Read Batak Karo KELUAREN 25 Bible Online

KELUAREN 25 - Batak Karo bible

KELUAREN 25

¹Nina TUHAN man Musa,

²“Suruh kalak Israel erbahan sada persembahen man bangKu. Aloken persembahen kai pe si ibereken kalak alu ukurna ersuruh.

³Persembahen-persembahen e, e me kap: emas, pirak, tembaga;

⁴uis lenen halus; uis wool biru, ungu ras megara; uis si ibahan i bas mbulu kambing nari;

⁵kulit bajar biri-biri si icelup megara; kulit halus, kayu jati;

⁶minak guna lampu; rempah-rempah guna minak penangkuhen ras si man tutungen gelah merim;

⁷batu delima ras batu-batu permata si deban guna perhiasen epod Imam si Mbelin ras uis tutup tentenna.

⁸Bangsa Israel la banci la majekken sada Kemah si Badia man bangKu, gelah banci Aku ringan i tengah-tengah bangsa e.

⁹Bahan lah kemah e ras kerina perkakas-perkakasna sue ras rencana si nandangi Kucidahken man bandu.”

¹⁰“Bahan lah sada peti i bas kayu jati nari, gedangna 110 sentimeter, belangna 66 sentimeter ras ganjangna 66 sentimeter.

¹¹Jenari lapisi alu emas tulen arah bas ras arah darat janah bahan ukiren emas kelewet tepina.

¹²Bahan empat gelang emas ingan lanja-lanjana, jenari pasang gelang e i bas nahena si empat, dua gelang sembelah.

¹³Bahan lanja-lanjana i bas kayu jati nari jenari baluti alu emas.

¹⁴Tamaken lanja-lanjana arah bas gelang e, sada sembelah.

¹⁵Lanja-lanjana e arus tetap i bas gelang e, janah la banci iagui.

¹⁶Kenca bage tamaken ku bas peti e papan batu si dua si Kubereken man bandu, ingan pedah e isuratken.

¹⁷Bahan tutupna i bas emas tulen nari, gedangna 110 sentimeter, belangna 66 sentimeter. [98†]

¹⁸Bahan dua gambar mahluk si erkabeng i bas emas nari,

¹⁹sada i bas tep-tep ujung tutup emas ndai. Persada lah e ras tutup emas ndai.

²⁰Mahluk si erkabeng e petala-tala i babo tutup emas e, janah kabengna ikirbangken e nutupi tutup emas e.

²¹Tamaken papan batu si dua ndai ku bas peti e jenari tamaken tutup emas e i babona.

²²I je Aku njumpai kam; janah i babo tutup emas, i kelang-kelang mahluk si erkabeng e nari duana Kubereken man bandu kerina undang-undangKu guna bangsa Israel.”

²³“Bahan lah sada meja i bas kayu jati nari, gedangna 88 sentimeter, belangna 44 sentimeter janah ganjangna 66 sentimeter.

²⁴Lapisi lah meja e alu emas tulen janah bahan lah ukiren emas i sekelewet tepina.

²⁵Bahan sada bingke kelewet, belangna 75 millimeter, janah sada ukiren emas i sekelewet bingkena e.

²⁶Bahan empat gelang emas ingan ngangkatsa janah tamaken e i bas sukina si empat, ingan nahe meja e.

²⁷Gelang ingan namaken lanja-lanjana e itamaken deher bingkena ndai.

²⁸Bahan lanja-lanjana i bas kayu jati nari jenari baluti alu emas.

²⁹Bahan piring, cangkir, guci ras mangkuk si ipake sanga mpersembahken anggur. Kerina si enda ibahan i bas emas tulen nari.

³⁰Meja e itamaken i lebe-lebe Peti Perpadanen, janah i babo meja arus tetap lit roti si badia si ipersembahken man bangKu.” [99†]

³¹“Bahan sada nahe lampu i bas emas tulen nari. Tapakna ras tangkena itepa i bas emas nari; bunga-bunga ukirenna e, termasuk bungana si langa terlak ras si enggo terlak, arus ibahan ersada tapakna ras tangkena e.

³²Tupang nahe lampu e, enem arah kawes ras telu arah kemuhen.

³³Tep-tep tupang si enem e lit ka telu bunga ukirenna, ibentuk bagi bunga ketapang rikut ras bungana si langa terlak ras si enggo terlak.

³⁴Tangke nahe lampu e lit empat bunga ukirenna, ibentuk bagi bunga ketapang si langa terlak ras si enggo terlak.

³⁵I bas bena-bena tep-tep tupang si telu pasang e, arus lit sada bunga si langa terlak.

³⁶Bunga si langa terlak e, tupang-tupang ras nahe lampu e arus ersada kerina itepa i bas emas nari.

³⁷Bahan pitu lampu guna nahe lampu e, janah iatur gelah isalsalina ku lebe.

³⁸Bahan jepit-jepitna ras bakina i bas emas murni nari.

³⁹Guna erbahan nahe lampu ras kerina peralatenna enda pake lah emas tulen telu puluh lima kilo.

⁴⁰Perdiateken maka enda kerina ibahan sue ras gambar rencana si Kucidahken man bandu i das deleng e.” [100†]