Read Batak Karo KELUAREN 17 Bible Online

KELUAREN 17 - Batak Karo bible

KELUAREN 17

¹Kerina perpulungen bangsa Israel berkat i gurun pasir Sin nari, pindah-pindah ia i bas sada ingan nari ku ingan si deban rikutken perentah TUHAN. Erkemah ia i Rapidim, tapi la lit i je lau man inemen. [47†]

²E maka jungut-jungut ia kerina man Musa nina, “Enta lau inemen man kami.” Nina Musa erjabap, “Engkai maka kam jungut-jungut man bangku? Engkai maka iujindu TUHAN?”

³Tapi erkiteken kalak ndai seh muasna, e maka lalap ia jungut-jungut man Musa. Nina, “Engkai maka ibabandu kami ndarat i Mesir nari? Gelah mate kami ras anak-anak kami ras asuh-asuhen kami alu la minem-minem?”

⁴Meseksek pertoton Musa man TUHAN nina, “Uga nari perbanku man bangsa enda? Nandangi ibenterina me aku alu batu.”

⁵Nina TUHAN man Musa, “Buat piga-piga kalak peminpin bangsa Israel, jenari ras kam erdalan ngelebei jelma si nterem. Baba pe ciken si ipakendu mekpek Lau Nil.

⁶Tedis Aku kari i lebe-lebendu i datas sada batu i Deleng Sinai. Palu batu e maka reh lau i bas nari man inemen bangsa e.” Ibahan Musa bage i lebe-lebe peminpin-peminpin kalak Israel.

⁷Ingan ndai igelari Masa ras Meriba, sabap jungut-jungut kalak Israel, janah iujina TUHAN tupung nina, “Tuhu kin TUHAN ras kita ntah lang?”

⁸Reh me bangsa Amalek merang bangsa Israel i Rapidim.

⁹Nina Musa man Josua, “Pilih piga-piga kalak dilaki guna erperang pagi ngelawan bangsa Amalek. Aku pagi tedis i datas uruk njemak ciken si isuruh Dibata kubaba.”

¹⁰Ilakoken Josua bagi si iperentahken Musa man bana, e maka lawes ia ndarat erperang ngelawan bangsa Amalek, sedangken Musa, Harun ras Hur lawes ku datas uruk.

¹¹Adi iangkat Musa tanna ku datas, menang bangsa Israel, tapi adi ipesusurna tanna, bangsa Amalek mulai ka menang.

¹²Kenca enggo latih iakap Musa natang tanna, ibaba Harun ras Hur batu man ingan Musa kundul. Ia duana tedis arah kawes ras kemuhenna ngangkat tan Musa; bage me ibahanna terus ngadi-ngadi ben.

¹³Alu bage keri kal italuken Josua bangsa Amalek.

¹⁴Kenca bage nina TUHAN man Musa, “Suratken lah turi-turin kemenangen enda gelah jadi peringet-ingeten. Kataken man Josua maka ateKu ngkeriken kerina bangsa Amalek.” [48†]

¹⁵Ipajekken Musa sada batar-batar ingan persembahen janah ibahanna gelarna, “TUHAN kap Panji-panjingku.”

¹⁶Nina, “Angkat meganjang-meganjang panji-panji TUHAN! TUHAN la banci lang terus erperang ngelawan bangsa Amalek seh rasa lalap.”