Read Batak Karo KELUAREN 23 Bible Online

KELUAREN 23 - Batak Karo bible

KELUAREN 23

¹“Ola pebelang berita-berita si la tuhu, janah ola sampati kalak si salah alu mereken bukti-bukti si la tuhu. [86†]

²Ola ikutken jelma si nterem si erbahan salah ntah pe si mereken kesaksin guna nutupi keadilen.

³Ola erpendobahen iakapndu kalak musil adi lit perkarana. [87†]

⁴Adi idahndu lembu ntah kelede imbangndu pulah, tangkap janah bereken man bana. [88†]

⁵Adi keledena guling erkiteken baban si mberat, sampatilah ia petedissa; ola kam mentas saja.

⁶Berekenlah keadilen man kalak musil adi lit perkarana i bas pengadilen. [89†]

⁷Ola bahan-bahan kesalahenna, janah ola munuh kalak si la ersalah, sabap la banci la Kuukum kalak si erbahan kejahaten si bage.

⁸Ola aloken uang sogok, sabap uang sogok erbahanca kalak lanai ngidah si benar, janah perkara kalak si la ersalah ibalikken.

⁹Ola erbahan si la bujur nandangi kalak pertandang; enggo itehndu kuga nanamna jadi kalak pertandang, sabap kam pe nai kalak pertandang nge i Mesir.” [90†]

¹⁰“Enem tahun banci isuanindu jumandu janah perani kai si iasilkenna. [91†]

¹¹Tapi i bas tahun si pepituken pelepas jumandu e ngadi, janah ola perani kai pe si turah i je. Kai si turah i je ipan kalak musil, janah rubia-rubia si meliar banci mangani kai si tading. Peken anggurndu ras batang saitun pe bage lah ban.

¹²Enem wari kam erdahin i bas sada minggu, tapi ola kam erdahin i bas wari si pepituken, gelah budak-budakndu ras kalak pertandang si erdahin ras kam bage pe asuh-asuhenndu banci pekesahken. [92†]

¹³ TUHANndu kap si ngerana man bandu e; begiken lah kerina si enggo Kukataken. Ola ertoto man dibata-dibata si deban; ola singetken pe gelarna.”

¹⁴“Rayaken telu wari raya setahun guna mereken kemulian man bangKu.

¹⁵I bas bulan Abip, bulan tupung kam nadingken Mesir, rayaken Wari Raya Roti si la tama ragi, bagi si Kupedahken man bandu. Ola pan roti kai pe si lit ragina kidekah pesta si pitu wari e. Tep-tep kali kam ersembah man bangKu, la banci la ibabandu persembahenndu. [93†]

¹⁶Pestakenlah Kerja Rani asum ibenakenndu rani buah pagendu. Pestakenlah Wari Raya Sapo-sapo i bas pengkeri-kerin tahun, asum iperanindu buah anggurndu ras si debanna. [94†]

¹⁷Tep-tep tahun i bas wari raya si telu enda ndai, kerina dilaki la banci la reh ersembah man bangKu, TUHAN, Dibatandu.

¹⁸Ola ipersembahkenndu man bangKu roti si tama ragi, adi ipersembahkenndu ka asuh-asuhen. Lemak asuh-asuhen si ipersembahken sangana wari-wari raya enda ndai la banci iahanken seh ku pagina erpagi-pagi.

¹⁹Tep-tep tahun baba ku Rumah TUHAN Dibatandu buah page si pemena si iperanindu. Ola tanggerken anak biri-biri ntah pe kambing alu lau susu indungna.” [95†]

²⁰“Kusuruh sada malekat arah lebendu ngkawali kam i bas perdalanenndu janah mabai kam ku ingan si enggo Kusikapken.

²¹Perdiateken lah ia janah ikutken lah. Ola lawan ia, sabap enggo Kusuruh ia, janah adi ilawanndu ia, kam la banci lang iukum kam.

²²Tapi adi iikutkenndu ia janah ibahanndu asa kai si Kuperentahken, Aku ngelawansa kerina musuhndu.

²³MalekatKu erdalan arah lebendu janah ibabaina kam ku taneh kalak Amori, Heti, Peris, Kanaan, Hewi ras Jebusi, janah Aku ngkernepkenca bangsa-bangsa e.

²⁴Ola kam erjimpuh ntah pe ersembah man dibata-dibatana; janah ola iusihndu adat si lit i bas agamana. Kernepken dibata-dibatana, runtuhken kerina tugu-tuguna si badia.

²⁵Adi isembahndu Aku, TUHAN Dibatandu, Kupasu-pasu kam alu mereken pangan ras lau, janah Kuagui kerina penakitndu.

²⁶I bas negerindu la lit diberu si keguguren, la lit si la mupus. Kuban kam nggeluh cawir metua.

²⁷Mbiar imbang-imbangndu kerina Kubahan man bangKu; Kuhuntakken imbangndu erperang, janah Aku erbahanca maka kerina musuhndu kiamen nadingken kam.

²⁸Guntar Kubahan musuh-musuhndu, Kupelawes bangsa Hewi, bangsa Kanaan ras bangsa Heti tupung kam mengketi tanehna.

²⁹Tapi la ia Kupelawes i bas sada tahun; sabap adi bage Kubahan, taneh e enggo kari jadi melungun, janah mbuesa pagi iakapndu rubia-rubia si meliar jadi musuhndu.

³⁰E maka sitik-sitik ia Kupelawes seh maka enggo cukup teremna kam ngkuasai taneh e.

³¹Kupebelang baleng negerindu i bas Teluk Akaba nari seh ku Lau Eprat janah i Lawit Tengah nari seh ku gurun pasir. Kubereken gegeh man bandu naluken penduduk negeri e, janah ipelawesndu ia kerina tupung kam bengket.

³²Ola ibahanndu perpadanen ras ia ntah ras dibata-dibatana.

³³Ola bere bangsa-bangsa e ringan i bas negerindu; sabap adi iberendu, ibabaina kam pagi erdosa man bangKu. Adi isembahndu dibata-dibatana, enggo kam kena siding si erbahanca kam mate.”