Read Batak Karo KELUAREN 19 Bible Online

KELUAREN 19 - Batak Karo bible

KELUAREN 19

¹ [1-2] Berkat ka bangsa Israel i Rapidim nari. Jenari i bas wari si pemena i bas bulan si peteluken kenca ia enggo nadingken Mesir, seh ia kerina i gurun pasir Sinai. I je ipajekkenna ka kemahna i teruh Deleng Sinai.

³Jenari lawes Musa ku datas deleng e njumpai Dibata. Ilebuh TUHAN ia i datas deleng e nari janah isuruhNa Musa ngatakenca man bangsa Israel, kesusuren Jakup bagenda,

⁴“Enggo idahndu kai si Kubahan man kalak Mesir. Idahndu ka pe kuga kam enggo Kutatang-tatang seh i jenda jumpa ras Aku, desken rajawali maba anak-anakna i datas kabengna.

⁵Genduari adi iikutkenndu Aku janah ipatuhindu perpadanenKu e maka kam jadi bangsangKu. Kerina doni enda Aku empuna, tapi kam me jadi bangsa pilihenKu, [51†] [52†]

⁶sada bangsa si nggeluh man gunangKu saja janah kam me jadi imam-imamKu.” [53†]

⁷Kenca e nusur Musa i datas deleng nari, idilona pulung kerina peminpin-peminpin bangsa Israel, janah ikatakenna man peminpin-peminpin e kai si enggo iperentahken TUHAN man bana.

⁸Jenari jelma si nterem ngaloi ras-ras nina, “Nggit kami ndalanken kerina si ikataken TUHAN.” Si enda isehken Musa man TUHAN.

⁹Nina TUHAN man Musa, “Reh Aku ndahi kam i bas embun si mekapal, gelah ibegi jelma si nterem Aku ngerana ras kam maka ia tek man bandu mulai genduari nari seh rasa lalap.” Ikataken Musa man TUHAN kai jabap bangsa e,

¹⁰e maka nina TUHAN man bana, “Dahilah bangsa e janah kataken man bana kerina gelah sendah ras pagi ibersihkenna bana guna ersembah. Arus maka icucina pakenna,

¹¹janah kedun arus enggo sikap kerina. I bas wari e nusur Aku ku Deleng Sinai, maka i je banci kerina bangsa e ngidah Aku.

¹²Bahan balengna i sekelewet deleng e si la banci ilewati jelma si nterem, janah kataken man bana gelah ola inangkihina ntah pe ideherina deleng e. Ise si ndedehsa deleng e, la banci la mate, [54†]

¹³ibenteri alu batu ntah pe ipanah alu anak panah janah ise pe la banci ndadapsa ia. Si enda ibahan subuk man manusia ntah pe asuh-asuhen; la banci la mate si ngelanggarsa. Tapi adi enggo kenca iembus terompet jelma si nterem la banci la nangkih ku datas deleng e.”

¹⁴Kenca bage nusur Musa i datas deleng e nari jenari ikatakenna man bangsa e gelah ersikap guna ersembah. E maka icucina kerina pakenna.

¹⁵Ikataken Musa man bangsa e nina, “Kedun arus kam enggo sikap kerina janah mulai genduari nari seh wari e la banci kam ersada kula ras ndeharandu.”

¹⁶Erpagi-pagi i bas wari si peteluken, lit me sora lenggur ras kilap. Sada embun si mekapal nusur ku datas deleng e, janah sada sora terompet si megang pe terbegi. Kerina jelma si nterem i bas ingan erkemah e nggirgir perban biarna. [55†] [56†]

¹⁷Ibabai Musa ia ndarat i bas perkemahen e nari njumpai Dibata, jenari tedis ia kerina i teruh deleng e.

¹⁸Kerina Deleng Sinai itutupi gebuk, sabap TUHAN enggo nusur ku je i bas api. Gebuk ndai nangkih ku datas bagi cimber api si galang, e maka kerina bangsa e nggirgir kal.

¹⁹Sora terompet ndai reh gangna reh dekahna. Ngerana Musa, janah ijabap Dibata ia alu lenggur.

²⁰TUHAN nusur ku ancuk-ancuk Deleng Sinai janah idiloNa Musa reh ku je. Reh Musa nangkih,

²¹jenari nina TUHAN man bana, “Nusur lah kam, pebetehken man jelma si nterem gelah ola ia reh engkepari baleng si enggo itentuken e guna ngenehen Aku; adi ikeparina nterem denggo ia mate.

²²Aminna imam-imam pe si reh ndeheri Aku, la banci la ibersihkenna bana. Adi lang Kuukum ia.”

²³Ikataken Musa man TUHAN nina, “Jelma si nterem e labo banci reh ku datas, sabap enggo iperentahkenNdu man kami maka deleng e arus ipebadiaken kami janah erbahan baleng i sekelewetna.”

²⁴Erjabap TUHAN nina, “Nusur lah kam ku teruh janah baba Harun mulih ku datas ras kam. Tapi imam-imam ras jelma si nterem la banci reh engkepari batas e ndahi Aku. Adi ikeparina Kuukum ia.”

²⁵Kenca bage nusur Musa njumpai jelma si nterem, jenari ikatakenna man bangsa e kai si enggo ikataken TUHAN.