Read Batak Karo KELUAREN 24 Bible Online

KELUAREN 24 - Batak Karo bible

KELUAREN 24

¹Nina TUHAN man Musa, “Mari ku datas deleng njumpai Aku; reh kam ras Harun, Nadap, Abihu ras pitu puluh kalak peminpin-peminpin bangsa Israel; janah erjimpuh kam nembah man bangKu tupung kam ndauh-ndauh denga.

²Ise pe la banci ndeher ras Aku seakatan kam ngenca. Jelma si nterem la banci reh ku datas deleng.”

³Lawes Musa ngataken kerina perentah TUHAN man bangsa Israel bage pe kerina peraturenNa, janah ras-ras ia kerina ngaloi nina, “Kerina si ikataken TUHAN nggit kami ngelakokenca.”

⁴Isuratken Musa kerina perentah TUHAN. Pepagina, lampas erpagi-pagi, ipajekkenna sada batar-batar ingan persembahen i teruh deleng e, janah ipajekkenna pe sepuluh dua tunggul batu, sada guna tep-tep suku bangsa Israel si sepuluh dua.

⁵Jenari isuruhna piga-piga kalak anak perana nutung persembahen man TUHAN bage pe piga-piga lembu ipersembahkenna jadi persembahen persadan.

⁶Ibuat Musa setengah dareh asuh-asuhen e, kenca bage itamakenna i bas piga-piga mangkuk; setengah nari ipirpirkenna ku batar-batar e.

⁷Kenca bage ibuatna kitap perpadanen e, e me ingan perentah TUHAN isuratken, e maka iogekenna alu sora megang man bangsa Israel. Nina kerina ngaloi, “Iikutken kami TUHAN janah ilakoken kami kerina si iperentahkenNa.”

⁸Jenari ibuat Musa dareh si i bas mangkuk ndai, ipirpirkenna ku jelma si nterem. Nina musa man bangsa e, “Enda me dareh tanda pengesahen perpadanen si ibahan TUHAN ras kam sanga iberekenNa kerina perentah-perentah enda man bandu.” [96†]

⁹Musa, Harun, Nadap, Abihu ras pitu puluh kalak peminpin-peminpin kalak Israel nangkih ku datas deleng e.

¹⁰Janah iidahna Dibata bangsa Israel. I teruh naheNa lit teridah bagi lante batu si meherga kal, rupana biru bagi langit.

¹¹La isakiti Dibata peminpin-peminpin pilihen bangsa Israel e; idahna Dibata, jenari man ras minem kalak ndai.

¹²Nina TUHAN man Musa, “Reh lah kam ku datas deleng njumpai Aku, gelah sanga kam i je, Kubereken man bandu dua lambar papan batu si isina kerina undang-undang si enggo Kusuratken guna pengajaren man bangsa Israel.”

¹³Ersikap Musa ras juak-juakna Josua, jenari berkat nangkih deleng si badia e.

¹⁴Nina Musa man kerina peminpin-peminpin e, “Timai kami i bas ingan erkemah enda seh kami mulih ka. Harun ras Hur tading i jenda ras kam, e maka ise gia si lit perkarana si man cakapenken banci isehkenndu man kalak enda.”

¹⁵Lawes Musa ku Deleng Sinai, janah lit embun si nutupisa.

¹⁶[16-17] TUHAN reh ku datas deleng e i bas terang si ersinalsal. Man bangsa Israel, terang e teridah bagi api si gurlah i bas tampuk deleng e. Embun ndai nutupi deleng enem wari dekahna, janah i bas wari si pepituken erlebuh TUHAN man Musa i bas embun e nari.

¹⁸Musa nangkih ku datas deleng e, mengketi embun. I je me ia tading empat puluh wari empat puluh berngi dekahna. [97†]