Read Batak Karo KELUAREN 2 Bible Online

KELUAREN 2 - Batak Karo bible

KELUAREN 2

¹Sanga si e, sekalak suku Lewi erjabu ras sekalak diberu si sada suku ras ia,

²jenari ipupusna me sekalak anak dilaki. Kenca idahna rupa anakna e mejile tuhu-tuhu, e maka ibunikenna telu bulan dekahna. [6†]

³Tapi kenca lanai terbunikenca, ibuat nande anak e sada keranjang si ibahan i bas batang rengo nari, jenari ilapisina alu damar gelah ola ku bas lau. Itamakenna anakna ku bas keranjang e, jenari icibalkenna i tengah-tengah dukut si mbages i tepi Lau Nil.

⁴I dauh-dauh nari tedis turang anak e ngenehen tah kai kari jadi man bana.

⁵E maka reh me puteri raja ridi ku lau belin e. Sanga ia ridi, erdalan-dalan dayang-dayangna i tepi lau. Rempet idah puteri raja keranjang e i tengah-tengah dukut si mbages, e maka minter isuruhna sekalak suruh-suruhenna si diberu muatsa.

⁶Italangi puteri raja keranjang e, idahna sekalak anak dilaki i bas. Tangis anak e, e maka mekuah atena. “Ugapa pe anak kalak Heber enda,” nina.

⁷Kenca bage isungkun turangna ndai puteri raja nina, “Ntah kulegiken atendu sekalak diberu bangsa Heber gelah ipepinemna anak enda?”

⁸“Merandal, to legiken,” nina. E maka lawes singuda-nguda ndai ndilo nande anak e.

⁹Ikataken puteri raja man nande anak e nina, “Baba anak enda, pekena-kena, kubereken pagi upahndu.” E maka ibabana ras ipekena-kenana anak e.

¹⁰Kenca enggo cukup umur anak e, e maka itaruhkenna man puteri raja. Ibahanna jadi anak angkatna. Nina i bas ukurna, “Kuangkat ia i bas lau nari, e maka kubahanlah gelarna Musa.” [7†]

¹¹I bas sada wari kenca Musa enggo dewasa, ndarat ia njumpai bangsana, bangsa Heber. E maka idahina ku ingan bangsa e ipaksa ndahiken dahin si mberat. Tupung si e idahna pe sekalak bangsa Mesir munuh sekalak bangsa Heber, teman sebangsana. [8†] [9†]

¹²Ipernehen Musa ku sekelewetna, janah kenca idahna maka ise pe la mperdiateken ia, ibunuhna kalak ndai, jenari itanemkenna i bas kersik.

¹³Pepagina ndarat ka ia, idahna dua kalak Heber sangana rubat. Ikataken Musa man kalak si ersalah nina, “Engkai maka ipekpekndu teman sebangsandu?”

¹⁴Tapi erjabap ia nina, “Ise si ngangkat kam jadi peminpin ras hakim kami? Ntah atendu munuh aku bagi enggo ibunuhndu bangsa Mesir nderbih?” E maka mbiar Musa janah nina i bas ukurna, “Tentu enggo iteh kalak kai si enggo kubahan.”

¹⁵[15-16] Kenca ibegi raja kerna kai si enggo jadi, e maka idaramina dalan munuh Musa, tapi lompat Musa jenari lawes ia ringan i taneh Midian. I bas sada wari, tupung ia kundul deherken sada sumur, reh me pitu kalak singuda-nguda, atena muat lau man inemen biri-biri ras kambing bapana. Singuda-nguda si pitu e, e me anak Jetero, imam Midian. [10†]

¹⁷Tapi ipelawes piga-piga kalak permakan ia pituna. E maka keke Musa nampati ia janah iberena minem asuh-asuhenna ndai.

¹⁸Kenca singuda-nguda e mulih jumpa ras bapana, isungkun bapana ia nina, “Engkai maka bage lampasna kam mulih sendah?”

¹⁹“Lit sekalak kalak Mesir reh nampati kami sanga kami igasgasi permakan-permakan,” nina erjabap. “Tambah si e itimbana lau man kami janah iberena minem asuh-asuhen kami.”

²⁰“I ja ia?” nina nungkun man anakna. “Engkai maka itadingkenndu ia i darat ah? Dilo, maka ia man.”

²¹Bage me Musa pe setuju ringan i je. Jenari iserehken Jetero anakna, Sipora, man Musa.

²²Ipupusna sekalak anak dilaki. Nina Musa i bas ukurna, “Aku sekalak pertandang i bas ingan enda, e maka kubahanlah gelarna Gersom.”

²³Kenca piga-piga tahun dekahna, mate me raja Mesir e, tapi kalak Israel tetap denga nge kesah-kesah perban perbudaken janah nderkuh pe ia mindo penampat. Penderkuhna e seh man Dibata,

²⁴si megi sorana tangis, janah iinget Dibata padanNa ras Abraham, Isak ras Jakup. [11†]

²⁵Idah Dibata bangsa Israel iperbudak, janah iperdiatekenNa bangsa e.