Read Batak Karo KELUAREN 18 Bible Online

KELUAREN 18 - Batak Karo bible

KELUAREN 18

¹Jetero, mama Musa, imam Midian, megi kerina si enggo ibahan Dibata man Musa ras man bangsa Israel, sanga ibabaiNa bangsa e ndarat i Mesir nari.

²E maka reh ia ndahi Musa, janah ibabana pe Sipora, ndehara Musa, si ndube isuruhna lebe mulih. [49†]

³Ikut pe duana anak Sipora, e me Gersom ras Elieser. (Nai enggo pernah bagenda nina Musa, “Aku kalak pertandang i taneh kalak”, e maka ibahanna gelar anakna sada Gersom. [50†]

⁴Tole pe enggo ka ikatakenna nina, “Dibata bapangku nampati aku maka la aku ibunuh raja Mesir”, e maka ibahanna gelar anakna si sada nari Elieser.)

⁵Reh Jetero ras ndehara Musa bage pe anakna si dilaki duana ku gurun pasir i ja Musa sangana erkemah deher ku deleng si badia.

⁶Enggo leben iberitakenna man Musa maka reh atena kerina,

⁷e maka ialo-alo Musa mamana, erjimpuh ia i lebe-lebena, jenari iemana mamana. Kenca ia sisalam-salamen bengket ia ku bas kemah Musa.

⁸Ituriken Musa man Jetero kerina si enggo ibahan TUHAN man raja ras bangsa Mesir, guna nelamatken bangsa Israel. Iturikenna pe man bana kerna kiniseran-kiniseran si man bentasen bangsa Israel i bas perdalanen e, janah kuga TUHAN enggo nampati bangsa Israel.

⁹Kenca ibegi Jetero kerina si e, meriah akapna,

¹⁰e maka nina, “Terpujilah TUHAN, si nelamatken kam i bas raja ras bangsa Mesir nari! Terpujilah TUHAN si nelamatken bangsaNa i bas perbudaken nari!

¹¹Genduari enggo kueteh maka TUHAN belinen asa kerina dibata-dibata, sabap Ia erbahan si bage tupung bangsa Israel ihina kalak Mesir.”

¹²Kenca bage ibaba Jetero sada persembahen tutungen ras persembahen-persembahen si deban guna ipersembahken man Dibata. Harun ras kerina peminpin Israel reh ndahi Jetero, janah ras-ras ia man pangan si badia e iadep-adepen Dibata.

¹³Pepagina Musa ngerunggui perubaten-perubaten si lit turah i bas sapih-sapih kalak Israel, e maka ia terus sibuk pagi-pagi nari seh berngi.

¹⁴Kenca idah Jetero kerina dahin si arus idahi Musa, nungkun ia nina, “Kai nge si ibahanndu man bangsa enda? Engkai maka sekalak kam ngenca ndahikenca, sedangken bage teremna rayat tedis erpagi-pagi nari seh berngi nungkun man bandu?”

¹⁵Nina Musa erjabap, “Si enda la banci la kubahan sabap kalak enda reh ndahi aku gelah ietehna kai sura-sura Dibata.

¹⁶Adi lit dua kalak si rubati, reh ia ndahi aku, e maka aku erbahan keputusen si apai si benar, jenari kuturiken man bana duana pedah ras undang-undang Dibata.”

¹⁷Tapi nina Jetero man Musa, “Langa tengteng perbanndu e.

¹⁸Kam pe latih akapndu, kalak enda pe kerina bage ka. Adi sekalak kam ngenca ndahisa, mbuesa si man dahinndu e.

¹⁹Genduari banci kubereken man bandu pedah si mehuli, janah Dibata tentu ras kam. Payo tuhu kam si mewakili bangsa enda ngadap man Dibata janah nehken perubaten-perubatenna man baNa.

²⁰Arus pe iajarkenndu man bana perentah-perentah Dibata, janah nerangkenca man bana kuga arusna ia nggeluh, ras kai si arus ibahanna.

²¹Tapi tambah si e, arus pe ipilihndu piga-piga kalak si ngasup jadi peminpin bangsa enda, e me ngasup minpin 1000 kalak, seratus kalak, lima puluh kalak, ras sepuluh kalak. Kalak e kerina arus mbiar man Dibata, banci iteki, janah la nggit isogok.

²²Tugaskenlah ia kerina jadi hakim-hakim si tetap man bangsa enda. Soal-soal si sulit banci isehkenna man bandu, tapi perkara-perkara si kitik ia saja mutuskenca. Alu bagenda tentu ernahangna iakapndu, sabap enggo kam ras-ras maba babanndu si mberat e.

²³Adi ibahanndu bagenda, bagi si iperentahken Dibata, la kam ngelabuh janah kalak enda pe banci mulih ku rumah, perkarana pe dung.”

²⁴Ibegiken Musa pedah mamana Jetero,

²⁵e maka ipilihna kalak si ngasup jadi peminpin i bas kalak Israel nari kerina. Itugaskenna ia jadi si minpin 1000 kalak, seratus kalak, lima puluh kalak, ras sepuluh kalak.

²⁶Dahinna e me kap jadi hakim si tetap i tengah-tengah bangsa e, maba perkara-perkara si sulit man Musa, tapi perkara-perkara si kitik ia jine mutuskenca.

²⁷Kenca ikataken Musa mejuah-juah man Jetero, e maka mulih mamana e ku negerina.