pepagi.” [43†]

²⁴E maka sue ras si iperentahken Musa, isimpan kalak ndai asa kai si tading seh wari si pepagina; si e la macik janah la berngan.

²⁵Pepagina nina Musa, “Pan lah enda sendah, sabap sendah e me wari Sabat, sada wari pekesahken si ipersembahken man TUHAN. Erkiteken si e labo lit idatndu pangan i darat ingan erkemah enda.

²⁶Enem wari arus ipepulungndu pangan, tapi i bas wari si pepituken, e me wari pekesahken, la lit sitik pe Kupesusur pangan.”

²⁷I bas wari pepituken lit deba ndarat ndarami pangan, tapi la lit sitik pe idatca.

²⁸Kenca bage nina TUHAN kempak Musa, “Asa kai nari dekahna kam kerina la nggit ngikutken perentahKu?

²⁹Inget, maka Aku, TUHAN, enggo mereken sada wari pekesahken man bandu, janah e me sabapna maka i bas wari si peenemken ateKu tetap mereken pangan man bandu cukup guna dua wari. Sekalak-sekalak arus tading i bas inganna i bas wari si pepituken, janah la banci nadingken rumahna.”

³⁰Dage i bas wari pepituken, bangsa e la erdahin.

³¹Ibahan bangsa Israel gelar pangan e manna. Tempasna bagi buah sinuan-sinuan si kitik, rupana mbentar, janah nanamna bali ras cimpa si itama tengguli. [44†]

³²Nina Musa, “Enggo iperentahken TUHAN man banta gelah sisimpan manna enda sitik, maka sibuniken man kesusurenta, gelah banci pagi idah kesusurenta e pangan si ibereken TUHAN man panganta i bas gurun pasir asum kita ibabaNa ndarat i Mesir nari.”

³³Nina Musa man Harun, “Buatlah sada kudin, tamaken dua liter manna ku bas, jenari tamaken kudin e i adep-adepen TUHAN, gelah ibuniken guna sinursurta.” [45†]

³⁴Sue ras si enggo iperentahken TUHAN man Musa, itamaken Harun kudin e i lebe-lebe Peti Perpadanen, gelah banci lalap tersimpan.

³⁵Bangsa Israel man manna empat puluh tahun dekahna, ngadi-ngadi seh ia i negeri Kanaan, inganna tading. [46†] (

³⁶Sukat-sukat si ipake tupung e isina bali ras dua puluh liter.)